Kal idhi e weche manie iye

Kal idhi kama ochanie weche mantie

“Miwae Yie Momedore”

“Miwae Yie Momedore”

“Konya kama aremie e yie!”—MAR. 9:24.

WER: 54, 24

1. Ang’o momiyo bedo gi yie en gima dwarore ahinya? (Ne picha man malo.)

BE ISEGAPENJORIE niya, ‘Be an ng’at ma Jehova biro reso e kinde masira maduong’, ma orwaka e piny manyien?’ En adier ni mondo wabi watony, nitie gik mang’eny ma dwarore ni watim. Kata kamano, nitie gimoro achiel maduong’ ma dwarore ma jaote Paulo nowuoyoe ka nondiko kama: “Ka ng’ato onge gi yie, ok onyal moro Nyasaye e yo malong’o.” (Hib. 11:6) Bedo gi kidoni nyalo nenore ka gima yot, to adiera en ni “ok ji duto ma nigi yie.” (2 The. 3:2) Ndikogi konyowa ng’eyo gimomiyo dwarore ahinya watim kinda mondo wabed gi yie motegno.

2, 3. (a) Ang’o ma wapuonjore kuom Petro e wi gimomiyo bedo gi yie en gima dwarore? (b) Gin penjo mage ma wabiro nono?

2 Jaote Petro nonyiso kaka yie en kido makende ahinya ka nowacho ni yie “mosekalo e tem” nokel “pak gi duong’ kod luor e kinde ma Yesu Kristo biro fwenyoree.” (Som 1 Petro 1:7.) To nikech masira maduong’ okayo machiegni, donge dwaher bedo gadier ni kit yie ma wan-go biro miyo wabed e kind joma ibiro pwo nikech yie margi e kinde ma Ruodhwa ma nigi duong’ nofwenyree? Kuom adier, dwaher bedo “jogo ma nigi yie ma biro miyo ores ngimawa.” (Hib. 10:39) Ka mano e gima dwaher chopo, wanyalo kwayo mana kaka jal moro nokwayo Yesu niya: “Konya kama aremie e yie!” (Mar. 9:24) Kata wanyalo bedo gi  chuny kaka mar joote Yesu ma nokwayo niya: “Miwae yie momedore.”—Luka 17:5.

3 Wach bedo gi yie momedore nyalo nyuolo penjo moko ma chalo kaka: Ere kaka ng’ato bedo gi yie? Ere kaka wanyalo nyiso ni wan gi yie? Ang’o momiyo wanyalo bedo gadiera ni kwayo ma wakwayogo Nyasaye mondo omiwa yie ibiro dwok?

KAKA WANYALO BEDO GI YIE MA MORO NYASAYE

4. Gin ranyisi mag jomage ma nyalo konyowa bedo gi yie motegno?

4 Nikech ‘weche duto ma ne ondik chon, ne ondiki mondo opuonjwa,’ ranyisi mag joma nonyiso yie ma wechegi ondik e Muma nyalo puonjowa gik mathoth. (Rumi 15:4) Seche ma wasomo weche ma wuoyo e wi Ibrahim, Sara, Isaka, Jakobo, Musa, Rahab, Gideon, Barak, kod jomamoko mang’eny, weche ma wasomo kuomgigo nyalo chwalowa mondo wanon yiewa maber. (Hib. 11:32-35) E wi mano, sama wasomo weche mag owete kod nyiminewa ma kindegi ma nigi yie motegno, mano nyalo jiwowa mondo wamed timo kinda e tego yiewa. *

5. Elija nonyiso nade ni en gi yie motegno kuom Jehova, to ranyisine konyowa mondo wapar ang’o?

5 Achiel kuom ranyisi manie Muma en mar janabi Elija. Par ane gik ma notimorene ma nyiso ni noketo yie mare chuth kuom Jehova. Kane Elija onyiso Ruoth Ahab ni Jehova ne chano kelo oro, Elija nowacho kama ka en gadier: “Kaka Jehova . . . entie, . . . tho mamoko e lum kata koth ok nobedi e higinigi, to mana kuom wachna.” (1 Ru. 17:1) Elija ne nigi yie ni Jehova ne dhi miye gik ma nodhi dwaro e kinde orono kendo nodhi timo kamano ne jomamoko bende. (1 Ru. 17:4, 5, 13, 14) Nonyiso ni en gadier ni Jehova ne nyalo chiero nyathi moro ma ne otho. (1 Ru. 17:21) Noonge kiawa ni Jehova ne dhi oro mach mondo owang’ misango ma nochiwo e god Karmel. (1 Ru. 18:24, 37) Ka nochopo kinde ma Jehova noketo mar tieko oro, kendo ne onge gimoro amora ma ne nyalo nyiso ni koth chiegni chako chue, Elija nowacho ne Ahab niya: “Amalo, ichiem kendo imodhi; nikech nitie dwond koth maduong’.” (1 Ru. 18:41) Donge ranyisi kaka mano konyowa nonore wawegi kabe wan gi yie motegno?

WANYALO TIMO ANG’O MONDO WABED GI YIE MOTEGNO?

6. En ang’o ma Jehova onego omiwa mondo okonywa bedo gi yie motegno?

6 Ok wanyal bedo gi yie mana gi tekrewa wawegi. Yie en achiel kuom olembe ma roho maler mar Nyasaye nyago. (Gal. 5:22) Omiyo, en gima nyiso rieko luwo puonj ma Yesu nomiyowa ni walem mondo omedwa roho mar Nyasaye. Yesu owuon nosingonwa ni Wuonwa manie polo biro “chiwo roho maler e okang’ malach moloyo ne joma kwaye.”—Luka 11:13.

7. Ler ane kaka wanyalo siko ka wan gi yie motegno.

7 Ka wasebedo gi yie, pod dwarore ni wadhi nyime tege. Yie marwa inyalo pim gi mach maliel. Sama mach ochako liel, onyalo liel matek. Ka iweyo aweya majno kamano, gikone yien biro bedo mana mirni maliet kae to bang’e olokore buru. To kapo ni imedo yien kata ichoro mach, majno nyalo medo liel aming’a. E yo ma chalo kamano, yiewa nyalo dhi nyime bedo motegno mana ka wadhi nyime somo Wach Nyasaye. Ka wapuonjore Muma ma ok wabare, wabiro  hero Muma kod Nyasaye ma e wuon-go, to mano e ma biro konyowa bedo gi yie momedore.

8. Ang’o ma biro konyowa bedo gi yie motegno kendo siko ka wan gi yie ma kamano?

8 En ang’o kendo ma nyalo konyi mondo ibed gi yie motegno kendo isik gi yie ma kamano? Gik ma ne ipuonjori ma ichopo kama ne obatisie ok oromo. (Hib. 6:1, 2) Puonjri weche ma nokor e Muma mi ochopo kare nimar gibiro konyi neno gimomiyo onego ibed gi yie. E wi mano, inyalo tiyo gi Muma mondo inonri kabe yie ma in-go chalre gi gima iwacho ni joma nigi yie motegno onego otim.—Som Jakobo 1:25; 2:24, 26.

9, 10. Gik ma luwogi konyowa nade bedo gi yie motegno: (a) osiepe mabeyo? (b) chokruoge mag kanyakla? (c) tij lendo?

9 Jaote Paulo nonyiso Jokristo wetene ni ne ginyalo ‘jiwore e kindgi ka ng’ato jiwo yie mar nyawadgi.’ (Rumi 1:12) Seche ma wan gi Jokristo wetewa, wanyalo jiwore e yie, to ahinya sama wan gi joma yiegi ‘osekalo e tem.’ (Jak. 1:3) Osiepe maricho biro ketho yiewa, to osiepe mabeyo biro konyowa bedo gi yie motegno. (1 Kor. 15:33) Mano en achiel kuom gimomiyo ijiwowaga ni kik wawe “bedo e chokruogewa kanyachiel,” to wadhi nyime ‘jiwore.’ (Som Jo-Hibrania 10:24, 25.) Gimachielo momiyo onego wadhi e chokruogewa en ni kuno e ma wayudoe puonj ma konyowa bedo gi yie motegno. Mano winjore gi gima Paulo nowacho niya: “Ng’ato bedo gi yie bang’ kosewinjo wach.” (Rumi 10:17) Be wachokorega gi Jokristo wetewa ma ok wabare?

10 Sama wan e tij lendo, wakonyo ji obed gi yie, to gie sechego wan bende yiewa medo bedo motegno. Mana kaka Jokristo mokwongo, wapuonjore keto yiewa chuth kuom Jehova kendo wuoyo gi chir e chal moro amora.—Tich 4:17-20; 13:46.

11. Ang’o momiyo Kaleb gi Joshua ne nigi yie motegno, to wanyalo bedo nade kaka gin?

11 Fwenyo kaka Jehova konyowa e ngimawa kod kaka odwoko lamo magwa, miyo yiewa medo tegno. Mano e gima notimore ne Kaleb gi Joshua. Ne ginyiso yie kuom Jehova kane gidhi nono Piny Manosingi. Kata kamano, neno yo ma Jehova notayogigo e ngimagi bang’ nono piny nomiyo yie margi omedore moloyo. Mano e momiyo Joshua nowuoyo gi chir ahinya konyiso Jo-Israel wetene niya: “Gimoro ne ok orem kuom gik mabeyo duto ma ne Jehova Nyasachu owacho kuomu.” Bang’e nomedo wacho kama: “Kamano koro mondo uluor Jehova, kutiyone gi chuny kendo gadiera . . . to an kod jooda, wanati ni Jehova.” (Jos. 23:14; 24:14, 15) Kaka wamedo neno ber ma Jehova bergo, wan bende wabiro medo bedo gadiera ma kamano.—Zab. 34:8.

KAKA WANYALO NYISO NI WAN GI YIE

12. En ang’o ma Jakobo wacho ni dwarore ahinya kuom wach bedo gi yie?

12 Wanyalo nyiso nade ni wan gi yie motegno? Jakobo dwoko penjono ka nondiko niya: “Abiro nyisi yiena ma nigi tim.” (Jak. 2:18) Timbewa biro nyiso ni wan gi yie madier. Weuru wanon ane ranyisi moko.

Joma tiyo matek e tij Nyasaye nyiso ni gin gi yie motegno (Ne paragraf mar 13)

13. Ere kaka tij lendo nyiso ni wan gi yie?

13 Lando wach maber en yo maber ahinya mwanyalo nyisogo yiewa. Nikech ang’o? Tijni dwaroga ni wabed gi yie ni kinde ma Nyasaye oketo mar kelo giko mar pinyni okayo machiegni, kendo ‘ok noriwre.’ (Hab. 2:3) Achiel kuom yore mwanyalo ng’eyogo ni yiewa otegno ma romo nade, en ng’iyo okang’ ma wachiworego e tij lendo. Be watimo duto mwanyalo, ka seche moko wamanyo yore mag timo tijno e okang’ momedore? (2 Kor. 13:5) “Hulo  e lela” wach maber mar warruok en yo maduong’ ahinya mar nyiso ni wan gi yie.—Som Jo-Rumi 10:10.

14, 15. (a) Ere kaka wanyalo nyiso ni wan gi yie e ngimawa mapile? (b) Chiw ane ranyisi ma nyiso kaka bedo gi yie motegno nokonyo joot moro.

14 Wanyalo nyiso ni wan gi yie bende seche ma wanyagore gi pek mag ngima pile ka pile. Bed ni tuwo moro omonjowa, chunywa onyosore, parruok omakowa, dhier odonjo, kata waromo gi chandruoge mamoko, wabiro bedo gi geno ni Jehova gi Wuode biro “konyowa e kinde mowinjore.” (Hib. 4:16) Wanyiso ni wan gi genono kuom kwayo Jehova okonywa e yore mamoko mopogore gi weche mag chuny. Yesu nowacho ni wanyalo kwayo gik ringruok moriwo “chiembwa modiechieng’ kodiechieng’ ka luwore gi dwarowa mapile.” (Luka 11:3) Weche mondik e Muma nyisowa maler ni Jehova nyalo timonwa kamano. Kinde moro kane oro moro okwako piny Israel, Jehova nomiyo Elija chiemo kod pi. “Agege nokelone kuon gi ring’o gokinyi, bende kuon gi ring’o godhiambo; to nomodho pi aora,” mana kaka Jehova nochiko. (1 Ru. 17:3-6) Wan gi yie ni Jehova nyalo chiko weche ma wan bende wayud gik ma wadwaro.

Wanyiso ni wan gi yie sama wanyagore gi tembe e ngimawa mapile (Ne paragraf mar 14)

15 Wan gadier ni tiyo gi puonj ma yudore e Muma nyalo konyowa yudo chiemo ma wachamo. Nyaminwa moro miluongo ni Rebecca modak Asia, noneno kaka wachno en adier. En kaachiel gi joode gisebedo ka gitiyo gi puonj ma yudore Mathayo 6:33 kod Ngeche 10:4 e ngimagi kuom keto dwaro mag Pinyruoth obed mokwongo, kendo kuom tiyo matek. Rebecca wacho ni kinde moro, chwore ne neno ni tij andika ma notiyo ne nyalo monogi yudo thuolo moromo mar tiyo ne Nyasaye, omiyo noweyo tijno. Kata kamano, pod ne gin gi nyithindo ang’wen ma nonego gipidh. Rebecca wacho niya: “Ne wachako loso tamtam to wauso. Kuom higni duto ma ne wausoe tamtamgo ne waneno ni adier Jehova ok nojwang’owa. Ne ok wanindo kech kata mana odiechieng’ achiel.” Be in bende nitie gima osetimoreni e ngima ma omiyo ibedo gadier ni Muma e ma tayo ji e yo maber e kindegi?

16. En ang’o ma wabiro yudo ka waketo genowa kuom Nyasaye?

 16 Ok onego wabed gi kiawa kata matin ni ka waluwo kaka Nyasaye chikowa to wabiro yudo ber. Konwoyo weche ma Habakkuk nowacho, Paulo nondiko niya: “Ng’at moket kare kuom yie, nobed mangima.” (Gal. 3:11; Hab. 2:4) Omiyo, en gima dwarore ahinya ni waket yie kuom Jal ma nyalo konyowa gadier. Paulo paronwa ni ‘ka luwore gi teko ma Nyasaye nyiso kokalo kuomwa, Nyasaye nyalo timo weche duto mokadho ma wakwayo kata ma waparo.’ (Efe. 3:20) Jotich Jehova timo duto ma ginyalo mondo gitim dwach Nyasaye, to nikech ging’eyo ni girem, giketo genogi kuom Jehova mondo oguedh kinda margi. Donge wamor ni Nyasachwa ni kodwa?

NE GIKWAYO YIE MA OMIGI

17. (a) Kwayo ma joote nokwayogo ni omedgi yie, nodwok nade? (b) Ang’o momiyo wanyalo bedo gadier ni ka wakwayo yie momedore to ibiro miwa?

17 Weche ma wasenono nyaka chop kae, nyalo miyo wawinj e chunywa mana kaka joote nowinjo e chunygi kane gikwayo Yesu niya: “Miwae yie momedore.” (Luka 17:5) Ne giyudo dwoko, to ahinya ahinya e kinde Pentekost e higa mar 33 kane oolnegi roho maler ma okonygi ng’eyo dwach Nyasaye e yo matut. Mano nojiwo yie margi. To nikech mano, ne gichako kampen maduong’ mar tij lendo ma ne pok one chop kindeno. (Kol. 1:23) Be wanyalo geno ni ka wakwayo mondo omedwae yie to ibiro dwok kwayowano? Muma nyisowa ni inyalo medwa nikech mano en gima wakwayo Nyasaye “ka luwore gi dwache.”—1 Joh. 5:14.

18. Jehova guedhoga nade jogo ma timoga kinda mondo gibed gi yie?

18 Nenore maler ni Jehova mor gadier gi joma keto genogi kuome chuth. Ka wakwaye mondo omiwae yie momedore obiro timonwa kamano, kendo yiewa biro medo bedo motegno moloyo, to mano biro miyo okwanwa kaka “joma owinjore gi Pinyruodh Nyasaye.”—2 The. 1:3, 5.

^ par. 4 Kuom ranyisi, ne ane sigand ngima mar Lillian Gobitas Klose (Amkeni! mar Julai 22, 1993), Feliks Borys (Amkeni! mar Februar 22, 1994), kod Josephine Elias (Amkeni! mar Septemba 2009).