Kal idhi e weche manie iye

Kal idhi kama ochanie weche mantie

Gimomiyo Golo Ng’ato e Kanyakla en Gima Nyiso Hera

Gimomiyo Golo Ng’ato e Kanyakla en Gima Nyiso Hera

OWADWA moro miluongo ni Julian wacho kama: “Ka nawinjo kilando ni wuoda ogol e kanyakla, wachno notieka. En e ma ne en nyathina makayo kendo ne waherore kode ahinya. Ne wajatimo thoth gik moko kanyachiel. Nosebedo koketo ranyisi maber ne jomoko, to apoya nono nochako timo gik ma Muma ok oyiego. Jaoda ne siko ka ywak, kendo ok nang’eyo kaka dahoye. Ne wasiko wapenjore kapo ni nitie gik moko ma ne ok watimo kaka jonyuol.”

Ang’o momiyo inyalo wach ni golo ng’ato e kanyakla en gima nyiso hera to konchiel to okelo lit? Gin paro mage ma Ndiko chiwo mondo kanyakla okaw okang’ ma chalo kamano? To en ang’o ma nyalo miyo ogol ng’ato e kanyakla?

WECHE ARIYO MA NYALO MIYO OGOL NG’ATO E KANYAKLA

Nitie weche ariyo ma ka otimore kanyachiel, to biro miyo ogol ng’ato e kanyakla. Mokwongo, Janeno mosebatis otimo richo moro maduong’. Mar ariyo, ok onyis ni oloko chunye kuom ketho mosetimono.

Kata obedo ni Jehova ok gen ni wabiro timo gik moko e yo makare chuth, omiyowa chikene ma doher ni jotichne oluw mondo gisik ka giler e nyime. Kuom ranyisi, Jehova chiko ni wawe timbe kaka terruok, lamo sanamu, kuo, mayo ji gik moko gi thuon, nek, kod timbe juok.—1 Kor. 6:9, 10; Fwe. 21:8.

Donge inyalo yie ni chike maler ma Jehova omiyowa gin chike ma wanyalo luwo kendo ni giritowa? Ng’ano ma ok diher dak e kind joma odimbore mohero kuwe kendo minyalo gen? Mano en mana gima nyalore e kind Jokristo wetewa ma lamo Jehova, nimar seche ma wachiwore ne Nyasaye, wasingore mar dak kaluwore gi chikene ma yudore e Muma.

To nade ka Jakristo mosebatisi otimo richo moro maduong’ nikech en dhano morem? Moko kuom jotich Jehova machon ne otimo richo, to Nyasaye ne ok okwedogi mapiyo piyo. Ruoth Daudi en ranyisi ma ji mang’eny ong’eyo. Daudi noterore mi kendo oneko. To e ma pod janabi Nathan nonyise kama: “Jehova . . . osegolo kethni.”—2 Sam. 12:13.

Nyasaye noweyo ne Daudi richone nikech noloko chunye gadier. (Zab. 32:1-5) E yo ma chalo kamano, jatich Jehova e kindegi ibiro gol e kanyakla mana ka otamore loko chunye kendo ka odhi nyime timo richo. (Tich 3:19; 26:20) Kapo ni jodongo manie komiti ma nono wach richo ma ng’ato otimo oneno ni ng’atno ok oloko chunye gadier, chunogi ni nyaka koro gigole e kanyakla.

 Sama ogol ng’ato e kanyakla, wanyalo paro ni mano ok en gima ber kendo ma ok nyis hera, to moloyo kapo ni ng’atno en osiepwa kata watwa. Kata kamano, Wach Jehova nyisowa gimomiyo chenro ma kamano en gima nyiso hera gadier.

GOLO NG’ATO E KANYAKLA KONYO JI DUTO MA WACHNO OMAKO

Yesu nowacho ni “rieko nyisore ni en kare kokalo kuom gik motimo.” (Math. 11:19) Kawo okang’ mar golo ng’at ma ok oloko chunye e kanyakla en gima nyiso rieko kendo okelo ber modhuro. Wanon ane ber moko adek:

Golo joricho e kanyakla miyo nying Jehova duong’. Nikech iluongowa gi nying Jehova, timbewa onego owinjre gi nyingno. (Isa. 43:10) Mana kaka timbe mabeyo kata maricho ma nyathi timo nyalo ketho nying jonyuolne kata miyo nyinggi oyud pak, e kaka timbe jotich Jehova bende nyalo miyo oketh nyinge kata omiye pak. Nying Jehova yudo duong’ kapo ni joma tiyo gi nyingno luwo chikene ma tayo timbe mabeyo. Gima chalo kamano notimore e kinde Ezekiel. Kane joma wuok e ogendni mamoko oneno Jo-Yahudi to ne giparo nying Jehova.—Eze. 36:19-23.

Ka wadhi nyime gi timbe mag anjawo, wanyalo miyo ji ocha nying maler mar Nyasaye. Jaote Petro nochiwo siem ne Jokristo niya: “Kaka nyithindo ma luwo kaka ichikogi, weuru bedo joma inyuaso ka lowo ka luwore gi gombo ma ne un-go chon e kinde ma ne pod ukia, to kaka Jal Maler ma noluongou, beduru joma ler e timbeu duto, nimar ondik niya: ‘Nyaka ubed joma ler, nikech an aler.’” (1 Pet. 1:14-16) Timbe maler miyo nying Nyasaye duong’.

Kapo ni achiel kuom Joneno mag Jehova timo timbe ma ok ler, osiepene kaachiel gi joma ong’eye nyalo ng’eyo wachno. Golo ng’ato e kanyakla en tim ma nyiso ni Jehova nigi joge maler ma luwo gima Ndiko wacho mondo gisik ka giler. Jago moro e piny Switzerland nodhi e Od Romo moro kae to owacho ni doher bedo Janeno. Nyamin mare ne ogol e kanyakla nikech nodonjo e timbe ma ok ler. Nowacho ni odwaro lemo gi joma ok yie ne “ji obed gi timbe maricho.”

Golo ng’ato e kanyakla miyo kanyakla siko ka ler. Jaote Paulo nosiemo Jo-Korintho e wi rach ma bedoga kapo ni jaricho owe e kanyakla. Nopimo jarichono gi thowi matin ma nyalo miyo mogo duto oyieny. Nowacho kama: “Thowi manok e ma yienyo mogo duto midwalo.” Kae to nosiemogi kama: “Goluru ng’at marachno oa e kindu.”—1 Kor. 5:6, 11-13.

Nenore ni ‘ng’at marach’ ma Paulo nowuoyo kuomeno, ne timo richo goyiem kendo gi wang’ teko. Kendo ne nitie jomoko e kanyakla ma nochako dokne. (1 Kor. 5:1, 2) Ka dine richo marach kamano owe aweya, Jokristo mamoko ne nyalo luwo tim marachno, ma gibed ka jomamoko ma nodak e dala mar Jo-Korintho ma timbegi nodwanyore. Weyo goyiem mondo timbe maricho odhi adhiya nyime, miyo ji mbeko chike Nyasaye. (Ekl. 8:11) E wi mano, joricho ma ok lok chunygi nyalo chalo gi “lwendni mopondo piny e bwo pi,” kendo ginyalo ketho yie mar joma nie kanyakla.—Juda 4, 12.

Golo jaricho e kanyakla nyalo miyo pache oduog. Kinde moro Yesu nowuoyo e wi wuowi moro ma noweyo dala wuon mare, ma odhi oketho mwandu ma ne opogne e ngima mar anjawo. Bang’ chandore malich, noduogo ofwenyo ni ngima tek ahinya ka ok odak e od wuon-gi. Gikone noloko pache kod chunye mokawo okang’ mar dok ir joodgi. (Luka 15:11-24) Yo ma Yesu nolerogo mor ma wuon mare nobedogo ka noloko chunye, konyowa ng’eyo mor ma Jehova bedogago ka jaricho olokore. Jehova singonwa kama: “Ok amor ka ng’a marach otho; to adwaro mondo ng’a marach olokre oa e yore obedi mangima.”—Eze. 33:11.

E yo ma chalo kamano, jogo mogol e kanyakla nyalo fwenyo ni gilalo gima duong’ ahinya nikech ok giriwre gi owete gi nyiminene ma Jokristo ma chalo kaka joodgi. Gik maricho ma yudogi nikech richo ma gitimo, kendo paro mor  ma ne gin-go chon kane gin gi winjruok maber gi Jehova kaachiel gi joge, nyalo miyo pachgi oduogi.

Hera kod chir dwarore mondo okony jaricho. Daudi ma nondiko Zaburi nowacho kama: “Ng’a matir kopuoda, mano dibed na ng’wono; kokwera bende, dibedi kaka mor wich.” (Zab. 141:5) Kuom ranyisi, par ane ng’at ma ne chiemo to ring’o omoko e dande. Gamo yueyo chako tame kendo teko rumone. Wuoyo be koro ok onyal. Ka ng’ato ok okonye mapiyo to obiro tho. Kae to osiepne moro pamo ng’eye mondo ring’ono owuog oko. Apatno nyalo bedo malit, to en mana ni mano e ma nyalo reso ngimane. E yo ma chalo kamano, Daudi nong’eyo ni ng’at makare nyalo rieye mowinj malit. Kata kamano, timo kamano ne dhi konye.

Kinde mang’eny, golo ng’ato e kanyakla en kum mowinjore ma imiyo ng’at motimo richo. Bang’ higni apar, wuod Julian ma ne owuo kuome e chak sulani, noloko kit ngimane, oduoge e kanyakla, kendo sani en jaduong’-kanyakla. Owacho kama: “Bedo ni nogola e kanyakla nomiyo achako neno kaka kit ngima ma nadake ne rach. Mano e kum ma nowinjore koda.”—Hib. 12:7-11.

GIK MA WANYALO TIMO KA OGOL NG’ATO E KANYAKLA

En adier ni golo ng’ato e kanyakla en gima lit, to mano ok nyis ni en gima rach. Waduto wan gi ting’ mar neno ni kum mar golo ng’ato e kanyakla okonyo kaka dwarore.

Itimoga kinda ahinya mondo okony joma oloko chunygi oduog ir Jehova

Jodong-kanyakla ma nigi ting’ mapek kendo malit mar nyiso ng’ato ni ogole e kanyakla, timo kamano e yor hera ka giluwo ranyisi mar Jehova. Sama gitimo mano, ginyise maler kendo e yor ng’wono gik monego otim mondo oduoge kendo. Mondo jodongo oparnegi kaka ginyalo duogo ir Jehova, kinde ka kinde gilimoga joma osechako nyiso ni giloko yoregi. *

Joot kod wede nyalo nyiso ni gihero kanyakla kendo gihero ng’at mogol e kanyaklano kuom riwo lwedo kum momiyeno. Julian wacho kama: “Pod ne en wuoda, mak mana ni ngima ma nodake e ma nopogowa.”

Ji duto manie kanyakla nyalo nyiso ni gin gi hera mitayo gi chike Nyasaye kuom weyo wuoyo gi ng’at mogol e kanyakla kata tudore kode e yo moro amora. (1 Kor. 5:11; 2 Joh. 10, 11) Timo mano miyo kum ma Jehova ochiwone kotiyo gi jodongo oti e yo maber. E wi mano, dwarore ni gimed hero kendo riwo lwedo joot ma ng’atgi ogol e kanyakla nikech lit ma gin-go, mondo joodno kik par ni gin bende kanyakla ok dwargi.—Rumi 12:13, 15.

Julian tieko ka wacho niya: “Golo ng’ato e kanyakla en gima dwarore ahinya, nimar okonyowa dak kaluwore gi chike Jehova. En adier ni olit, kata kamano achien okelo mana ber lilo. Dine ariw lwedo gik maricho ma wuoda ne timo, sani dikoro pok oduogo.”

^ par. 24 Ne Mnara wa Mlinzi ma April 15, 1991, ite mar 21-23.