Kal idhi e weche manie iye

Kal idhi kama ochanie weche mantie

“Wanadhi Kodu”

“Wanadhi Kodu”

“Wanadhi kodu, nikech wasewinjo ka Nyasaye ni kodu.”—ZEK. 8:23.

WENDE: 32, 31

1, 2. (a) En ang’o ma Jehova nowacho ni biro timore e kindewagi? (b) Gin penjo mage ma ibiro dwok e sulani? (Ne picha man malo.)

JEHOVA nokoro kama kowuoyo e wi ndalowagi: “E ndalogo, ji apar moa kuom dhumbe duto mag ogendini, ginimak mana riak law ng’a ma Jayahudi ka giwacho, Wanadhi kodu, nikech wasewinjo ka Nyasaye ni kodu.” (Zek. 8:23) Mana kaka ji apar miwuoyo kuomgi e yor ranyisi e ndikono, joma nigi geno mar dak e piny omako “riak law ng’a ma Jayahudi.” Gimor tiyo ne Nyasaye kanyachiel gi “Israel mar Nyasaye” ma owal gi roho nikech ging’eyo ni Jehova guedho Jokristo mowalgo.—Gal. 6:16.

2 Mana kaka janabi Zekaria, Yesu bende nowuoyo e wi winjruok maber ma jotich Nyasaye nigo e kindgi. Nowacho ni jopuonjrene nie grube ariyo ma gin “kueth matin” kod “rombe mamoko,” to nowacho ni ne gidhi bedo “kueth achiel” e bwo “jakwath achiel.” (Luka 12:32; Joh. 10:16) Kata kamano, tudruok mantie e kind grube ariyogi, miyo wapenjore penjo moko: (1) Be ochuno ni joma nie grup mar rombe mamoko ong’e nyinge Jokristo duto mowal e kindegi? (2) Jokristo mowal onego obed gi paro mane kuomgi giwegi? (3) Onego ibed gi paro mane sama Jakristo moro e kanyaklau ochako chamo makate kendo madho divai e Rapar? (4) Be kwan joma chamo makate  kendo madho divai e Rapar ma siko ka medore onego ochand chunyi? We wanon ane dwoko mag penjogi.

BE OCHUNO NI NYAKA WANG’E NYINGE JOKRISTO DUTO MOWAL E KINDEGI?

3. Ang’o momiyo ok wanyal ng’eyo gadier ni gin ng’a gini ma biro bedo e kwan mar Jokristo 144,000 mowal?

3 Be ochuno ni nyaka joma nie grup mar rombe mamoko ong’e nyinge Jokristo duto mowal e kindegi? Ooyo. Nikech ang’o? Nikech kata ka po ni ng’ato oyudo luong mar dhi e polo, mano nyiso mana ni ogwele agwela, to ok nyis ni oseyudo pokno. Mano e momiyo Satan miyo “jonabi mag miriambo” obedie mondo “gimi ji olal, ma ka nyalore, to gimi kata mana jogo moyier olal.” (Mat. 24:24) Onge ng’at ma nyalo ng’eyo ka be Jakristo mowal biro yudo pokne mar dhi e polo, nyaka chop kinde ma Jehova ng’adoe bura ni ng’atno owinjore yudo michno. Jehova e ma nono ka Jakristono owinjore, kae to oketone alama mogik, samoro ka pok otho komakore kode kata ka “masira maduong’” pok ochakore. (Fwe. 2:10; 7:3, 14) Omiyo, nyalo bedo tich ma nono ka ng’ato ang’ata manie piny sani, temo nono ni en ng’a e kind jotich Nyasaye ma gikone biro bedo e kwan mar Jokristo 144,000 mowal. [1]

4. Ka ng’eyo nyinge Jokristo duto mowal manie piny e kindegi ok nyalre, kare ere kaka wanyalo ‘dhi’ kodgi?

4 Kapo ni en gima ok nyalre ng’eyo gadier chuth nyinge Jokristo duto ma gin Israel mar roho manie piny e kindegi, kare ere kaka rombe mamoko nyalo ‘dhi’ kodgi? Ne ane gima Zekaria nowacho e wi chwo apar. Nowacho ni chwo apargo ne dhi mako ‘riak law ng’a ma Ja-Yahudi ka giwacho, Wanadhi kodu, nikech wasewinjo ka Nyasaye ni kodu.’ Kata obedo ni iwuoyo e wi Ja-Yahudi achiel, ndikono wuoyo e wi ji mang’eny. Omiyo, Ja-Yahudi ma iwuoyo kuome e yor ranyisini, oriwo ji mang’eny to ok ng’at achiel! Kuom mano, ok ochuno ni nyaka wang’e ng’ato ka ng’ato ma ipimo gi Ja-Yahudi ni eka mondo wadhi kode. Kar mano, dwarore ni wang’egi ka gin kaka grup kae to wariwgi lwedo. Onge kamoro amora e Ndiko mijiwowae ni waluw dhano moro amora. Yesu e Jatendwa.—Mat. 23:10.

JOKRISTO MOWAL ONEGO OBED GI PARO MANE KUOMGI GIWEGI?

5. En siem mane ma Jokristo mowal onego opar matut, to nikech ang’o?

5 Joma chamo makate kendo madho divai e kinde Rapar onego opar matut ahinya siem ma yudore e 1 Jo-Korintho 11:27-29. (Som.) En wach mane ma Paulo wacho e ndikono? Jakristo mowal ne nyalo chamo makate kendo madho divai e yo ma ok owinjore kapo ni ok orito winjruok maber e kinde gi Jehova. (Hib. 6:4-6; 10:26-29) Siemno paro ne Jokristo mowal mondo ging’e ni pok giyudo pok margi. Dwarore ni gidhi nyime nyagore matek ka gichomo wang’gi kuom “michno man malo ma Nyasaye [oseluongogie] kokalo kuom Kristo Yesu.”—Fil. 3:13-16.

6. Jokristo mowal onego obed gi paro mane kuomgi giwegi?

6 Ka notel ne Paulo gi roho maler, nosayo Jokristo mowal ni ‘giwuoth mowinjore gi luong ma noluonggigo.’ Ere kaka ginyalo timo mano? Paulo dhi nyime wacho ni gitim mano ‘ka ginyiso bolruok gi muolo chuth kod horuok, ka ginano e kindgi kuom hera, ka gitemo matek mondo girit winjruok achiel ma roho miyogi e kuwe ma tueyogi kanyachiel.’ (Efe. 4:1-3) Roho mar Jehova jiwoga bolruok to ok sunga.  (Kol. 3:12) Jokristo mowal yie ka gibolore ni bedo ni owalgi ok nyis ni koro gin gi roho maler mang’eny moloyo Jokristo wetegi ma nigi geno mar dak e piny. Ok gine ni giwinjo tiend adiera mag Muma e yo matut moloyo Jokristo mamoko kendo ok giting’re malo e yo moro amora. E wi mano, ok onego gibukre wacho ne jomoko ni ochak chamo makate kendo madho divai ka ginyisogi ni owalgi. Mopogore gi mano, onego gibolre ka ging’eyo ni Jehova e ma gweloga Jokristo mowal.

7, 8. En ang’o ma Jokristo mowal ok onego otim to nikech ang’o?

7 Kata obedo ni en thuolo makende bedo ng’at mogwel mondo odhi e polo, Jokristo mowal ok gomb ni jomoko omigi duong’ e yo makende. (Efe. 1:18, 19; som Jo-Filipi 2:2, 3.) Roho mar Jehova nochiwonegi neno gin giwegi. Ne ok oland ne ji wachno e piny mangima ni owalgi. Omiyo, ok kawgi gi wuoro ka jomoko ok yie mapiyo ni owalgi gi roho maler. Ging’eyo ni Ndiko kwerowa ni kik wayie mapiyo gi ng’ato ma wacho ni Nyasaye oyiere ne migawo moro makende. (Fwe. 2:2) Kuom mano, bedo ni owalgi ok migi ratiro mar nyiso joma gikwongo romogo ni owalgi. Thothne, ok gibi mulo wachno ne jomoko mondo kik ginyisre e nyim jomoko ka gima gisungore nikech pokgi ma kinde mabiro.—1 Kor. 1:28, 29; som 1 Jo-Korintho 4:6-8.

8 E wi mano, Jokristo mowal ok kawre ni gin e grup moro makende kendo ni gipogore gi jomamoko. Ok gimany joma bende nigi geno ma chal gi margi, ka gin gi paro mar mako kodgi osiep kata loso grup ma margi giwegi mar puonjruok Muma. (Gal. 1:15-17) Timbe ma kamago nyalo kelo pogruok e kanyakla kendo kwedo roho maler ma miyo kuwe kod winjruok obedie.—Som Jo-Rumi 16:17, 18.

ONEGO IBED GI PARO MANE?

9. Ang’o momiyo dwarore ni wabed motang’ kaluwore gi paro ma wan-go kuom joma chamo makate kendo madho divai e Rapar? (Ne sula ma wiye wacho ni “‘ Hera Ok Tim Timbe ma Ok Nyis Luor.’”)

9 Onego ibed gi paro mane sama Jakristo moro ochako chamo makate kendo madho divai e Rapar? Yesu nonyiso jopuonjrene kama: “Uduto un owete.” Ne odhi nyime wacho kama: “Ng’at ma ng’awore malo owuon noduoke piny to ng’at ma duokore piny owuon nong’awe malo.” (Mat. 23:8-12) Kuom mano, ok owinjore ng’awo ng’ato e wi jowadgi mana nikech en Jakristo mowal. Muma wuoyo e wi jodong-kanyakla kojiwowa mondo waluw yie mag joma tayowa, to ok ochikwa ni wang’aw kata kawo dhano moro amora kaka jatendwa. (Hib. 13:7) En adier ni Muma wuoyo e wi jomoko kowachonwa ni gin “joma onego omi luor nyadiriyo.” Kata kamano, joma kamago owinjore omi luor nyadiriyo nikech ‘gitayowa e yo mowinjore’ kendo ‘gitiyo matek e wuoyo gi puonjo,’ to ok nikech owalgi. (1 Tim. 5:17) Kuom mano, Jokristo mowal biro bedo gi wich kuot maduong’ ka po ni jomoko miyogi duong’ kod luor mokalo tong’. To marachie moloyo, ka po ni odhial Jokristo mowalgo, to ginyalo yudo ka bedo gi kido mar bolruok teknegi. (Rumi 12:3) Ng’ato ang’ata kuomwa ok diher mondo achiel kuom owete Kristo mowalgi ochwanyre!—Luka 17:2.

Onego ibed gi paro mane e wi ng’at ma chamo makate kendo madho divai e Rapar? (Ne paragraf mar 9-11)

10. Ere kaka wanyalo chiwo luor ne Jokristo mowal?

10 Ere kaka wanyalo nyiso luor mowinjore ne joma Jehova owalo? Ok dibed maber penjogi penjo motudore gi kaka ne owalgi. Omiyo, onego watang’ mondo kik wadonjre e weche jomoko ma ok otudore kodwa. (1 The. 4:11; 2 The. 3:11) Ok onego wapar ni janyuol Jakristo mowalno, jaode,  kata watne moro bende ibiro wal. Keny kata wat ok otudore kata matin gi wach walo ng’ato. (1 The. 2:12) Bende, onego watem thiro gombo mar nono kaka jaod ng’at mowalno winjo e chunye bedo ni ok obi dak gi jaode e Paradiso e piny e kinde mabiro. Kar penjo penjo ma nyalo kelo lit e chuny ng’ato, onego wabed gadier chuth ni Jehova biro yawo lwete kendo ‘yieng’o gik mangima duto kaka gidwaro.’—Zab. 145:16.

11. En obadho mane ma ok bi yudowa ka wamiyo Jokristo mowal luor mowinjore?

11 Joma nyiso Jokristo mowal luor mowinjore geng’o obadho moro ma nyalo yudogi mos mos. Ndiko nyisowa ni “owete moko ma wuondore” nyalo donjo e kanyakla. (Gal. 2:4, 5; 1 Joh. 2:19) Joma chalo kamago nyalo kata wacho ni owalgi. E wi mano, Jokristo moko mowal nyalo weyo yie. (Mat. 25:10-12; 2 Pet. 2:20, 21) Ka watang’ ne obadho mar dewo wang’ ji, jogo ok bi miyo wawe adiera; kendo yiewa ok bi dok chien ka Jakristo mong’ere kata mosechung’ motegno kuom kinde malach oweyo tiyo ne Nyasaye.

BE KWAN JOMA CHAMO MAKATE KENDO MADHO DIVAI ONEGO OCHAND CHUNYI?

12, 13. Ang’o momiyo kwan joma chamo makate kendo madho divai e Rapar ok onego ochand chunywa?

12 Kuom higni matin mosekalo, waseneno ka kwan joma chamo makate kendo madho divai e Rapar mar tho Kristo siko medore ameda. Medruokno osebedo kopogore ahinya gi kwan ma nosebedo ka dok chien higni pieche mokalo. Be medruokno onego ochand chunywa? Ooyo. We wane ane weche moko madongo monego waket e paro.

13 “Jehova ong’eyo joma gin joge.” (2 Tim. 2:19) Joma kwanoga joma obiro e Rapar, ok nyal ng’ado bura gadier ni en ng’awa ma nigi geno mar dhi e polo. Kwan mar joma chamo makate kendo madho divai oriwo kwan mar joma paro apara e yo ma ok owinjore ni owalgi. Moko kuom joma ne chamoga makate kendo madho divai e Rapar tinde oseweyo timo kamano. Nyalo bedo ni nitie jomoko ma tuoche ma chocho obwongo kod parruok mokalo tong’ nowilo pachgi ma gichako paro ni gibiro locho gi Kristo e polo. Omiyo, kwan mar joma chamo makate kendo madho divai ok  nyis kwan makare mar joma owal ma pod odong’ e piny.

14. Ang’o ma Muma wacho e wi kwan joma owal ma dhi bedo e piny ka masira maduong’ chakore?

14 Joma owal biro betie kuonde mang’eny e piny kinde ma Yesu nobie mondo ochokgi koterogi e polo. Muma wuoyo e wi kindego kowacho kama e wi Yesu: “Eka obiro oro malaikene gi dwol maduong’ mar turmbeta kendo ginichok joge moyier kanyachiel ka giwuok e tunge ang’wen mag piny, a e tung’ polo konchiel nyaka e tung’ machielo.” (Mat. 24:31) Muma wacho adimba ni mana Jokristo mowal manok e ma ne dhi bedoe e piny e ndalo mag giko. (Fwe. 12:17) Kata kamano, Muma ok wachi ni gin ji adi ma biro yudo ka pod nitie e kinde ma masira maduong’ chakore.

15, 16. En wach mane monego wang’e e wi Jokristo 144,000 ma Jehova oyiero?

15 Jehova e ma yiero kinde ma owale ng’ato. (Rumi 8:28-30) Jehova nochako yiero Jokristo mowal bang’ tho kod chier Yesu, kendo nenore ni Jokristo duto ma nokwongo betie ne owal. Chakre kinde Jokristo mokwongogo nyaka chop chakruok mar ndalo giko, thoth joma ne wuondore ni luwo Kristo ne gin Jokristo mag miriambo kendo Yesu nopimogi gi “ogolo.” Kata en kamano, Jehova nodhi nyime walo joma nomakore kode e kindeno duto, kendo jogo nonyiso gadiera ni gin “ngano” ma Yesu nowuoyoe. (Mat. 13:24-30) E ndalo mag giko, Jehova osebedo ka dhi nyime yiero joma biro bedo e kwan mar Jokristo mowal 144,000. [2] Ka po ni oyiero mar rito nyaka ndalo mag giko odhi ka rumo e ka omi jomoko thuolo makendeno, wan to wan ng’a gini ma dwakwed riekone? (Isa. 45:9; Dan. 4:35; som Jo-Rumi 9:11, 16.) [3] Onego watang’ mondo kik wabed ka jotich ma ne ong’ur ka ok gimor gi gima ruodhgi notimo ne jotich ma nochako tiyo sa 11.—Som Mathayo 20:8-15.

16 Ok ji duto ma nigi geno mar dhi e polo nie grup mar “jatich mogen kendo mariek.(Mat. 24:45-47) Mana kaka e kinde Jokristo mokwongo, Jehova gi Yesu pidho ji mang’eny e kindegi ka gitiyo mana gi joma nok. Gin mana Jokristo manok kende mowal ma notigo e ndiko Ndiko mag Dho-Grik. Kamano bende e kindegi, gin mana Jokristo mowal manok e ma omi migawo mar chiwo ‘chiemb’ chuny “e kinde mowinjore.”

17. En ang’o mipuonjori e sulani?

17 Ang’o ma wasepuonjore e sulani? Jehova oyiero mar miyo jotichne pok ariyo mopogore: Jokristo mowal mipimo gi Ja-Yahudi e ndiko mar Zekaria biro yudo pok mar dak e polo, to Jokristo ma gin rombe mamoko mipimo gi ji apar e ndiko achielno biro yudo pok mar dak e piny. To pod gima Jehova dwaro en ni joma ogwel obi odhi e polo kod joma nigi geno mar dak e piny, oluw chike ma chal momiyogi. Giduto nyaka gisik ka gibolore. Giduto nyaka giti ne Nyasaye ka giriwore kanyachiel. Giduto nyaka gine ni nitie kuwe e kanyakla kendo rito kuweno. Kaka ndalo mag giko medo rumo, weuru waduto wang’ad mar dhi nyime tiyo kaka kueth achiel manie bwo Kristo.

^ [1] (paragraf mar 3) Zaburi 87:5, 6 nyiso ni nyalo bedo ni e kinde ma biro nying ji duto ma noloch gi Yesu e polo biro ng’ere.—Rumi 8:19.

^ [2] (paragraf mar 15) Kata obedo ni Tich Joote 2:33 nyiso ni ichiwo roho maler kokalo kuom Yesu, Jehova e ma yiero ni ng’ano monego owal gi rohoneno.

^ [3] (paragraf mar 15) Mondo iyud weche momedore, ne “Maswali Kutoka kwa Wasomaji” e gaset mar Mnara wa Mlinzi ma Mei 1, 2007, ite mar 30-31.