Kal idhi e weche manie iye

Kal idhi kama ochanie weche mantie

Rawar e mich maberie moloyo ma Nyasaye osemiyo dhano nikech omiyowa geno mar dak nyaka chieng’

 WACH MADUONG’ MA GASET WUOYOE | EN MICH MANE MABERIE MOLOYO?

En Mich Mane Maberie Moloyo?

En Mich Mane Maberie Moloyo?

“Mich mabeyo duto gi chiwo malong’o duto a malo. Gilor piny ka giwuok kuom Wuonwa ma wuon gik ma chiwo ler manie polo.” (Jakobo 1:17) Ndikono nyiso maler kaka Jehova Wuonwa en Nyasaye ma jachiwo. Kuom mich duto ma Nyasaye osemiyo dhano, nitie achiel maduong’ moloyogi duto. Michno en mane? Yesu nowacho weche mong’ere ahinya ma yudore e Johana 3:16 ma wacho niya: “Nimar Nyasaye nohero piny ahinya mi nochiwo Wuode ma miderma, mondo ng’ato ang’ata ma nyiso yie kuome kik keth, to obed gi ngima ma nyaka chieng’.”

Nyasaye nochiwonwa wuode achiel kende mohero. Mano e mich maberie moloyo ma ng’ato ang’ata kuomwa noyudo nikech kokalo kuom michno, inyalo gonywa kuom tuech mar richo, bedo moti, kod tho. (Zaburi 51:5; Johana 8:34) Onge gimoro amora ma dhano ne nyalo timo mondo giwuog e tuejno kata ne gitem matek machalo nade. Kata kamano, nikech Nyasaye noherowa, nochiwo gima ne nyalo konyowa mondo wawuog e tuejno. Jehova Nyasaye nomiyo dhano duto ma winje geno mar dak nyaka chieng’ ka nochiwo wuode achiel kende ma Yesu Kristo mondo obed rawar. Kata kamano, rawar en ang’o? Ang’o momiyo rawar dwarore? To ere kaka onyalo konyowa?

Rawar en gima ng’ato chulo mondo oyud gima nolal kata mondo ogonygo ng’at motue. Muma wacho ni jonyuolwa mokwongo ma gin Adam gi Hawa nochue ka gionge richo moro amora. Nonego gidag nyaka chieng’ e paradiso ka gimor kaachiel gi nyithindgi ma ne gidhi nyuolo bang’e. (Chakruok 1:26-28) Gima lit en ni ne gilalo mago duto ka ne giyiero mar ng’anyo ne Nyasaye ma gibedo joricho. Mano nokelo ang’o? Muma wacho niya: “Richo nodonjo e piny kokalo kuom ng’ato achiel, kendo tho nobiro kokalo kuom richo, tho nolandore kuom ji duto nikech giduto ne gisetimo richo.” (Jo-Rumi 5:12) Kar nyuolo nyithindo ma dak nyaka chieng’, Adam nonyuolo nyithindo ma joricho ma koro ne nyalo tho.

Mondo rawar ochul gima oselal, nyaka obed marom gi gima nolalno. Ka ne Adam oketho chik Nyasaye goyiem, notimo richo, to mano nomiyo olalo ngimane makare. Muma wacho ni mano nomiyo nyithind Adam duto obedo e bwo tuech mar richo kod tho. Omiyo, mondo ne gony dhano e tuejno, Nyasaye nochiwo ngima machielo makare mar Yesu mondo obed misango. (Jo-Rumi 5:19; Jo-Efeso 1:7) Nikech Nyasaye nohero dhano ahinya, nochiwo rawar mondo dhano obi oyud gima Adam gi Hawa nolalo, ma en dak nyaka chieng’ e paradiso e piny ka.​—Fweny 21:3-5.

Onge kiawa ni rawar e mich maberie moloyo ma Nyasaye osemiyo dhano nikech omiyowa geno mar dak nyaka chieng’. Mondo wane kaka rawar en mich maber moloyo, wanon ane yore moko ma ochopogo gik mamiyo mich bedo maber mana kaka ne waseneno e sula mokalo.

Ochopo gombowa. Dhano gombo ahinya dak nyaka chieng’. (Eklesiastes 3:11) Kata obedo ni wan wawegi waonge gi teko mar chopo gombono,  rawar miyo wanyalo dak nyaka chieng’. Muma wacho niya: “Misach richo en tho, to mich ma Nyasaye chiwo en ngima ma nyaka chieng’ kokalo kuom Kristo Yesu Ruodhwa.”​—Jo-Rumi 6:23.

Ochoponwa gima wadwaro gadier. Dhano ne ok nyal chiwo rawar. Muma wacho kama: “Yor waro dhano tek sidang’, ma onge nengo ma dichul marom.” (Zaburi 49:8, Luo New Testament, 2003) Kuom mano, ne wadiwo kendo Nyasaye kende e ma ne nyalo gonyowa e tuech mar richo kod tho. Kata kamano, “kokalo kuom rawar ma Kristo Yesu nochulo,” Nyasaye nochiwonwa mana gima ne wadwaro gadier.​—Jo-Rumi 3:23, 24.

Nochiwe e kinde mowinjore. Muma wacho niya: “Kane pod wan joricho, Kristo ne othonwa.” (Jo-Rumi 5:8) Nikech Nyasaye nochiwo rawar “kane pod wan joricho,” mano nyiso hera moherowago kata obedo ni wan dhano morem. Kata bed ni gie sani wadak e ngima matek nikech richo, rawar miyo wabedo gi geno.

Gimomiyo nochiw rawar. Muma nyisowa gimomiyo Nyasaye nochiwo Wuode kaka rawar kowacho kama: “Hera ma Nyasaye oherowago ne onenore ayanga, ni Nyasaye nooro Wuode ma miderma e piny mondo wayud ngima kokalo kuome. Herano en kama: ok ni wan e ma wasehero Nyasaye, to Nyasaye e ma noherowa.”​—1 Johana 4:9, 10.

Inyalo nyiso nade ni igoyo erokamano nikech misango ma Nyasaye nochiwonwa? Yesu nowacho e Johana 3:16 ni joma “nyiso yie” kuome e ma ibiro resi. Muma wacho ni yie en “bedo gadier chuth kuom gik migeno.” (Jo-Hibrania 11:1) Puonjruok Muma e yo malong’o e ma konyowa bedo gadier ma kamano. Kuom mano, wajiwi mondo ipuonjri e wi Jehova Nyasaye ma nochiwonwa mich maberie moloyo. E wi mano, puonjri mondo ing’e gima inyalo timo mondo idag nyaka chieng’. Ngimano wabiro yudo nikech misango mar Yesu Kristo.

Inyalo puonjori gima Muma wacho kuom wechego ka idhi e websaitwa mar www.jw.org/luo. Joneno mag Jehova oikore konyi. Wageno ni kaka imedo puonjori e wi mich maberie moloyo ma Nyasaye osemiyowani, in bende ibiro mor ma iwach niya: “Agoyo erokamano ne Nyasaye kokalo kuom Yesu Kristo Ruodhwa!”​—Jo-Rumi 7:25.