Kal idhi e weche manie iye

Kal idhi kama ochanie weche mantie

Weche ma Nokor e Muma Mosetimore

Weche ma Nokor e Muma Mosetimore

E sula mokalo, ne wawuoyo e wi Croesus ma ne jadolo ma Delphi owuondo, mi ruodh Persia oloye e lweny. Muma to oting’o weche moko ma ne okor e wi ruodh Persia kendo wechego duto ne ochopo kare.

Higni 200 ka pok nonyuol Kuros, janabi Isaya nokoro ni Ruoth Kuros e ma ne dhi monjo Babilon kendo nokoro kaka mano ne dhi timore.

Isaiah 44:24, 27, 28: “Jehova jawarni . . . owacho . . . ni nam matut, Duon aduona, mi anaduon aore ma ingo: Mawacho kuom Kuros ni en e jakwadha, mi notim gik moko duto madwaro: Kata wacho kuom Yerusalem ni, Nogere; kuom hekalu to, Noket mise mari.”

Jahistori moro ma Ja-Greece miluongo ni Herodotus nowacho ni jolweny mag Kuros nobaro pige mag Aora Efrati ma ne mol e taon mar Babilon. Rieko ma Kuros notiyogono nomiyo jolwenyne odonjo Babilon. Bang’ loyo Babilon, Kuros ne ogonyo Jo-Yahudi ma ne oter e tuech e pinyno ma omiyogi thuolo mar dok thurgi mondo giger Jerusalem ma ne osebedo gunda kuom higni 70.

Isaiah 45:1: “Jehova owacho ni Kuros, ng’ate mowal, ma luete marachwich asemako, mondo olo ogendini e nyime, kendo anami ruodhi obedi ka giluor; kendo yawo dho udi e nyime, kendo dhorangeye ok nolor.”

Jo-Persia ne odonjo Babilon gi rangach maduong’ ma ne giyudo koyawore ayawa fwaya. Ka dine bed ni Jo-Babilon ong’eyo gima Kuros ne dwaro timo, dine giloro dhorangeye ma nochomore gi aora. Kata kamano, koro ne onge gima ne ginyalo timo.

Ma en achiel kuom weche mathoth ma ne okor e Muma ma ne otimore. * Mopogore gi weche mag dhano ma koro wach e lo nyisechegi mag miriambo, weche ma okor e Muma wuok kuom Nyasaye “manyiso ji ka wach moro ochako timore kaka obiro bet achien,” kendo ma ‘koro weche ma pok otimore.’—Isaiah 46:10.

Mana Nyasaye madier kende ma nyinge Jehova e ma nyalo koro weche ma timre. Tiend nyinge en ni “Omiyo Gima Odwaro Timore.” Mano nyiso ni en gi nyalo mar ng’eyo gik ma biro timore, kendo chiko gigo mondo otimre ka luwore gi dwache. Mano jiwowa ni obiro timo gi moko duto ma osingo.

 WECHE MA NOKOR MA TIMORE E KINDEGI

Donge diher ng’eyo weche ma nokor e Muma ma timore e kindewagi? Higni 2,000 mosekalo, Muma ne okoro ni “kinde matek ahinya” ne dhi bedo “e ndalo mag giko.” En ndalo giko mar ang’o? Ok en giko mar pinywani kata mar dhano, kar mano, en giko mar mahundu kod chandruok ma dhano osebedo ka yudo kuom higni gana gi gana. Ne ane weche moko ma nokor ma nyiso ni wadak “e ndalo mag giko.”

2 Timotheo 3:1-5: “E ndalo mag giko . . . ji nobed joma oherore giwegi, joma ohero pesa, joma pakore, jong’ayi, jo achaya, joma ok winj jonyuolgi, joma ok go erokamano, joma ok makre chuth gi jomamoko, joma onge hera, joma ok oikore loso winjruok moro amora, joketh nying ji, joma onge ritruok, joma ger, joma ok ohero gik mabeyo, jo andhoga, joma wigi tek, joma opong’ gi sunga, joma ohero mor mag piny kar hero Nyasaye, joma nenore gi oko ni gin joma oluoro Nyasaye to gitamore yie mondo tekone ochik ngimagi.”

Donge in bende ineno ka timbe ma kamago sani omedore ahinya? Donge isefwenyo ni ji tinde oherore mana giwegi, gihero pesa, kendo gin jong’ayi? Donge iseneno ni tinde ji dwaro gik moko githwon kendo ok giikore loso winjruok gi ng’ato ang’ata? Donge nyithindo mang’eny tinde ochayo jonyuolgi kendo ji mathoth ohero mor mag pinyni kar hero Nyasaye? To gik moko medo mana bedo maricho pile ka pile.

Mathayo 24:6, 7: “Unuwinj lwenje kod humb lwenje. . . . Oganda noked gi oganda kendo pinyruoth noked gi pinyruoth.”

Ka luwore gi nonro moko, joma osetho e lweny chakre higa mar 1914 okalo milion 100. Mano ohingo kwan mag ji ma yudore e pinje mang’eny. Parie kaka mano osekelo ne ji kuyo, ywak, kod chandruok mathoth! Be ogendni osefwenyo wachno ma giwere gi weche lweny?

Mathayo 24:7: “Chiemo nobed manok.”

Riwruok mar World Food Programme nowacho niya: “Pinywani nyago chiemo moromo pidho ji te, to e ma ji milion 815 pod nindoga kech otieno kotieno. Mano nyiso ni ng’ato achiel kuom ji ochiko nindoga hach-hach. To marachie moloyo en ni ng’ato achiel kuom ji adek bedoga gi tuoche ma yudo ji nikech koso chiemo moromo.” Wachore ni nyithindo ma dirom milion adek thoga higa ka higa nikech kech.

Luka 21:11: “Yiengni madongo mag piny nobedie.”

Higa ka higa, yiengni mag piny ma romo 50,000 timore e okang’ ma dhano nyalo fwenyo. Chiegni ni yiengni 100 mag piny kethoga udi, kendo higa ka higa nyaka iwinjie ni piny noyiengni matek e alwora moro. Ka luwore gi nonro moro, ji ma romo 471,000 notho e kind higa mar 1975 kod 2000 nikech yiengni mar piny.

Mathayo 24:14: “Wach maber mar Pinyruothni ibiro yal e piny mangima mondo ochiw neno ne ogendni duto, eka giko nobi.”

Joneno mag Jehova ma sani romo milion aboro gi wiye osebedo ka lando wach maber mar Pinyruodh Nyasaye kendo chiwo neno e pinje ma dirom 240. Gitimo mano e taonde madongo kod matindo, e gwenge mosokore kod mier ma ni e wi gode, kendo e bunge nyaka e thim iye iye. Chieng’ ma Nyasaye nowach ni tijno koro orumo, “giko nobi.” Mano biro nyiso ang’o? Mano nyiso ni loje mag dhano biro chopo e gikogi kendo koro Pinyruodh Nyasaye e ma biro locho. Gin gik mage ma osingnwa ma Pinyruodh Nyasaye biro timonwa? Dhi nyime somo mondo ine.