Kal idhi e weche manie iye

Kal idhi kama ochanie weche mantie

Ang’o ma Nyasaye Biro Timo?

Ang’o ma Nyasaye Biro Timo?

Sama in gi chandruok moro, inyalo geno ni osiepni moro ma dewi biro konyi. Nitie joma wacho ni Nyasaye ok en osiep maber nikech giparo ni onge gimoro amora motimo mondo okonygi. Adiera en ni nitie gik mang’eny ma Nyasaye osetimo mondo okonywa. E wi mano, Nyasaye biro kawo okang’ mondo otiek chandruok duto ma yudowa sani. En ang’o mobiro timo?

OBIRO TIEKO GIK MARICHO KOD JOMA RICHO DUTO

Nyasaye biro tieko gik maricho duto kuom golo ng’at ma miyo gigo timore. Muma nyisowa ng’at ma miyo gik maricho timore kowacho kama: “Piny duto ni e bwo teko mar Ng’at Marach.” (1 Johana 5:19) “Ng’at Marach” ma iwuoyo kuome e ndikono e ng’at ma Yesu noluongo ni “jaloch mar pinyni,” Satan Jachien. (Johana 12:31) Yo ma Satan chikogo joma ok oluoro Nyasaye e ma miyo gik maricho bedo mang’eny e piny. Ang’o ma Nyasaye biro timo?

Machiegnini, Jehova Nyasaye biro tiyo gi Yesu Kristo Wuode mondo “otiek chuth jal ma nigi nyalo mar kelo tho, tiende ni Jachien.” (Jo-Hibrania 2:14; 1 Johana 3:8) Kuom adier, Muma wacho ni Jachien be ong’eyo ni “odong’ mana gi kinde manok” to itieke. (Fweny 12:12) Nyasaye biro tieko bende ji duto ma miyo gik maricho timore.​—Zaburi 37:9; Ngeche 2:22.

OBIRO LOSO PINYNI OBED PARADISO

Bang’ ka Jachuechwa osetieko gik maricho kod joma timo gik maricho, obiro timo dwache mar miyo dhano ngima ma nyaka chieng’ e paradiso e piny ka. Weche biro bedo nade e kindeno?

Kue mosiko ma onge gik ma kelo luoro. “Jo mamuol ginicham piny; kendo ginimor moloyo kuom kwe mang’eny.”​—Zaburi 37:11.

Chiemo modhuro ma loso del. “[Cham] nobedi mang’eny e piny e wi gode madongo.”​—Zaburi 72:16.

Udi mabeyo kod tije ma nigi nyak. “Giniger udi, ginidagie; ginipidh puothe mag muzabibu, ginicham olembgi. . . . Jogo mayiedho nomor gi tich luetegi ndalo mang’eny.”​—Isaiah 65:21, 22.

Be igombo ngima ma kamano? Kiny-kiny kae, ngima biro chalo kamano pile ka pile.

OBIRO TIEKO TUOCHE KOD THO

Ji duto yudo lit nikech tuoche kod tho. Kata kamano, weche chiegni lokore. Nikech misango ma Yesu nochiwo, Nyasaye biro neno ni ‘ng’ato ang’ata ma nyiso yie kuom [Yesu] ok oketh, to obed gi ngima ma nyaka chieng’.’ (Johana 3:16) Mano biro kelo ber mage?

Tuoche ibiro gol chuth. “Onge ng’at . . . ma nowach ni otuo, kendo richo mag ji . . . nong’wonnigi.”​—Isaiah 33:24The Bible in Luo, 1976.

Tho ok nokel ne dhano lit kendo. “[Obiro golo] tho nyaka chieng’, kendo Ruoth Nyasaye noyue piwang’ kuom wenge duto.”​—Isaiah 25:8.

Ji nodag nyaka chieng’. “Mich ma Nyasaye chiwo en ngima ma nyaka chieng’ kokalo kuom Kristo Yesu Ruodhwa.”​—Jo-Rumi 6:23.

Jomotho biro bedo mangima kendo. “Chier nobedie mar joma kare gi joma ok kare.” (Tich Joote 24:15) Joma ochier biro yudo ber ma misango mar Yesu kelo.

Nyasaye biro timo gigi duto e yo mane?

 OBIRO KELO LOCH MA KARE CHUTH

Nyasaye biro timo dwache ne dhano kod piny kotiyo gi loch moseloso e polo kendo moseketo e lwet Yesu Kristo. (Zaburi 110:1, 2) En e loch kata pinyruoth ma Yesu nopuonjo jolupne mondo okwa niya: “Wuonwa manie polo, . . . Pinyruodhi mondo obi.”​—Mathayo 6:9, 10.

Pinyruodh Nyasaye biro locho e wi piny duto kendo obiro golo chandruok duto. Pinyruodhno e sirkal maber mogik ma dhano nyalo bedogo! Mano e momiyo Yesu notimo kinda e yalo “wach maber mar Pinyruoth” e kinde ma ne en e piny ka, kendo nojiwo jopuonjrene mondo gin be gitim kamano.​—Mathayo 4:23; 24:14.

Nikech Jehova Nyasaye ohero dhano, osingo ni obiro timonegi gik mabeyogo duto. Donge ng’eyo mano miyo idwaro ng’eye maber kendo sudo machiegni kode? Ka iyiero timo kamano, ibiro yudo ber mage? Sula ma luwo chiwo dwoko.

ANG’O MA NYASAYE BIRO TIMO? Nyasaye biro tieko tuoche kod tho, obiro keto Pinyruodhe mondo oloch e wi dhano duto, kendo obiro loso pinyni obed paradiso