Kal idhi e weche manie iye

Kal idhi kama ochanie weche mantie

 SULA MAR PUONJRUOK 40

Bed Modich e Tij Nyasaye e ‘Ndalo mag Gikogi’

Bed Modich e Tij Nyasaye e ‘Ndalo mag Gikogi’

“Chung’uru motegno ma ok uyiengni, ka kinde duto ubedo modich e tij Ruodhwa.”​—1 KOR. 15:58.

WER 58 Manyo Joma Ohero Kuwe

GIMA SULANI WUOYE *

1. Ang’o momiyo wan gadier chuth ni wadak e “ndalo mag giko”?

NONYUOLI higa mane? Ka po ni nonyuoli bang’ higa mar 1914, ng’e ni isebedo kidak e “ndalo mag giko” e ngimani duto. (2 Tim. 3:1) Waduto wasewinjo gik ma Yesu nowacho ni ne dhi timore e ndalo mag giko. Gigo oriwo lwenje, kech, yiengni piny, tuoche, medruok mar joketh chik, kod sand misandogo jo Nyasaye. (Mat. 24:3, 7-9, 12; Luka 21:10-12) Waseneno bende ka kit ji lokore mana kaka jaote Paulo nokoro. (Ne sanduk ma wiye wacho ni, “ Kaka Kit Ji Chalo e Kindewagi.”) Wan gadier chuth ni wadak e ndalo mag giko.​—Mika 4:1.

2. Gin penjo mage ma ber ka wayudo dwokogi?

2 Kinde malach osekalo chakre higa mar 1914; omiyo, sani wadak e giko mar “ndalo mag giko.” Nikech mano, ber ka wayudo dwoko mag penjo madongo ma luwogi: Ang’o ma biro timore e giko mar “ndalo mag giko”? Ang’o ma Jehova dwaro ni watim sani nyaka chop kindeno?

ANG’O MA BIRO TIMORE E GIKO MAR “NDALO MAG GIKO”?

3. Ka luwore gi weche mokor e 1 Jo-Thesalonika 5:1-3, en ang’o ma joloch mag pinyni biro lando?

3 Som 1 Jo-Thesalonika 5:1-3. Paulo nowuoyo kuom “odiechieng’ mar Jehova.” E ndikoni, oti gi wechego kiwuoyo kuom kinde mibiro kethie “Babilon Maduong’” nyaka e lweny mar Har–Magedon. (Fwe. 16:14, 16; 17:5) Kodong’ matin to odiechieng’no chakore, joloch mag pinyni biro lando ni “kuwe nitie kendo weche beyo!” Joloch  mag pinyni seche moko tiyoga gi weche ma chalo kamago sama giwuoyo kuom kue ma giloso e kind pinje ma kedo. * Kata kamano, lendo mar “kuwe nitie kendo weche beyo” ma Muma wuoye to opogore. Nikech ang’o? Sama gibiro lande, ji biro paro ni joloch mag pinyni osekelo kue e piny mangima. To adiera en ni “masira maduong’” biro chakore, kae to “kethruok ma apoya” nobinegi.​—Mat. 24:21.

Kik wuondi sama joloch mag piny biro lando ni “kuwe nitie kendo weche beyo” (Ne paragraf mar 3-6) *

4. (a) Gin ang’o ma ok wang’eyo e wi lendo mar “kuwe nitie kendo weche beyo”? (b) En ang’o ma wang’eyo e wi lendono?

4 Nitie gik ma wang’eyo e wi lendo mibiro land ni “kuwe nitie kendo weche beyo.” Kata kamano, nitie moko ma wakia. Ok wang’eyo gik ma biro miyo joloch mag pinyni oland lendono kod kaka gibiro lande. Bende, ok wang’eyo ka be gibiro lando wach moro maduong’ dichiel koso gibiro lande kidam-kidam. Bed ni gibiro lande nade kata nikech ang’o, gima onego wang’e en ma: Lendono ok onego owuondwa mi wapar ni joloch mag pinyni nyalo kelo kue. Kar mano, lendono onego oyaw wang’wa ni koro “odiechieng’ mar Jehova” ochopo!

5. Ndiko mar 1 Jo-Thesalonika 5:4-6 konyowa nade ikore ne “odiechieng’ mar Jehova”?

5 Som 1 Jo-Thesalonika 5:4-6. Weche ma Paulo nowachogo nyisowa kaka wanyalo ikore ne “odiechieng’ mar Jehova.” Ok onego “wanind kaka jomamoko timo.” Nyaka “wasik ka waneno” kendo wabed motang’. Kuom ranyisi, nyaka watang’ mondo kik wariw weche siasa mag pinyni lwedo. Ka po ni wadonjore e weche siasa, wabiro bedo “mag piny.” (Joh. 15:19) Wang’eyo ni Pinyruodh Nyasaye kende e ma biro kelo kue mosiko e piny mangima.

6. Dwaher konyo ji mondo gitim ang’o, to nikech ang’o?

6 Mopogore gi siko ka waneno, onego wachiew joma pod nindo kuom nyisogi gik ma Muma nokoro ni ne dhi timore e ndalo mag giko. Ber ng’eyo ni ka masira maduong’ osechakore, thuolo momi ji mar lokore mondo giti ne Jehova biro yudo koserumo. Mano e momiyo onego walend sani gi kinda! *

DHI NYIME BEDO MODICH E TIJ LENDO

Sama walendo, wanyiso ji ni Pinyruodh Nyasaye kende e ma biro kelo kue mosiko e piny (Ne paragraf mar 7-9)

7. Ang’o ma Jehova dwaro ni watim e kindegi?

7 Jehova dwaro ni wabed modich e tij lendo e thuolo matin ma wadong’go ka odiechienge pok ochopo. Onego watem matek mondo ‘kinde duto wabed modich e tij Ruodhwa.’ (1 Kor. 15:58) Yesu nowacho motelo tich ma jolupne ne dhi timo.  Ka ne owuoyo e wi gik madongo ma ne dhi timore e ndalo mag giko, nomedo niya: “Bende, ei ogendni duto, wach maber nyaka kwong yal.” (Mar. 13:4, 8, 10; Mat. 24:14) Parie ni sa asaya ma idhi e tij lendo, in bende itimo tich maduong’ ma Yesu nowachono!

8. Gin dongruok mage ma waseneno ka timore e tij yalo wach maber?

8 Gin dongruok mage ma waseneno ka timore e tij yalo wach maber? Higa ka higa, kwan mar joma rwako wach maber siko ka medore. Kuom ranyisi, par ane kaka kwan mar jolendo osebedo ka medore e piny mangima e ndalo mag gikogi. E higa mar 1914, ne nitie mana jolendo 5,155 e pinje 43. Sani to nitie jolendo ma dirom milion 8 gi nus e pinje 240! To mano ok nyis ni tijwa oserumo. Pod nyaka wadhi nyime lando ne ji ni Pinyruodh Nyasaye kende e ma biro tieko ne dhano chandruok.​—Zab. 145:11-13.

9. Ang’o momiyo ok onego wawe lando wach Pinyruoth?

9 Ok wabi weyo lando wach Pinyruoth nyaka Jehova owuon e ma wach ni koro oromo. Wadong’ gi thuolo ma romo nade mar konyo ji ong’e Jehova kod Yesu Kristo? (Joh. 17:3) Wakia. Gima wang’eyo en ni ka pok masira maduong’ ochakore, ng’ato ang’ata ma ‘chunye ni kare ne ngima mochwere’ pod nyalo rwako wach maber. (Tich 13:48) Ere kaka wanyalo konyo joma kamago ka pok odeko ahinya?

10. Gin gik mage ma Jehova omiyowa mondo okonywa puonjo ji adiera?

10 Jehova tiyo gi riwruok mar ogandane e miyowa gik moko duto ma dwarore e puonjo ji adiera. Kuom ranyisi, itiegowa juma ka juma e chokruok ma kor juma. Chokruogno konyowa ng’eyo kaka wanyalo chako wuoyo gi ji, kaka wanyalo dok limogi, kod kaka wanyalo puonjogi Muma. Bende, osemiwa Gik Mwatiyogo e Puonjo Ji Muma. Gigo konyowa e . . .

  •   chako mbaka gi ji,

  • miyo ji siso mar ng’eyo weche momedore,

  • jiwo ji mondo gigomb puonjore Muma,

  • puonjo ji adiera ma ni e Muma, kod

  • konyo ji ng’eyo websaitwa kod Ute Romo magwa.

Bedo gi gik ma watiyogo e puonjo ji Muma ok oromo. Nyaka wati kodgi. * Kuom ranyisi, bang’ wuoyo gi ng’at moyie winjo wach, inyalo weyone trakt kata gaset moro mondo osom nyaka chieng’ idog ilime. Ng’ato ka ng’ato nigi ting’ mar neno ni olando wach Pinyruoth dwe ka dwe.

11. Ang’o momiyo ne ochak chenro mar puonjruok Muma e websaitwa?

11 Yo machielo ma Jehova konyogo ji mondo opuonjre adiera en chenro mar puonjruok Muma e websaitwa mar jw.org® mong’ere kaka Online Bible Study Lessons. (E jw.org/en, dhi e BIBLE TEACHINGS > ONLINE LESSONS.) Ang’o momiyo ne ochak chenrono? En nikech dwe ka dwe e piny mangima, ji mang’eny manyoga gik ma nyalo konyogi puonjore Muma e intanet. Websaitwa nyalo konyo joma kamago ng’eyo adiera ma ni e Muma. Nitie joma waromogo sama walendo ma ok yiega mayot mondo opuonjgi Muma. Kiromo gi joma kamago, inyalo nyisogi chenro mar puonjruok Muma e websaitwa kata inyalo oronegi adres ma ginyalo donjogo kanyo. *

12. Gin weche mage ma ng’ato nyalo puonjore sama otiyo gi chenro mar puonjruok Muma e websaitwa?

12 Sama ng’ato tiyo gi chenro mar puonjruok Muma e websaitwa, obiro yudo weche ma wuoyo e wi Muma, wuon Muma, joma iwuoyo kuomgi e Muma, kod geno ma Muma miyowa. Gibiro yudo weche kaka:

  • Yore ma Muma nyalo konyogo ngimagi

  • Jehova, Yesu, kod malaike gin jomage

  • Gimomiyo Nyasaye nochueyo dhano

  • Gimomiyo richo kod chandruok nitie

Gibiro puonjore bende kaka Jehova biro . . .

  • tieko chandruok gi tho,

  • chiero jomotho, kod

  • tiyo gi Pinyruodhe e golo sirkende mag dhano.

13. Be chenro mar puonjruok Muma e websaitwa okawo kar chenro mar puonjo ji Muma wang’ gi wang’? Ler ane.

13 Chenro mar puonjruok Muma e websaitwa ok okawo kar chenro mar puonjo ji Muma wang’ gi wang’. Yesu omiyowa tich mar loko ji obed jopuonjrene. Wageno ni mosmos joma oyiero puonjore Muma e websaitwa biro hero gik ma gipuonjore mi gibed gi siso mar ng’eyo weche momedore. Ka gitimo kamano, samoro ginyalo yie mondo ng’ato opuonjgi Muma wang’ gi wang’. E giko puonjruok ka puonjruok ma ni e websaitwa, inyiso ng’at ma puonjoreno ni onyalo kwayo mondo ng’ato olime opuonje Muma. Parie ni pile ka pile, riwruokwa yudoga kwayo mokalo 230 mag joma dwaro ni ng’ato odhi opuonjgi Muma! Puonjruok gi ng’ato Muma wang’ gi wang’ e gima nyalo konye!

DHI NYIME TEMO MATEK MONDO ILOK JI OBED JOPUONJRE YESU

14. Ka luwore gi weche Yesu ma ni e Mathayo 28:19, 20, en ang’o ma nyaka watim, to nikech ang’o?

14 Som Mathayo 28:19, 20. Sama wapuonjo ji Muma, nyaka watem matek mondo ‘walokgi gibed jopuonjre kendo wakonygi rito weche duto ma Yesu nochiko.’ Onego wakonygi mondo ging’e gimomiyo onego giti ne Jehova kod Pinyruodhe. Mano nyiso ni wabiro temo matek  mondo wajiwgi giti gi gik ma gipuonjore, gichiw ngimagi ne Jehova, kendo obatisgi. Mano kende e yo ma ginyalo resogo ngimagi e odiechieng’ mar Jehova.​—1 Pet. 3:21.

15. Ang’o ma ok wanyal dhi nyime timo, to nikech ang’o?

15 Mana kaka waseneno, thuolo modong’ nok. Tijwani onego otim mapiyo! Omiyo, ok wanyal dhi nyime puonjore gi joma ok dwar bedo jopuonjre Yesu. (1 Kor. 9:26) Pod nitie joma pok owinjo wach Pinyruoth monego okony ka sa pok olewo.

KIK ITUDRI KATA MATIN GI DINDE MAG MIRIAMBO

16. Ka luwore gi Fweny 18:2, 4, 5, 8, en ang’o ma waduto onego watim? (Ne bende weche moler piny.)

16 Som Fweny 18:2, 4, 5, 8. Ndikono wuoyo kuom gima chielo ma Jehova dwaro ni jotichne otim. Jokristo madier ok onego otudre kata matin gi Babilon Maduong’. Nyalo bedo ni ng’at ma wapuonjo Muma chon ne ni e din moro mar miriambo. Nyalo bedo ni ne olemoga kodgi kendo timo gik ma jogo timo. Kata samoro ne ogologa pesa mondo osirgo tije mag dinno. Ka pok oyie ne ng’at ma kamano bedo jalendo ma pok obatisi, nyaka ong’ad tudruok moro amora ma en-go gi din mar miriambo. Onego ondik barua ne dinno, kata otim gimoro machielo ma biro nyisogi ayanga kod jomamoko duto ni koro ok en ng’atgi ngang’. *

17. Gin tije kaka mage ma Jakristo ok bi yie timo, to nikech ang’o?

17 Jakristo madier nyaka ne ni tij yuto motimo onge tudruok moro amora gi din mar miriambo. (2 Kor. 6:14-17) Kuom ranyisi, ok obi yie mondo kanisa ondike tich. Bende, Jakristo ok bi yie mondo joma ondike tich oore odhi otim tich ma kawo thuolo malach e ot kata ofis ma siro din mar miriambo. To ka Jakristo nigi tije owuon kata kambine, ok obi kawo kontrakt mar dhi timo tich moro amora motudore gi din mar miriambo. Ang’o momiyo mano en wach mapek? En nikech ok wadwar gimoro amora ma tudowa gi gik maricho ma dinde mag miriambo timo,  ma gin timbe ma ok ler e wang’ Nyasaye.​—Isa. 52:11. *

18. Ere kaka owadwa moro nomakore gi puonj mag Muma e weche tich?

18 Higni moko mokalo, kontrakta moro nokwayo jaduong’-kanyakla moro ma fundi bao mondo odhi olos gimoro e kanisa ma ne ni but kama nodakie. Kontraktano nong’eyo maler ni owadwano ne ok yiega timo tich moro amora motudore gi kanisa. Kata kamano, kontraktano ne manyo ahinya ng’at ma ne nyalo tiyone tijno. To nikech owadwano nomakore ahinya gi puonj mag Muma, notamore tijno. Juma ma noluwo, gaset mar pinyno nonyiso picha mar fundi bao moro ka keto msalaba e kanisano. Ka po ni owadwano di ne oyie gi tijno, pichane e ma di ne oket e gasedno. Parie kaka wachno di ne oketho nyinge! Jehova Nyasaye kaachiel gi Jokristo wetene di ne onene nade?

ANG’O MA WAPUONJORE?

19-20. (a) Nyaka chop sani, ang’o ma wasepuonjore? (b) Gin penjo mage ma wabiro yudo dwokogi e sula ma luwo?

19 Ka luwore gi weche ma ne okor e Muma, gima duong’ ma koro warito en lendo mar “kuwe nitie kendo weche beyo.” Nikech gik ma Jehova osepuonjowa, wang’eyo ni joloch mag pinyni ok nyal kelo kue mosiko. Ang’o ma onego watim ka pok oland wachno mi kethruok ma apoya obiro? Jehova dwaro ni wadhi nyime bedo modich e lando wach Pinyruoth kendo loko ji mang’eny obed jopuonjre Yesu. Bende, onego wang’ad tudruok moro amora gi dinde mag miriambo. Mano oriwo weyo bedo jokanyo mag dinde mag miriambo kata timo tich moro amora motudore kodgi.

20 Nitie gik mamoko madongo ma bende biro timore e giko mar ndalo giko. Bende, nitie gik mamoko ma Jehova dwaro ni watim. Gigo gin gik mage, to ere kaka wanyalo ikore ne gik ma biro timore e kinde ma biro? Wabiro yudo dwoko mag penjogo e sula ma luwo.

WER 71 Wan Jolweny mag Jehova!

^ par. 5 Machiegnini, joloch mag pinyni biro lando ni “kuwe nitie kendo weche beyo!” Lendono biro nyiso ni koro masira maduong’ chiegni chakore. Ang’o ma Jehova dwaro ni watim sani nyaka chop kindeno? Sulani biro konyowa yudo dwoko mar penjono.

^ par. 3 Kuom ranyisi, Riwruok mar Pinje (United Nations) wacho e websaitgi ni “gikelo kue kendo gimiyo weche bedo mabeyo e piny mangima.”

^ par. 10 Mondo iyud weche momedore e wi Gik Mwatiyogo e Puonjo Ji Muma, som sula ma wiye wacho ni “Puonjo Adiera” ma ni e Ohinga mar Jarito ma Oktoba 2018.

^ par. 11 Gie sani, chenrono yudore mana e dho Kisungu kod dho Portuguese. Dhok mamoko ibiro med bang’e.

^ par. 16 Bende, ok onego watudre gi chenro moro amora ma dinde mag miriambo oloso, kaka grube mag rowere ma timo gik moko kanyachiel (youth camps), kata dhi timo gik mitimo kuonde ma dinde mag miriambo oloso ma ji yueyoe, tugoe, kata dhiyoe bayo, kod chenro mamoko ma kamago. Kuom ranyisi, kidwaro ng’eyo gimomiyo Jokristo madier ok onego obed jokanyo mag YMCA (Young Men’s Christian Association), som The Watchtower ma Januar 1, 1979 e wich ma wacho ni Questions From Readers.” Mano e paro monego wabedgo bende kuom YWCA (Young Women’s Christian Association). Kata obedo ni moko kuom joma ochung’ ne riwruogego nyalo wacho ni riwruogego onge tudruok gi din, adiera en ni din e ma nochakogi kendo gichopo dwach dindego.

^ par. 17 Kidwaro yudo weche mathoth e wi gima Ndiko wacho e wi timo tije motudore gi riwruoge mag dinde mag miriambo, som Mnara wa Mlinzi ma April 15, 1999 e wich ma wacho ni Maswali Kutoka kwa Wasomaji.”

^ par. 83 WECHE MA LERO PICHA: Joma ni e otel moro bwok sama oland e televison ni “kuwe nitie kendo weche beyo.” Kata kamano, dichwo moro gi jaode moa e tij lendo to ong’eyo ni kue ma kamano ok nyal siko.