Kal idhi e weche manie iye

Kal idhi kama ochanie weche mantie

Wer ne Jehova gi Dwol Mamor!

Wer ne Jehova gi Dwol Mamor!

‘Wero pak ne Nyasachwa ber.’​—ZAB. 147:1.

WENDE: 9, 138

1. Wer miyowa thuolo mar timo ang’o?

JAL moro molony e loso wer nowacho kama: “Weche miwacho miyo ng’ato paro matut. Thum miyo ng’ato winjo maber e chunye. Kata kamano, wer to miyo ng’ato winjo ndhadhu mar weche.” Kuom adier, wende mipakogo Jehova Wuonwa ma ni e polo to koro nigi ndhadhu moloyo. To mano e momiyo wer omako kama duong’ ahinya e lamo madier, bed ni wawer ka wan kendwa kata ka wan e chokruok.

2, 3. (a) Jomoko nyalo neno nade wach wer e chokruogewa? (b) Gin penjo mage ma wabiro yudo dwokogi e sulani?

2 Kata kamano, ineno nade wach wer e chokruogewa? Be dibed ni wiyi kuotga gi wer? E ogendni moko, chwo wigi kuotga ka giwer kama ji nitie. Sama owete bende wigi kuot kamano, mano nyalo miyo jomamoko e kanyakla kik wer gi mor. Jodongo gi jokony-tich ok onego odonjre e dije moko ma ok ochuno sama wer dhi nyime.​—Zab. 30:12.

3 Ka waneno wer kaka achiel kuom yore ma walamogo Jehova, wabiro temo matek mondo wer kik bawa sama wan e  chokruok. Omiyo, ng’ato ka ng’ato kuomwa onego openjre niya: ‘Aneno nade wach wer e chokruogewa? Ere kaka anyalo nyagora gi gik ma nyalo mona wer ne Jehova gi mor? To ang’o ma anyalo timo mondo awer e yo ma nyiso ni weche mag wendewa donjona maber?’

WER EN ACHIEL KUOM YORE MA WALAMOGO JEHOVA

4, 5. Wer ne okaw mapek e okang’ ma romo nade e kinde Jo-Israel?

4 Kuom higni mang’eny, jotich Jehova osebedo ka tiyo gi wer e pake. Kinde ma Jo-Israel ne omakore gi Jehova, wer ne en achiel kuom yore madongo ma ne gilamego. Kuom ranyisi, ka ne Ruoth Daudi chano kaka bang’e ne idhi tim lamo maler e hekalu, ne oketo jower 4,000 ma Jo-Lawi. E i jowergo, ne nitie ji 288 ma nolony ahinya e wer.​—1 We. 23:5; 25:7.

5 Ka nochopo chieng’ walo hekalu, thum kod wer ne omako kama duong’ ahinya. Muma nyisowa kama: ‘Ka joma ne goyo tunge kod jower nobet kaachiel mi dwondgi nowinj kanyachiel ka gipako Jehova kendo goyone erokamano, duong’ maler mar Jehova nopong’o od Nyasaye.’ To mano kaka nyasino notego yiegi!​—2 We. 5:13, 14; 7:6.

6. Ler ane kaka nochan jower e kinde ma Nehemia ne en gavana ma Jerusalem.

6 E kinde ma Nehemia ne tayo Jo-Israel e loso ohinga mag Jerusalem, en bende nochano mondo Jo-Lawi ower ka gikowo dwondgi gi thum ma iye otuere nyowuoyo. Ka ne iwalo ohinga ma ne oger manyienno, jowergo nomiyo ji omor matek. Chieng’no, ne nitie jower ma nopog e grube ariyo. Grup achiel nopangore kochomo koracham to machielo korachwich ka giwer. Kae to ne giromo e tie ohinga ma ne ni machiegni gi hekalu, kendo ne giwer gi dwol maduong’ ma ne owinjore nyaka kuma bor. (Neh. 12:27, 28, 31, 38, 40, 43) Onge kiawa ni Jehova ne mor gi kaka jotichnego nowerne gi dwol mamor.

7. Yesu ne otimo ang’o ma nyiso ni wer en gima duong’ ahinya sama Jokristo ochokore ne lamo?

7 E kinde Jokristo mokwongo, thum kod wer pod ne gin gik madongo ahinya e lamo madier. E otieno mogik ka Yesu pok notho, ne otimo nyasi mar Chiemo Modhiambo mar Ruodhwa ka en gi jootene, kendo ne giwero wende mag pako Nyasaye.​—Som Mathayo 26:30.

8. Jokristo mokwongo noketo ranyisi mane maber e wach wer?

8 Jokristo mokwongo noketo ranyisi maber e pako Nyasaye gi wer. Kata obedo ni nitie kinde ma ne gichokore e ute jowetegi, mano ne ok omonogi wer ne Jehova gi dwol mamor. Jaote Paulo nojiwo Jokristo wetene niya: “Sikuru ka upuonjoru e kindu kendo ka ujiworu gi zaburi gi wende pak ne Nyasaye kod wende mag lemo miwero gi erokamano, ka uwer ne Jehova gi chunyu duto.” (Kol. 3:16) Adier, wende ma ni e bugwa mar wer gin wende “miwero gi erokamano.” Wendego bende gin chiemb chuny mowuok kuom “jatich mogen kendo mariek.”​—Mat. 24:45.

NADE KINENO NI WER NOKALONI GI E TOK CHIEL?

9. (a) Gin ang’o gini ma nyalo miyo ng’ato odikre sama ower e chokruogewa? (b) Onego wawer ne Jehova e yo mane, to gin jomage monego oketnwa ranyisi maber? (Ne picha ma ni e chak sulani.)

9 To nade ka wer ok en gima ung’iyogo e odu, e ogandau, kata e alworau? Teknoloji  ma nyasani nyalo miyo iwinj wende mamit ma jower molony owero. Samoro wiyi nyalo kuot ka ipimo dwondi gi dwond jower mang’ulago. Mano ok onego omi ijwang’ thuolo makende ma Jehova omiyi mar werne. In mak mana bugi mar wer e yo mowinjore, ting’ wiyi malo, kendo iwer ne Jehova gi chunyi duto! (Ezra 3:11; som Zaburi 147:1.) E kuondewa mang’eny mag lamo, tinde iketoga weche mag wendewa e skrin sama ji wer mondo okonywa wer ka dwondwa ni thuolo. Bende, e Skul mar Tij Pinyruoth ma jodong-kanyakla dhiyega kinde ka kinde, tinde nitie nyaka wer. Mano nyiso ni jodongo onego oket ranyisi maber sama ji wer e kanyakla.

10. Ka po ni luoro e ma miyo wadikore ne wer, ang’o monego wapar?

10 Achiel kuom gik ma nyalo miyo ng’ato odikre ne wer en luoro. Jomoko ok wer gi mijing’o nikech ok gidwar ni ginenre ni giwer mamit moloyo jowetegi, kata samoro gineno ni giwer marach ma ok ber ka jomoko winjogi. Kata kamano, gima nyaka wapar en ni sama wawuoyo, “waduto wachwanyore nyading’eny.” (Jak. 3:2) To mano ok monwaga wuoyo, koso? Kare ang’o ma dimi wayie mondo dwondwa ma waparo ni rachno omonwa pako Jehova?

11, 12. Moko kuom paro ma nyalo konyowa medo lony e wer gin mage?

11 Seche moko, wanyalo paro ni wer nokalonwa gi e tok chiel mana nikech ok wang’eyo gima onego watim mondo wawer maber. Kata kamano, wanyalo wer maber ka watiyo gi paro moko molernwa kae. *

 12 Inyalo wer gi dwol motegno ka ipuonjori kuno muya. Mana kaka sitima miyo balb teko mar rieny, muya bende miyo dwondwa bedo gi teko sama wawuoyo kata sama wawer. Sama iwer, onego iwer gi dwol ma itiyogago sama iwuoyo kata inyalo mede matin. (Ne paro mochiw e bug Tiegri e Skul mar Tij Nyasaye, ite mag 182-184 e bwo wich matin ma wacho ni “Chik Kaka Igamo Kendo Igolo Muya.”) Kinde mang’eny ka Muma wuoyo kuom wer, ojiwoga jotich Jehova mondo ower gi “dwol mang’ongo.”​—Zab. 33:1-3.

13. Ler ane gik ma wanyalo timo mondo dwol ma wawergo omed bedo maber.

13 Sama utimo lamo mar joot kata sama in kendi, inyalo timo kama: Yier achiel kuom wende ma moriga ahinya e bugwa mar wer. Som weche mag wendno gi dwol mochwiny. Kae to kitiyo gi dwol mochwinyno, wach weche ma ni e lain achiel nyaka tung’ ma ok iyueyo. Kae to, wer wechego gi dwol achiel achielno. (Isa. 24:14) Dwondi biro chako bedo motegno kendo mamit, to mano gima ber ndi! Kik mano bwogi kata miyi luoro.

14. (a) En ang’o machielo minyalo timo mondo iwer maber? (Ne bende sanduk ma wiye wacho ni, “ Gik ma Wanyalo Timo Mondo Wawer Maber Moloyo.”) (b) Gin paro mage miyudo kae ma ineno ni nyalo konyi bero dwondi mondo iwer maber?

14 Kidwaro mondo iwer maber, nyaka iyaw dhogi malach. Omiyo, gima chielo ma nyalo konyi en yawo dhogi moloyo kaka itimoga sama iwuoyo. Onego itim ang’o ka ineno ni dwondi ni piny ahinya? To nade ka dwondi liyore kata bith ahinya? Inyalo yudo weche ma nyalo konyi e bug Tiegri e Skul mar Tij Nyasaye, e sanduk ma wiye wacho ni “Loyo Pek Moko Sie” e ite mar 184.

 WER NE JEHOVA GI CHUNYI DUTO TE

15. (a) En ang’o makende ma ne oland e romo moro ma notim e higa mar 2016? (b) Moko kuom gik momiyo ne olos bugwa mar wer e yo manyien gin mage?

15 E romo ma 2016 mar Watch Tower Bible and Tract Society of Pennsylvania, ji ne mor ahinya ka ne Owadwa Stephen Lett ma en achiel kuom owete ma ni e Bura Matayo nolando ni ne oselos bug wer manyien miluongo ni Sing Out Joyfully” to Jehovah, kendo ni ne idhi chak ti kode e chokruogewa. Owadwa Lett nolero ni achiel kuom gik momiyo ne olos bugwa mar wer e yo manyien en ni mondo weche ma ni e i bugno oluwre gi weche motigo e New World Translation of the Holy Scriptures ma 2013. Timo mano ne dwaro ni oruch kata olok weche moko ma koro ok yudre e New World Translation. Bende, ne omed wende moko ma wuoyo kuom tijwa mar lendo kod moko ma nyiso kaka wamor gi misango ma Yesu nochiwo. E wi mago, nikech wer en achiel kuom yore madongo ma walamogo Jehova, Bura Matayo noneno ni ber ka wabedo gi bug wer ma kite chal gi New World Translation ma sani.

16, 17. Gin lokruoge mage ma notim e bugwa manyien mar wer?

16 Mondo bug wer manyien obed mayot tiyogo, ochan wende e grube-grube ka luwore gi weche madongo ma giwuoyoe. Kuom ranyisi, wende apar gariyo mokwongo wuoyo e wi Jehova, aboro ma luwo wuoyo e wi Yesu gi rawar, kamano-kamano. Bende, nitie indeks ma konyo e yudo wende e yo mayot. Kuom ranyisi, indeksno nyalo konyo owadwa ma nigi twak mar ji duto mondo oyud wer mowinjore gi twage.

17 Mondo ji duto mobiro e chokruogewa ower gi chunygi duto te, weche mag wende moko otimnegi lokruok mogwaro mondo tiendgi owinjre maler kata mondo giwerre e yo mayot. Wiye moko bende oloki.

Tiegreuru ne wer sama utimo lamo mar joot (Ne paragraf mar 18)

18. Ang’o momiyo onego watem matek mondo wang’e wendewa e yo maber? (Ne bende weche moler piny.)

18 Thoth wende ma ni e bug wer manyien olos e yor lamo. Sama iwero wendego, inyiso Jehova weche ma ni e chunyi. Nitie wende moko ma sama wawero, gijiwowa mondo wabed gi “hera kod timbe mabeyo.” (Hib. 10:24) Omiyo, onego watem matek mondo wang’e weche motigo e wendewa, thumbe ma wawergo, kod kaka thumbego dhi gi weche ma wawero. Inyalo winjo wende moko mosewer chuth ma yudore e jw.org. Ka ipuonjori wer sama in pacho, inyalo ng’eyo wero wendego gi dwol motegno kendo kimor. *

19. En yo mane ma ji duto e kanyakla nyalo pakogo Jehova achiel kachiel?

19 Par kinde duto ni wer en gima duong’ ahinya e lamo marwa. En achiel kuom yore makende ma wanyisogo Jehova kaka wahere kendo wagene. (Som Isaiah 12:5.) Ka iwer gi dwol mamor, ibiro jiwo jomamoko mondo gin be gitim kamano. Kuom adier, ji duto e kanyakla, bed ni gin nyithindo, joma dongo, kata joma nyien, nyalo pako Jehova achiel kachiel kokalo kuom wer. Kuom mano, kik idikri sama iwer. Kar mano, tim gima jandik-zaburi nojiwo niya: ‘Wer ne Jehova!’ Ee, wer ne Jehova gi dwol mamor!​—Zab. 96:1.

^ par. 11 Mondo iyud weche momedore ma nyalo konyi lony e wer, ne program mar JW Broadcasting ma Desemba 2014. Dhi e VIDEO ON DEMAND, kae to e bwoye idi kama wacho ni FROM OUR STUDIO.

^ par. 18 E chokruogewa madongo, sama program chiegni chakore, iketonwaga thumbe molos mamit mondo oik chunywa kod pachwa ne wer kendo ne winjo program. Omiyo, ijiwowa mondo wabed piny mos mondo wawinj thumbego a chakruokgi nyaka gikogi.