Kal idhi e weche manie iye

Kal idhi kama ochanie weche mantie

 SULA MAR PUONJRUOK 22

Nyis ni Igoyo Erokamano Kuom Mich ma Ok Ne gi Wang’

Nyis ni Igoyo Erokamano Kuom Mich ma Ok Ne gi Wang’

‘Chom wang’i kuom gik ma ok ne. Nikech gik mineno ok sik, to gik ma ok ne siko nyaka chieng’.’​—2 KOR. 4:18.

WER 45 Weche ma Aparo e Chunya

GIMA SULANI WUOYE *

1. Yesu nowacho ang’o e wi mwandu mokan e polo?

NITIEREGA mwandu moko ma ok ne gi wang’. Thothne, mwandu kata mich ma ok ne gi wang’ e ma nengogi tekga ahinya. E twak ma ne Yesu ogolo e wi got, nowacho ni mwandu mokan e polo beyo moloyo mwandu mag ringruok. Kae to nomedo niya: “Kama mwanduni nitie, e kama chunyi bende biro betie.” (Mat. 6:19-21) Chunywa e ma chwalowaga manyo gik ma wageno ahinya. Wakanoga “mwandu e polo” sama watemo matek mondo wabed gi winjruok maber gi Nyasaye, kendo loso nying maber kode. Yesu nowacho ni mwandu kaka mago ok nyal kethre kendo jokuoge ok nyal kwalogi.

2. (a) Ka luwore gi 2 Jo-Korintho 4:17, 18, jaote Paulo nojiwowa ni waket pachwa kuom ang’o? (b) Wadwaro nono ang’o e sulani?

2 Jaote Paulo nojiwowa ni ‘wachom wang’wa kuom gik ma ok ne.’ (Som 2 Jo-Korintho 4:17, 18.) Gik ma wang’wa ok nyal nenogo oriwo nyaka gueth ma wabiro yudo e piny manyien. E sulani, wadwaro wuoyo kuom mich moko ang’wen ma wan-go e kindegi, kata obedo ni ok wanyal nenogi gi wang’wa. Michgo gin, osiep ma wan-go gi Jehova, lamo, roho maler, kod thuolo mar tiyo kanyachiel gi Jehova, Yesu kod malaike e tij lendo. Bende, wabiro neno kaka wanyalo nyiso ni wamor gi michgi.

OSIEP MA WAN-GO GI JEHOVA

3. Mich maduong’ie mogik ma ok ne gi wang’ en mane, to ere kaka mano nyalore?

3 Mich maduong’ie mogik ma ok ne gi wang’ en osiep  ma wan-go gi Jehova Nyasaye. (Zab. 25:14) Ere kaka Jehova nyalo mako osiep gi dhano ma joricho to pod osik koler? Mano nyalore nikech misango mar Yesu Kristo “golo richo mar piny.” (Joh. 1:29) Jehova nong’eyo chakre chon ni dwache mar waro dhano ne nyaka timre. Mano e momiyo Jehova ne nyalo mako osiep kata gi joma nodak e piny ka pok Yesu nobiro e piny motho.​—Rumi 3:25.

4. Moko kuom osiepe Nyasaye ma nodak ka pok Yesu obiro e piny gin jomage?

4 Ne ane moko kuom joma nobedo osiepe Nyasaye chon ka ne Yesu pok obiro e piny. Ibrahim ne nigi yie motegno. Higni mokalo 1,000 bang’ ka Ibrahim nosetho, Jehova noluonge ni “osiepna.” (Isa. 41:8) Mano nyiso ni kata mana tho ok nyal ketho osiep ma ni e kind ng’ato gi Jehova. E wang’ Jehova, Ibrahim pod ngima. (Luka 20:37, 38) Ng’at machielo en Ayub. Ka ne malaike pok ochako chokruok margi e polo, Jehova nowuoyo maber e wi Ayub. Nowacho ni Ayub ne ‘en ng’at ma onge ketho kendo ma timne tir, moluoro Nyasaye kendo motang’ gi richo.’ (Ayub 1:6-8) Jehova noneno nade Daniel jatichne ma nomakore kode kuom higni 80 e piny ma ji ne lamoe nyiseche manono? Malaike nowacho ne Daniel nyadidek niya: “In ng’at ma Nyasaye ohero ahinya.” (Dan. 9:23; 10:11, 19) Wan gadier ni Jehova gombo ahinya odiechieng’ ma obiro chieroe osiepene mosetho.​—Ayub 14:15.

Moko kuom yore ma wanyalo nyisogo ni wamor gi mich ma ok ne gi wang’ gin mage? (Ne paragraf mar 5) *

5. Ang’o ma dwarore mondo wabed osiepe Jehova?

5 E kindegi, dhano adi ma mor bedo osiepe Jehova kata obedo ni gin joricho? Gin ji milionde modhuro. Wawacho kamano nikech e piny ma ngima nitie chwo, mon, kod nyithindo ma nyiso kokalo kuom timbegi ni gidwaro bedo osiepe Nyasaye. Jehova bedoga “osiep ng’at ma yorene tir.” (Nge. 3:32) Osiep ma kamano nyalore nikech jogo oketo yiegi kuom misango ma Yesu nochiwo. Misangono e ma miyowa thuolo mar chiwore ne Jehova mi batiswa. Sama wakawo okenge ariyogo, ‘wabedo osiep’ ng’at maduong’ie moloyo e piny gi polo, kendo wabedo e riwruok mar joge ma bende osechiworene mi obatisgi.

6. Ere kaka wanyalo nyiso ni wamor bedo osiepe Jehova?

6 Ere kaka wanyalo nyiso ni wamor bedo osiepe Jehova? Mana kaka Ibrahim gi Ayub ma nomako osiep gi Jehova kuom higni mang’eny, wan be nyaka wasik ka wamakore gi Jehova kata bed ni wasetiyone kuom higni adi e ndalo mag gikogi. Bende, mana kaka Daniel, onego waket osiep ma ni e kindwa gi Jehova obed motelo e ngimawa. (Dan. 6:7, 10, 16, 22) Jehova biro konyowa rito osiep ma ni e kindwa kode kata sama waromo gi tembe.​—Fil. 4:13.

LAMO

7. (a) Ka luwore gi Ngeche 15:8, Jehova neno nade lamo magwa? (b) Jehova dwokoga lamo magwa nade?

7 Mich machielo ma ok wanyal neno gi wang’wa en lamo. Osiepe oheroga goyo mbaka e wi paro ma gin-go kod kaka giwinjo. Be mano e kaka osiep ma ni e kindwa gi Jehova chalo? Ee! Jehova nyisowaga pache kod kaka owinjo kokalo kuom Wachne ma en Muma. Wan to wanyalo nyise gik ma chandowa kod kaka wawinjo e chunywa kokalo kuom lamo. Jehova morga ahinya sama  wawuoyo kode e lamo. (Som Ngeche 15:8.) Kaka Osiepwa moherowa, Jehova ok winj awinja lamo magwa to oweyo gi kanyo, kar mano, odwokogiga. Seche moko odwokowaga mapiyo. To kinde moko wanyalo lemo nyading’eny e wi wach moro ka pok odwokowa. Kata kamano, pod wanyalo bedo gadier ni obiro dwokowa e kinde mowinjore kendo e yo maberie mogik. Seche moko dwoko ma Nyasaye miyowa nyalo bedo mopogore gi gima ne waparo. Kuom ranyisi, kar golonwa chandruok moro, onyalo miyowa rieko kod teko mar ‘nano.’​—1 Kor. 10:13.

(Ne paragraf mar 8) *

8. Ere kaka wanyalo nyiso ni wamor gi mich mar lamo?

8 Ere kaka wanyalo nyiso ni wamor gi mich mar wuoyo gi Nyasaye e lamo? Yo achiel en luwo kaka Jehova chikowa ni, “Lamuru kinde duto.” (1 The. 5:17) Jehova ok chunwaga mondo walem. Kar mano, oweyowa mondo watim yierowa wawegi, kendo ojiwowa ni ‘walam ma ok wawe.’ (Rumi 12:12) Omiyo, wanyalo nyiso ni wamor gi mich mar lamo kuom lemo nyading’eny pile ka pile. Sama walemo, ber ka wagoyo ne Jehova erokamano kuom gik mosetimonwa, kendo pake.​—Zab. 145:2, 3.

9. Owadwa moro neno nade lamo, to in iwuon ineno nade lamo?

9 Kaka wamedo tiyo ne Jehova kendo neno kaka odwoko lamowa, e kaka wabiro dhi nyime kawo mapek mich mar lamo. Kuom ranyisi, owadwa moro miluongo ni Chris ma osetiyo ne Jehova e thuolone duto kuom higni 47 wacho kama: “Mano kaka bernaga chiewo gokinyi mang’ich mondo awuo gi Jehova e lamo! Agoyonega erokamano sama aneno kaka piny yawore, kendo kaka tho momoko e lum lal mosmos. Mano chwalaga mondo agone erokamano kuom gik mabeyo mosemiya, moriwo nyaka thuolo mar wuoyo kode e lamo. Kae to bang’ lemo e giko odiechieng’, anindoga ka an gi chuny maler.”

 ROHO MALER

10. Ang’o momiyo onego wanyis ni wamor gi mich mar roho maler mar Nyasaye?

10 Mich machielo ma ok wanyal neno gi wang’ en roho maler mar Nyasaye. Yesu nojiwowa ni wadhi nyime kwayo Nyasaye rohone maler. (Luka 11:9, 13) Kokalo kuom rohone maler, Jehova miyowaga “teko mokalo ma pile.” (2 Kor. 4:7; Tich 1:8) Roho maler mar Nyasaye bende konyowa nano e tem moro amora ma wanyalo romogo.

(Ne paragraf mar 11) *

11. Roho maler konyowa e yore mage?

11 Roho maler konyowaga timo migepe ma Nyasaye omiyowa. Rohono nyalo konyowa medo bero nyalo ma wan-go; bende, okonyowa chopo ting’ ma wan-go kaka Jokristo. Sama wayudo nyak maber e tij Nyasaye, wanyalo bedo gadier ni roho maler e ma okonyowa, to ok tekowa wawegi.

12. Ka luwore gi Zaburi 139:23, 24, wanyalo kwayo mondo roho maler okonywa timo ang’o?

12 Yo machielo ma wanyalo nyisogo ni wamor gi roho maler en lemo ka wakwayo ni rohono okonywa fwenyo paro ma ok kare kata gombo maricho ma nyalo bedo e chunywa. (Som Zaburi 139:23, 24.) Ka wakwayo Jehova mondo okonywa timo mano, obiro miyowa rohone maler mondo okonywa e wechego. To ka wafwenyo ni wachako bedo gi paro kata gombo moko maricho e chunywa, onego wakwa Jehova rohone maler mondo okonywa golo parogo kod gombogo. Ka watimo mano, wabiro nyiso ni waikore kwedo gimoro amora ma nyalo mono Jehova miyowa rohone maler.​—Efe. 4:30.

13. Ere kaka wanyalo nyiso ni wamor gi mich mar roho maler?

13 Wanyalo medo nyiso ni wamor gi mich mar roho maler ka waparo gik ma roho osetimo e kindewagi. Ka ne Yesu pok odok e polo, nonyiso jopuonjrene niya: “Ubiro yudo teko ka roho maler obiro kuomu, mi unubed jonenona . . . nyaka kuonde maboyo mogik e tung’  piny.” (Tich 1:8) E kindewagi, wechego timore e okang’ malach. Roho maler osemiyo ochok jotich Jehova ma kwan-gi okalo milion aboro gi nus e piny ngima. Bende, wamor bedo gi kue e kindwa kaka owete nikech roho maler osekonywa nyago kido mabeyo kaka hera, mor, kuwe, horuok, ng’wono, ber, yie, muolo, kod ritruok. Kidogo e ma iluongo ni “olembe ma roho nyago.” (Gal. 5:22, 23) To mano kaka roho maler en mich maber miwuoro!

KAKA JOMA NI E POLO KONYOWA E TIJ LENDO

14. Gin jomage ma lendo kanyachiel kodwa kata obedo ni ok wanegi gi wang’wa?

14 Mich machielo ma ok wanyal neno gi wang’ en thuolo makende ma wan-go mar ‘tiyo kanyachiel’ gi Jehova, Yesu, kod malaike. (2 Kor. 6:1) Watiyoga kanyachiel kodgi sa moro amora ma wadhi e tij lendo. Jaote Paulo nowacho ni en kaachiel gi joma tiyo tijno ne gin “jotich ma tiyo kanyachiel gi Nyasaye.” (1 Kor. 3:9) Bende, sama walendo watiyo kanyachiel gi Yesu. Donge inyalo paro gima Yesu nonyiso jolupne bang’ ka nosechikogi ni ‘gidhi gilok ji obed jopuonjrene’? Nonyisogi niya: “An kodu.” (Mat. 28:19, 20) To nade malaike? Wamor ahinya ni gin e ma gitayowaga sama walando “wach maber . . . ne jo modak e piny”!​—Fwe. 14:6.

15. Chiw ane ranyisi ma ni e Muma ma nyiso kaka Jehova konyowaga e tij lendo.

15 Thuolo ma wan-go mar tiyo kanyachiel gi Jehova, Yesu, kod malaike osekonyowa timo ang’o? Sama wachwoyo kodhi mag Pinyruoth, kodhi moko lwarga e chuny joma oikore rwako wach, kendo kodhigo dongoga. (Mat. 13:18, 23) Ng’ano ma miyoga kodhigo dongo? Yesu nowacho ni onge ng’ama nyalo bedo jalupne ‘mak mana ka Wuoro oywaye.’ (Joh. 6:44) Muma nyisowa kaka wach ma kamano notimore e kinde machon. Donge inyalo paro kinde ma jaote Paulo nolendo ne mon moko oko mar taon mar Filipi? Ne ane gima Muma wacho ni notimore ne achiel kuom mon-go ma niluongo ni Ludia: “Jehova noyawo chunye ahinya mondo ochik ite malong’o ne gik ma Paulo ne wacho.” (Tich 16:13-15) Mana kaka Ludia, Jehova oseywayo ji mang’eny ire e kindegi.

16. En ng’ano monego oyud pak sa asaya ma wayudo nyak e tij lendo?

16 En ng’ano monego oyud pak sa asaya ma wayudo nyak e tij lendo? Paulo nochiwo dwoko mar penjono ka nondiko ne kanyakla ma Korintho niya: “An ne apitho, Apolo ne oolo pi, to Nyasaye ne omiyo gidongo.” (1 Kor. 3:6, 7) Mana kaka Paulo, wan bende onego wami Jehova pak sa asaya ma wayudo nyak e tij lendo.

17. Ere kaka wanyalo nyiso ni wamor gi thuolo makende ma wan-go mar ‘tiyo kanyachiel’ gi Jehova, Yesu, kod malaike?

17 Ere kaka wanyalo nyiso ni wamor gi thuolo makende ma wan-go mar ‘tiyo kanyachiel’ gi Jehova, Yesu, kod malaike? Wanyalo timo mano ka wabedo jokinda e manyo thuolo moro amora mondo walend ne ji. Moko kuom yore ma wanyalo tiyogo gin lendo e “lela kendo e ot ka ot.” (Tich 20:20) Ng’eny ji bende lendoga ka gin e dijegi. Sama giromo gi joma gikia, gijomosogi gi ilo kendo chako mbaka kodgi. Ka jogo oyie wuoyo kodgi, gimanyoga kaka ginyalo lendonegi e mbakagino.

(Ne paragraf mar 18) *

18-19. (a) Ere kaka waologa pi ne kodhi mag adiera? (b) Chiw ane ranyisi ma nyiso kaka Jehova nokonyo japuonjre moro mar Muma.

 18 Kaka “Jotich ma tiyo kanyachiel gi Nyasaye,” onego wapidh kodhi mag adiera kendo olonegi pi. Sama ng’ato oyie winjowa, wadwaro timo kinda mar lime kendo, kata wanyalo chano mondo jalendo machielo olime mondo gichak puonjore Muma. Wabedoga mamor ahinya sama waneno ka Jehova konyo japuonjreno loko pache kod chunye mondo oluw chike Jehova.

19 Ne ane ranyisi mar Raphalalani ma chon ne en ajuoga e piny South Africa. Nomor ahinya gi gik ma nopuonjore e Muma. Kata kamano, noyudo ka tekne yie gi gima Muma wacho e wi tudruok gi joma osetho. (Rap. 18:10-12) Mosmos noyie mondo Nyasaye e ma ochik pache. Gikone, noweyo tijeno kata obedo ni koro ne ok yot yudo kaka okonyore. Raphalalani ma sani en jahigni 60 wacho kama: “Joneno mag Jehova nokonya e yore mang’eny moriwo nyaka manyo tich, kendo agoyonegi erokamano ahinya. To moloyo duto, agoyo ne Jehova erokamano kuom konya timo lokruok e ngimana. Sani an Janeno ma osebatisi, kendo amor tiyo tij lendo.”

20. Ing’ado mar timo ang’o?

20 E sulani, wasenono mich ang’wen makende ma ok wanyal neno gi wang’wa. Maduong’ie moloyo en thuolo ma wan-go mar bedo osiepe Jehova. Thuolono miyo wayudo gueth mamoko kaka wuoyo kode e lamo, neno kaka rohone maler konyowa, kod tiyo kanyachiel gi joma ni e polo e tijwa mar lendo. Wang’aduru e chunywa ni wabiro dhi nyime kawo mapek mich makende ma ok wanyal neno gi wengewago. Kendo wadhiuru nyime goyo ne Jehova erokamano odiechieng’ kodiechieng kuom bedonwa Osiep maber.

WER 145 Paradiso ma Nyasaye Osingo

^ par. 5 E sula mokalo, ne wawuoyo e wi mich minyalo ne gi wang’ ma Jehova osemiyowa. E sulani, wadwaro nono mich ma ok ne gi wang’ ma Jehova osemiyowa kod kaka wanyalo nyiso ni wagoyo erokamano kuom michgo. Bende, sulani biro konyowa medo hero Jehova Nyasachwa ma osemiyowa michgo.

^ par. 58 WECHE MA LERO PICHA: (1) Nyaminwa moro paro matut kuom osiep ma en-go gi Jehova sama orango chuech.

^ par. 60 WECHE MA LERO PICHA: (2) Nyaminwano lemo ka okwayo Jehova teko mar lendo.

^ par. 62 WECHE MA LERO PICHA: (3) Roho maler miyo nyaminwano chir mar lendo sama en e dijene.

^ par. 64 WECHE MA LERO PICHA: (4) Nyaminwano koro puonjo dhako ma nolendonecha Muma. Malaike e ma okonyo nyaminwano lendo ne dhakono, kendo puonje Muma.