Kal idhi e weche manie iye

Kal idhi kama ochanie weche mantie

Jokristo Madier Nyaka Batisi

Jokristo Madier Nyaka Batisi

“Batiso . . . bende resou gie sani.”​—1 PET. 3:21.

WENDE: 756

1, 2. (a) Jonyuol moko timoga nang’o sama nyathigi onyisogi ni odwaro mondo obatise? (b) Ang’o momiyo ipenjoga joma idwaro batisi kabe gisechiwore ne Jehova? (Ne picha man malo.)

JONYUOL nyako moro matin ma wabiro luongo ni Maria ne ng’iye sama ne ochung’ gi jomamoko ma ne idhi batisi. Maria nodwoko gi dwol maduong’ kendo ma winjore maler penjo ariyo ma jagol-twak nopenjo. Bang’ mano, ne obatise.

2 Jonyuol Maria ne mor ahinya gi okang’ ma ne okawo mar chiwore ne Jehova ma obatise. Kata kamano, min-gi ne nigi kiawa moko ka ne pok obatis nyareno. Nopenjore niya: ‘Be Maria oseromo dhi e batiso? Be ong’eyo ting’ ma ng’ato bedogo sama ochiwore ne Jehova? Be nyalo bedo maber ka waweye orit matin kapok obatise?’ Mago gin penjo ma jonyuol mang’eny penjorega sama nyithindgi onyisogi ni gidwaro mondo obatisgi. (Ekl. 5:5) Kuom adier, chiwruok kod batiso  gin okenge madongo ahinya e ngima Jakristo.​—Ne sanduku ma wiye wacho ni, “ Be Isechiwori ne Jehova?

3, 4. (a) Jaote Petro nonyiso nade ni batiso en gima duong’? (b) Ang’o momiyo inyalo pim batiso gi yie ma Noa nogero?

3 Jaote Petro nopimo batiso gi yie ma Noa nogero ka nowacho niya: “Batiso, ma en gima chalo gi mano bende resou gie sani.” (Som 1 Petro 3:20, 21.) Yie ma Noa nogero nonyiso maler ni nochiwore chuth timo dwach Nyasaye. Noa notimo duto ma Jehova nochike. Gik ma Noa notimo ma ne nyiso ni en gi yie nomiyo orese gi joode duto ka ne ataro obiro. Petro notiyo gi ranyisino mondo opuonjgo wach mane?

4 Mana kaka yie maduong’ ma Noa nogero ne miyo ji ng’eyo ni ne en gi yie kuom Nyasaye, e kaka batiso bende miyo ji ng’eyo ni ng’ato osechiwore ne Jehova nikech en gi yie kuom Kristo. Mana kaka Noa, Jokristo ma osebatisi bende dhi nyime tiyo tich ma Nyasaye omiyogi. Jotich Jehova mosebatisi kendo momakore kode ibiro resi ka iketho piny marachni, mana kaka nores Noa ka ne ataro okwako piny. (Mar. 13:10; Fwe. 7:9, 10) Mano e momiyo chiwruok ne Jehova kod batiso en gima duong’ ahinya. Ng’at ma siko choro nyime batiso mare ma onge gimomiyo keto ngimane kama rach.

5. Ang’o ma wadwaro puonjore e sulani?

5 Nikech waseneno ni batiso en gima duong’ ahinya, nitie penjo adek ma wadwaro nono. Muma wacho ang’o e wi batiso? Gin okenge mage ma ng’ato nyaka kaw kapok obatise? Ang’o momiyo Jakristo onego ong’e maler ni batiso en gima duong’ sama opuonjo nyathine kata japuonjre Muma machielo?

 JOMA NOBATISI MA IWUOYO KUOMGI E MUMA

6, 7. (a) Ler ane gimomiyo batiso ma Johana ne timo ne en gima duong’. (b) En ng’a ma batiso mare nopogore gi mar jomamoko, to nikech ang’o?

6 Batiso ma Johana ne otimo e batiso mokwongo ma Muma wuoye. (Mat. 3:1-6) Joma Johana notiso nonyiso maler ni giloko chunygi ma giweyo richo ma ne gitimo ka ne giketho chike Musa. Kata kamano, nitie ng’at moro ma Johana notiso ma ne onge gi richo moro amora. Johana noyudo thuolo makende mar tiso Yesu ma ne en ng’at makare kendo Wuod Nyasaye. (Mat. 3:13-17) Yesu ne onge richo moro amora omiyo ne ok ochuno ni olokre. (1 Pet. 2:22) Batiso mare nonyiso ni ochiwore timo dwach Nyasaye.​—Hib. 10:7.

7 Jopuonjre Yesu bende notiso ji e kinde ma ne en e piny. (Joh. 3:22; 4:1, 2) Gimomiyo ne itiso jogo en ni ne gidwaro nyiso ni giloko chunygi ma giweyo richo ma ne gitimo ka giketho chike Musa. Kata kamano, gimomiyo ne itiso ji ne dhi bedo mopogore ka osechier Yesu.

8. (a) Yesu nomiyo jolupne chik mane ka ne osechiere? (b) Ler ane gimomiyo dwarore ni obatis Jakristo.

8 Ka ne osechier Yesu e higa mar 33, nofwenyore ne ji 500 moriwo chwo, mon kod nyithindo. Nenore ni kindego e ma Yesu nowachoe niya: “Dhiuru e ogendni duto mondo ulok ji obed jopuonjrena, kubatisogi e nying Wuoro, gi mar Wuode, kod mar roho maler, kendo kupuonjogi rito weche duto ma asechikou.” (Mat. 28:19, 20; 1 Kor. 15:6) Nenore ni jolup Yesu mang’eny ne nitie ka ne omiyogi chik ni gidhi gilok ji obed jopuonjrene. Yesu nonyiso maler ni joma oyie rwako jok mar bedo Jokristo ne nyaka batisi. (Mat. 11:29, 30) Ng’ato ang’ata ma ne dwaro tiyo ne Nyasaye e yo ma oyiego ne nyaka ng’e migawo ma Yesu nigo e chopo dwach Jehova kendo yie gi wachno. Bang’ mano, koro ne inyalo tis ng’atno. Mano kende e ma ne dhi bedo batiso ma Nyasaye oyiego. Muma nyiso ni e kinde Jokristo mokwongo, joma ne itiso mondo obed jopuonjre Kristo nong’eyo gimomiyo batiso ne en gima duong’. To bende ne ok gichor nyime batiso margi ma onge gimomiyo.​—Tich 2:41; 9:18; 16:14, 15, 32, 33.

KIK IDEKI

9, 10. Ranyisi mar Ja-Ethiopia kod jaote Paulo puonjowa ang’o e wach batiso?

9 Som Tich Joote 8:35, 36. Ne ane ranyisi mar Ja-Ethiopia moro ma nodonjo e din mar Jo-Yahudi ma koro ne dok thurgi kowuok lemo Jerusalem. Malaika mar Jehova notayo Filipo ma odhi ir Ja-Ethiopiano mondo ‘oyalne wach maber e wi Yesu.’ Ja-Ethiopiano notimo nang’o? Okang’ ma ne okawo bang’ winjo adiera nonyiso maler ni nomor ahinya gi weche ma ne opuonjore. Nikech nogombo ahinya timo dwach Jehova e ngimane, ne obatise ma ok odeko.

10 Ranyisi machielo en mar Ja-Yahudi moro ma ne sando Jokristo. Ne onyuole e oganda ma ne ochiwore ne Nyasaye. Kata kamano, Jo-Yahudi ne oseketho winjruok makende ma ne gin-go gi Jehova. Ja-Yahudino nomakore matek gi din mar Jo-Yahudi, kata kamano, nitie gima notimore e ngimane. Chieng’ moro Yesu Kristo nowuoyo achiel kachiel gi ng’atno.  Ng’atno notimo nang’o? Noyie timo kaka japuonjre Yesu moro miluongo ni Anania nonyise. Muma wacho kama kowuoyo kuom ng’atno: “Noa malo mi ne obatise.” (Tich 9:17, 18; Gal. 1:14) Ja-Yahudi ma iwuoyo kuomeno en jaote Paulo. Ne ni Paulo nokawo okang’ mapiyo ka ne osepuonjore adiera mofwenyo migawo ma Yesu nigo e chopo dwach Nyasaye. Ne otise ma ok odeko.​—Som Tich Joote 22:12-16.

11. (a) Ang’o ma chwalo jopuonjre Muma mondo obatisgi? (b) Wawinjoga nade sama waneno ka itiso joma ochiwore ne Jehova?

11 E kindegi bende, jopuonjre Muma mang’eny nigi gombo ma chalo kamano, bed ni gin joma tindo kata joma dongo. Joma nigi yie kendo mohero puonj mag Muma gi chunygi duto oikore chiwo ngimagi ne Jehova mondo obatisgi. Twak mar batiso en twak ma ji ritoga gi siso e chokruoge mag alwora kod mag ndalo adek. Joneno mag Jehova bedoga ma mor sama japuonjre Muma orwako adiera kendo otimo dongruok ma obatise. Donge jonyuol ma Jokristo bedoga ma mor sama gineno ka itiso nyithindgi? E higa mar tijwa mar 2017, ji mokalo 284,000 ma “chunygi ne ni kare” nochiwore ne Jehova ma obatisgi. (Tich 13:48) Onge kiawa ni jopuonjrego nong’eyo maler ni Jakristo nyaka batisi. Ne gikawo okenge mage mondo obatisgi?

12. Gin okenge mage ma japuonjre Muma nyaka kaw kapok obatise?

12 Nyaka ng’ato bed gi yie bang’ ng’eyo Nyasaye e yo malong’o, nyaka ong’e dwache, kod chenro ma en-go mar waro dhano. (1 Tim. 2:3-6) Yie ma kamano biro miyo japuonjre okwed timbe ma ok mor Nyasaye kendo oluw chike ma kare mag Jehova. (Tich 3:19) Onge kaka ng’ato nyalo wacho ni osechiwore ne Nyasaye to pod otimo timbe ma nyalo mone donjo e Pinyruodh Nyasaye. (1 Kor. 6:9, 10) Kata kamano, nitie gik mathoth ma dwarore moloyo mana luwo chike ma kare mag Jehova. Ng’at ma dwaro tiyo ne Jehova nyaka dhi e chokruoge mag kanyakla kendo oti tij lendo kod puonjo jomoko gi chunye duto. Yesu nowacho ni jolupne madier e ma ne dhi tiyo tijno. (Tich 1:8) Japuonjre nyalo chiwore ne Jehova gadier e lamo ma batise e nyim ji mana ka osekawo okenge mokwan-go.

CHENRO MA JOPUONJRE MUMA ONEGO OBEDGO

Be ing’eyo gimomiyo batiso en gima duong’, to be inyiso japuonjreni wachno? (Ne paragraf mar 13)

13. Ang’o momiyo onego waket wach batiso e paro sama wapuonjo jomoko Muma?

13 Sama wadhi nyime konyo nyithindwa kod jopuonjrewa mag Muma mondo okaw okenge ma dwarore, onego wang’e ni mondo ng’ato obed japuonjre Yesu madier nyaka batise. Ka wadhi nyime keto wachno e paro, wabiro konyo jopuonjrewa mag Muma e yo maber. Wabiro wuoyo kodgi e kinde mowinjore ka wanyisogi gimomiyo chiwruok kod batiso gin gik madongo. Kuom adier, wadwaro ni nyithindwa kod jopuonjrewa mamoko otim dongruok ma chop kama ibatisogi.

14. Ang’o momiyo ok onego wachun ng’ato mondo obatise?

14 Japuonjre Muma ok onego one ni janyuolne, japuonjne kata ng’ato ang’ata chune mondo obatise. Jehova ok dwar kamano. (1 Joh. 4:8) Kar mano, sama wapuonjogi, onego wajiwnegi gimomiyo dwarore ni gimak osiep gi Nyasaye. Ka japuonjre Muma ohero  adiera gi chunye duto kendo oikore timo gik moko duto ma Jakristo nyaka tim, mano biro chwale mondo obatise.​—2 Kor. 5:14, 15.

15, 16. (a) Be nitie higni ma ng’ato nyaka bedgo e ka batise? Ler ane. (b) Ang’o momiyo nyaka batis japuonjre Muma kodwaro bedo Janeno mar Jehova kata ka nosebatise e din machielo?

15 Onge higni ma ng’ato nyaka bedgo e ka batise. Jopuonjre ok chalre kendo gitimo dongruok e okang’ mopogore opogore. Nitie ji mang’eny ma nobatis ka gitindo kendo pod gidhi nyime tiyo ne Jehova gi chunygi duto. Jomoko to puonjore adiera mag Muma ka hikgi oseniang’, kata mana ka gin johigni 100 gi wiye!

16 Japuonjre Muma moro ma hike oseniang’ nopenjo japuonjne ka be nochuno ni nyaka batise, nikech noyudo osebatise e dinde mang’eny ma nosebedo kodhiye. Japuonjne nonono kode ndiko ma wuoyo e wi batiso. Ka ne japuonjreno oseng’eyo gik ma Muma wacho ni ng’ato nyaka tim kapok obatise, nobatise mapiyo bang’ mano. Kata obedo ni hike ne hawo 80, ne oneno ni batiso en gima duong’ ahinya e ngimane. Kuom adier, mondo obatis ng’ato, nyaka ong’e dwach Jehova e yo ma kare. Omiyo, jopuonjre manyien nyaka batis kata ka nosebatisgi e dinde mamoko ma ne gintie chon.​—Som Tich Joote 19:3-5.

17. Ang’o ma ng’ato onego opar matut e odiechieng’ ma idhi batisee?

17 Chieng’ ma itiso ng’ato en odiechieng mor. To bende en odiechieng’ ma ng’ato onego oparie matut gimomiyo ochiwore kendo ibatise. Ng’ato nyaka tim kinda ahinya mondo odhi nyime tiyo ne Jehova kosetise. Mano e momiyo Yesu nopimo gik ma Jakristo nyaka tim gi jok. Jokristo ok “dhi nyime bedo mangima ne dwachgi giwegi, to ne dwach jalo ma ne othonegi, kendo ma nochier.”​—2 Kor. 5:15; Mat. 16:24.

18. Gin penjo mage ma wabiro nono e sula ma luwo?

18 Min Maria ne nigi paro machalo kamano ka en openjo penjo manie paragraf mar ariyo. Kapo ni in janyuol, samoro isepenjori niya: ‘Be nyathina oseikore ne batiso adier? Be oseng’eyo puonj mag Muma e okang’ moromo ma nyalo miyo ochiwre ne Jehova? To nade chenro ma onyalo bedogo e wach somo kod manyo tich? Nade ka otis nyathina kae to chieng’ moro odonjo e richo mapek?’ E sula ma luwo, wabiro nono wechego kendo neno kaka jonyuol nyalo bedo gi paro mowinjore e wi batiso.