En karang’o ma ogendni biro landoe ni “kuwe nitie kendo weche beyo”?

Mana kaka ne waneno e “Penjo Moa Kuom Josombwa” ma nyocha ogo machiegni e Ohinga mar Jarito, a Jehova chiegni keto “pache” e chuny “tunge apar” (sirkende duto mag siasa) mondo gichiw loch kod tekogi ne “ondiek makwar” mochung’ne Riwruok mar Pinje. Ondiek ma kwarno bende iluongo ni “kido mar ondiegno.” (Fwe. 13:​14, 15; 17:​3, 16, 17) Kae to “tunge apar” kod ondiek ma ibiro mi teko biro tieko din mar miriambo e piny mangima. Be ogendni biro lando ni “kuwe nitie kendo weche beyo” b ka pok oketh dinde mag miriambo koso bang’ kosekethgi?—1 The. 5:3.

Koket e yo machuok, ok wang’eyo kinde sie ma ogendni biro landoe ni “kuwe nitie kendo weche beyo.” Ka po ni wanyalo ng’eyo wechego duto, to kare onge tiende bedo motang’ kendo siko ka waneno. Kata kamano, Yesu nonyiso jolupne nyadinwoya ni ‘gisik ka gineno.’ (Mat. 24:42; 25:13; 26:41) Koro, wanonuru ane weche moko ma nokor ma yudore e barua ma jaote Paulo nondiko ne Jo-Thesalonika.

Paulo nowacho niya: “E kinde ma giniwachie ni, ‘Kuwe nitie kendo weche beyo!’ eka kethruok ma apoya nobi kuomgi gikanyono.” (1 The. 5:​2, 3) Bugewa osebedo ka lero weche ma Paulo nowachogo kama: Lendo mar “kuwe nitie kendo weche beyo” ibiro land kinde matin ka pok masira maduong’ ochakore, to masirano biro chakore gi ketho Babulon Maduong’, mochung’  ne dinde duto mag miriambo. Bende, wasebedo ka wawacho ni ka gilando ni “kuwe nitie kendo weche beyo,” wabiro ng’eyo ni masira maduong’ chiegni chakore.

Kata kamano, bang’ nono wachni e yo matut, nenore ni nitie yo moro machielo ma onego wawinjgo tiend wechego. Nyalo bedo ni lendo mar “kuwe nitie kendo weche beyo” biro betie bang’ koseketh dinde mag miriambo. Ang’o momiyo wawacho kamano? Ne ane penjo ma luwogi.

Ere kaka dinde mag miriambo osedonjore e lwenje mag piny? Muma wacho kama: “Kuome [“jachode maduong’,” tiende ni Babulon Maduong’] ne oyudie remb . . . ji duto ma ne oneg e piny.” (Fwe. 17:​1, 5; 18:24) Kuom higni mang’eny, jachode maduong’no oseriwo lwedo lwenje mag ogendni kendo osemiyo oneg ji mathoth ahinya. Omiyo, osebedo ka okelo lwenje kod tungni mang’eny, to ok kuwe. Mano miyo wapenjore penjoni: Be ogendni biro lando ni “kuwe nitie kendo weche beyo” mana bang’ koseketh Babulon Maduong’? Mano nyalore, en mana ni ok wan gadier gi wachno.

Ang’o ma biro timore bang’ lendo mar “kuwe nitie kendo weche beyo”? Paulo nowacho niya: “Kethruok ma apoya nobi kuomgi gikanyono.” (1 The. 5:3) Weche mag timo nonro ma lero ndikoni wacho kama: “Weche ma Paulo nowachogo nyiso ni biro bedoe thuolo matin, kata samoro thuolo ok bi bedoe e kind lendo mar ‘kuwe nitie kendo weche beyo’ kod kethruok ma biro yudo joma lande. Wechego biro timore apoya kendo ok gibi yudo thuolo mar tony.” Ka riwruoge mag siasa biro lando ni “kuwe nitie kendo weche beyo” bang’ koseketh dinde mag miriambo, mano nyiso ni ogendnigo ibiro keth mapiyo bang’ mano.

Jotich Jehova biro timo ang’o e kinde ma wechego biro timoree? Paulo nowacho niya: “Un owete, ok un e mudho ma chieng’no dipou mana kaka ler mar odiechieng’ nyalo poyo jokuoge.” (1 The. 5:4) Par ane wachni: Ka po ni lendo mar “kuwe nitie kendo weche beyo” otim bang’ kethruok mar dinde mag miriambo, jotich Jehova biro ng’eyo ni kethruok mar ogendni okayo machiegni. Kata kamano, ogendnigo to biro neno kethruok ma kamano kaka gima obiro apoya mana ka jakuo.

Nitie wach moro ma wan-go gadier. E kinde ma biro, “tunge apar” kaachiel gi ondiek makwar biro ketho dinde mag miriambo. Mano e ma biro bedo chakruok mar masira maduong’. Bende, wang’eyo ni nitie kinde ma ogendni biro lando ni “kuwe nitie kendo weche beyo.” Mano biro timore karang’o? Wasewuoyo e wi kinde moko ariyo ma mano nyalo timoree. Mokwongo: Ginyalo lando ni “kuwe nitie kendo weche beyo” ka Jehova oketo pache e chunygi mondo gichiw loch kod tekogi ne Riwruok mar Pinje. Ginyalo timo kamano kinde matin ka pok gichiwo loch kod teko ne Riwruok mar Pinje, kata kinde matin bang’ ka gisechiwo lochgi. Kata kamano, mano biro timore ka pok giketho dinde mag miriambo. Mar ariyo: Samoro lendono nyalo betie bang’ ka riwruoge mag siasa oseketho Babulon Maduong’ chuth. We warit mondo wane kaka weche biro bedo. Kinde mang’eny, wanyaloga winjo tiend weche mokor e Muma sama gitimore kata bang’ ka gisetimore.—Pim gi Johana 12:16.

Gie sani, gima duong’ ok en kinde ma ibiro landie ni “kuwe nitie kendo weche beyo.” Kar mano, gima duong’ en siko ka wamakore motegno gi Nyasachwa. Nyaka ‘wasik ka waneno kendo waritre e pachwa,’ mondo wabed moikore kinde duto kata bed mana ni weche biro chalo nade.—1 The. 5:6.