ANG’O ma biro e pachi sama iwinjo kiwuoyo e wi “mwandu”? Samoro gima biro e pachi en pesa, puodho, kata mich moro ma joodu kata watni omiyi. Omiyo, mwandu en gima duong’ ahinya ma nyalo dwarore ni irit maber.

Muma luongo nyithindo ni “mwandu ma Jehova chiwo.” (Zab. 127:3) Jonyuol ma Jokristo neno nyithindgi kaka mich makende mowuok kuom Wuon-gi manie polo, kendo gitimo duto ma ginyalo mondo giritgi maber. Gibiro neno ni giyudo gige ringruok, gibedo gi ngima maber, kendo winjruokgi gi Nyasaye bende ber.

Kata kamano, gima lit en ni nitie jonyuol moko ma ok ne nyithindgi kaka mich moa kuom Nyasaye. (Isa. 49:15; 2 Tim. 3:​1-3) Jonyuol mamoko to dwaro ni girit nyithindgi e yo maber, en mana ni gin gi pek mopogore opogore. Gin pek kaka mage ma nyalo mono jonyuol rito nyithindgi e yo maber? Jehova dwaro ni jonyuol otim ang’o? Ere kaka jonyuol ma Jokristo nyalo rito nyithindgi e yo maber?

PEK MA JONYUOL YUDO

• Jonyuol moko ithung’o gi anyuola kod joodgi. Nitie kuonde moko ma jonyuol ma nigi nyithindo mang’eny imiyo luor moloyo jomamoko. Omiyo, joot kata jirende moko nyalo thung’o joma okendore mondo ginyuol nyithindo mang’eny moloyo ma ginyalo rito.

• Jonyuol moko parore e wi gik ma biro timorenegi ka giseti. E pinje moko ma nyithindo thoga ahinya ka pod gitindo nikech giremo chiemo ma gero dendgi, tuoche, kendo lakteche kata osiptende bende tinie, jonyuol moko nyuologa nyithindo mang’eny mondo kata ka moko otho to ginyalo dong’ie gi moko. Jonyuol moko nyalo yiero mondo gibed gi nyithindo mang’eny nikech mano nyalo miyo giyud arita maber e kinde ma giseti. Mano timorega ahinya e pinje ma sirkal ok chiw kony ne joma oseti.

• Jonyuol moko ok yud yore mowinjore mag komo nyuol. E alwora moko, jonyuol ok yud yore mabeyo mag komo nyuol. Moko to oluoro tiyo gi yore mag komo nyuol nikech chandruoge ma yorego nyalo kelonegi kata obedo ni yore mag komo nyuol yudore mayot. Jonyuol mamoko to ok nyal komo nyuol nikech bechgi ni malo. a

JEHOVA DWARO NI JONYUOL OTIM ANG’O?

Mi nyithindi gik ma dwarore e ngima. Jehova omiyo jonyuol ting’ mar miyo nyithindgi gik ma dwarore. Odwaro ni jonyuol oti matek mondo gimi nyithindgi chiemo, lewni, kod kar dak. Jehova bende dwaro ni jonyuol opuonj nyithindgi. Omiyo, jonyuol ma Jokristo ok ter  atera nyithindgi e skunde midakie kata mag boarding. Kar mano, gitemo ahinya mondo nyithindgi odag kanyachiel kodgi mondo gine ni nyithindogo oyudo somo mar skul kod arita maber ma miyo giwinjo ni onge gima nyalo hinyogi kendo ni ohergi. Kata kamano, Jehova ok gen ni jonyuol obed jomwandu. Jehova owuon noyiero jonyuol ma yutogi ne ni piny kendo ma ne tiyo matek mondo e ma orit Wuode mohero ahinya.—Mat. 13:​55, 56; Luka 2:24.

Puonj ma Muma chiwo: “Kuom adier, ka ng’ato ok chiw gik ma dwarore ne jo ma gin joge owuon, to moloyo jo ma gin joode, osekwedo yie kendo orach moloyo ng’at ma onge yie.”—1 Tim. 5:8.

Jehova ong’eyo maber ni jonyuol nyalo dwaro kony moko sama gimedo bedo moti. Kuom adier, yo achiel ma nyithindo nyalo nyisogo jonyuolgi luor en chano kaka ginyalo konyogi e kinde ma koro giseti. (Wuok 20:12; 1 Tim. 5:4) Kata kamano, Jehova mor sama jonyuol paro ahinya kaka ginyalo rito nyithindgi kar paro kaka nyithindgi biro ritogi.—2 Kor. 12:14.

Puonj nyithindi wach Nyasaye. Jonyuol ma Jokristo nigi ting’ mar puonjo nyithindgi mondo giher Jehova kendo lame. Jehova neno wach tiego nyithindo e weche Nyasaye kaka gima duong’ ahinya ma jonyuol nyalo miyo nyithindgi.—Rap. 6:​6, 7.

Puonj ma Muma chiwo: “Dhiuru nyime pidhogi [nyithindu] ka urieyogi kendo kupuonjogi kaka Jehova dwaro.”—Efe. 6:4.

JEHOVA OIKORE KONYI

Par maber kwan mar nyithindo ma diher bedogo. Ka po ni diher nyuolo nyithindo, par matut chal mari. Kuom ranyisi, be in gi pesa moromi pidho nyithindo mang’eny, miyogi chiemo, kendo konyogi mondo gisom? Ka ok en kamano, wuo gi jaodi e wi kwan mar nyithindo ma ka unyuolo, to pod ubiro bedo gi nyalo mar ritogi kaka Jehova dwaro. En adier ni Jehova ong’eyo ni seche moko gik moko ok timrega kaka ng’ato ochano. (Ekl. 9:11) Kata kamano, obiro guedho kinda duto ma itimo mondo ipidh nyithindi ka luwore gi dwache.

Puonj ma Muma chiwo: “Chenro mag jakinda kelo ohala, to ji duto ma rikni bedo modhier.”—Nge. 21:5.

 “En ng’a kuomu ma ka dwaro gero ot ma rabora to ok obi bet piny mondi kendo kwano nengo mondo one ka be onyalo tieko odno?”—Luka. 14:28.

Ket Jehova obed mokwongo e ngima mar joodi. Ne ni lamo Jehova e gima duong’ ahinya e ngima mar joodi. Ka po ni isebedo janyuol, kony nyithindi duto mondo giher Jehova. Konygi mondo gichik itgi maber sama gin e chokruoge mag kanyakla. Timuru lamo mar joot juma ka juma ma ok ubaru. Tieg nyithindi e tij lendo. Kik iwe ting’ mar rito nyithindi ne nyithindi mamoko madongo kata ne wedeni. Pidho nyithindo mondo giher Jehova en gima dwaro thuolo kod kinda, kata kamano, gueth to ng’eny ndi.

Puonj ma Muma chiwo: “Onge gima duong’ ma dimi abed mamor ma loyo wachni: ni asik ka awinjo ni nyithinda dhi nyime wuotho e adiera.”—3 Joh 4. b

Gen kuom Jehova. Bed ni sani in gi nyithindo kata iparo bedo gi nyithindo, bed gadier ni puonj mag Jehova e ma duong’ moloyo paro ma ji nigo e alworau.

Ka po ni iyiero bedo gi nyithindo matin, bed gadier ni Jehova pod biro riti ka iseti. Kik ibed gi paro ma ji mang’eny nigo ni ka in gi nyithindo mang’eny, to gibiro riti maber ka iseti. Kik ibed gi luoro moro ni ibiro jwang’i. Jehova osingo ni obiro riti, to kinde duto ochopoga singone.—Jos. 23:14.

Puonj ma Muma chiwo: “Gen Jehova gi chunyi duto, kendo kik igen kuom riekoni iwuon. Gen kuome e yoreni duto, eka enomi yoreni oriere tir.”—Nge. 3:​5, 6.

“Chakre tinna nyaka koro abedo moti, pok aneno kojwang’ ng’at makare, kata mana nyithinde ka kwayo chiemo.”—Zab. 37:25.

“Kuom mano, sikuru kudwaro mokwongo Pinyruoth kod gik makare mag Nyasaye, to gik mamokogo duto ibiro mednu.”—Mat. 6:33.

Nyithindo gin mich makende ma Jehova omiyo jonyuol. Mano kaka Jehova mor ahinya sama oneno ka jonyuol pidho nyithindgi e yo maber! Girito nyithindgi e yor ringruok, gikonyogi mondo gibed mamor kendo giher Jehova. Gichano kwan mar nyithindo ma gibiro bedogo kendo giketo dwach Nyasaye obed motelo ne paro mar anyuolagi kata ogandagi. Ka jonyuol ma Jokristo otimo kamano, ginyiso maler ni gigeno nyithindgi nikech nyithindo gin “mwandu ma Jehova chiwo.”