Obadia ne en jal ma ne otelo ne weche mag od Ruoth Ahab. Ahab ne en ruoth marach kendo ne oweyo mondo lamo mar Baal opong’ piny Israel. Kata kamano, Obadia ne en ng’at ma ne oluoro Jehova ‘chakre tinne.’ (1 Ru. 18:​1-13) Omiyo, ka ne Jezebel ma ne en chi ruoth ochiko mondo oneg jonabi duto mag Jehova, Obadia nong’eyo ni ne nyaka obed gi chir eka okony jonabigo. Pando kata mana janabi achiel en gima ne nyalo kelone masira; to e ma pod Obadia nopando jonabi 100 kendo miyogi chiemo e kinde kech! Par ane kaka ne en gima tek timo kamano ma ok ofwenye gi jonabi mag miriambo ma ne tiyo ne ruoth kod chi ruoth.—1 Ru. 18:19.

Ang’o ma wanyalo puonjore kuom Obadia? Obadia noluoro Nyasaye moloyo kaka ne oluoro Ahab. Luor ma kamano nomiyo obedo gi chir mar rito owetene kata obedo ni timo kamano ne nyalo miyo onege. Ka po ni ogo lamo madier marfuk e alworawa, wan bende onego wabed gi chuny mar luoro Nyasaye. Luor ma kamano biro miyowa teko mar konyo owetewa gi nyiminewa ma yudo chandruok.