Kal idhi e weche manie iye

Kal idhi kama ochanie weche mantie

Jehova Guedho Joma Dware gi Kinda

Jehova Guedho Joma Dware gi Kinda

“Ng’at ma sudo ir Nyasaye nyaka bed gi yie ni entiere, kendo ni en jachiw-mich ne joma manye gi kinda.”​—HIB. 11:6.

WENDE: 85, 134

1, 2. (a) Hera kod bedo gi yie otudore nade? (b) Gin penjo mage ma wadwa nono?

WAHERO Jehova “nikech en e ma nokwongo herowa.” (1 Joh. 4:19) Achiel kuom yore monyisogo ni ohero jotichne momakore kode en kuom guedhogi. Kaka wamedo hero Nyasaye e kaka wamedo bedo gi yie motegno ni entie kendo ni oguedho jotichne mohero.​—Som Jo-Hibrania 11:6.

2 Jehova guedhoga jotichne kinde duto. Mondo wabed gi yie motegno chuth, nyaka wabed gadier ni Nyasaye biro guedho joma dware gi kinda nikech “yie en bedo gadier chuth kuom gik migeno.” (Hib. 11:1) Bedo gi yie oriwo bedo gadier ni Nyasaye biro chopo gik mosingo duto. Kata kamano, bedo gi geno mar yudo gueth konyowa nade? Jehova noguedho jotichne nade kinde mosekalo, to oguedhogi nade e kindegi? Wane ane.

JEHOVA SINGO NI OBIRO GUEDHO JOTICHNE

3. En singo mane ma yudore e Malaki 3:10?

3 Jehova Nyasaye osesingore ni obiro guedho jotichne momakore kode, omiyo ogwelogi ni gimany guethgo gi kinda.  Muma wacho kama: “Temauru koro . . . Jehova mar ogendini owacho, une ka ok nayawnu dirishini mag polo, kendo olonu gweth, ma kinde ok nobedie munyalo yiego.” (Mal. 3:10) Wanyiso ni wamor kendo wagoyo erokamano sama wayie gi gik ma Jehova omiyowa.

4. Ang’o momiyo wanyalo bedo gadier gi weche ma Yesu nowacho e Mathayo 6:33?

4 Yesu nosingo ne jopuonjrene ni ka giketo Pinyruoth obed mokwongo, to Nyasaye ne dhi konyogi. (Som Mathayo 6:33.) Nowacho kamano ka en gadier nikech nong’eyo ni Jehova en Nyasaye migeno. Nong’eyo ni singo mag Jehova pok nobarega nyaka nene. (Isa. 55:11) Wan bende wanyalo bedo gadier ni ka wabedo gi yie motegno kuom Jehova, obiro timonwa kaka nosingo niya: “Ok anaweu ngang’, kendo ok anajwang’u ngang’.” (Hib. 13:5) Wanyalo tudo ndikono gi gima Yesu nowacho ni onego waket Pinyruoth kod tim makare mar Nyasaye obed mokwongo.

Yesu nowacho ni jopuonjrene ne dhi yudo gueth nikech chiwruok margi (Ne paragraf mar 5)

5. Ang’o momiyo dwoko ma Yesu nomiyo Petro jiwo yiewa?

5 Jaote Petro nopenjo Yesu niya: “Ne! Waseweyo gik moko duto mi waluwi; kare wan to en ang’o ma wanayud?” (Mat. 19:27) Yesu ne ok odhaw ne Petro nikech penjono, kar mano nonyiso jopuonjrene ni ne idhi guedhgi nikech chiwruok margi. Jootenego kaachiel gi jomamoko biro locho gi Yesu e polo. Kata mana e kindegi, Jehova pod guedho jotichne. Yesu nowacho niya: “Ng’ato ang’ata moseweyo utene, kata owetene, kata nyiminene, kata wuon-gi,  kata min-gi, kata nyithinde, kata puothene nikech nyinga, nonwang’ mago nyadi mia momedore, kendo noyud ngima mochwere.” (Mat. 19:29) Jopuonjre Yesu ne dhi yudo gueth mang’eny moloyo gik ma ne ginyalo weyo mondo gitine Jehova. Donge yudo joma wanyalo luongo ni wuone, mine, owete, nyimine, kod nyithindo e riwruok mar oganda Jehova en gima duong’ moloyo gimoro amora ma waweyo mondo waket Pinyruoth mokwongo?

‘NANGA MOSIRO NGIMAWA’

6. Ang’o momiyo Jehova osingo ne jotichne mich?

6 Gueth ma Jehova osingo ne jotichne konyogi mondo gichung’ motegno sama giromo gi tembe. Mopogore gi gueth ma jotich Jehova yudo e kindegi, girito gi siso yudo gueth modhuro e kinde ma biro. (1 Tim. 4:8) Bedo gadier chuth ni Jehova en “jachiw-mich ne joma manye gi kinda” biro konyowa mondo wasik ka wan gi yie motegno.​—Hib. 11:6.

7. Ere kaka geno ma wan-go chalo gi nanga?

7 Yesu nowacho kama e twak ma nogolo e wi got: ‘Moruru kendo beduru moil ahinya nimar pok maru duong’ e polo, nimar kamano e kaka ne gisando jonabi ma notelonu.’ (Mat. 5:12) Mopogore gi joma biro yudo pok margi e polo, geno mar yudo ngima mochwere e paradiso e piny en gima morowa kendo miyo ‘wabedo moil.’ (Zab. 37:11; Luka 18:30) Bed ni wan gi geno mar dhi e polo kata dak e piny, geno ma wan-go chalonwa kaka “nanga mar meli mosiro ngimawa; en geno madier, kendo motegno.” (Hib. 6:17-20) Mana kaka nanga konyo meli mondo ochung’ motegno sama yamo mager kod apaka nie e nam, e kaka geno mar yudo pok nyalo konyowa mondo wadhi nyime chung’ motegno ka wan gi winjruok maber gi Nyasaye. Genono biro miyowa teko mar nano e kinde ma weche tek.

8. Ere kaka geno ma wan-go nyalo konyowa duoko parruok chien?

8 Geno ma Muma miyowa nyalo konyowa duoko chien parruok ma wanyalo bedogo e kindegi. Gik ma Nyasaye osingonwa kweyo chunywa mondo kik wabed gi parruok mang’eny. ‘Keto ting’ magwa kuom Jehova’ en gima hoyowa nikech wang’eyo ni obiro konyowa. (Zab. 55:22) Wan gadier chuth ni Nyasaye nyalo “timo weche duto mokadho ma wakwayo kata ma waparo.” (Efe. 3:20) Parie wachno! Jehova nyalo timonwa gik moko duto “mokadho ma wakwayo”!

9. Ere kaka wanyalo bedo gadier ni Jehova biro guedhowa?

9 Mondo Jehova oguedhwa, nyaka wabed gi yie motegno kuome kendo wabed moikore luwo kaka ochikowa. Musa nonyiso oganda mar Jo-Israel kama: “Jehova nogwedhi e piny ma Jehova Nyasachi omiyi, mondo obed mwandu mikawo; kiwinjo mana dwond Jehova Nyasachi, kendo ine kitimo chikni duto ma koro achikoi tinende. Nikech Jehova Nyasachi nogwedhi, mana kaka nosingoni.” (Rap. 15:4-6) Be in gadier ni Jehova biro guedhi ka idhi nyime tiyone ma ok iwe? Inyalo bedo gadier gi wachno.

JEHOVA NOGUEDHOGI

10, 11. Jehova noguedho Josef nade?

10 Muma nondik mondo okonywa. Oting’o ranyisi mathoth ma nyiso kaka Nyasaye noguedho jotichne ma nomakore kode. (Rumi 15:4) Josef ne en achiel kuomgi. Owetene ne ouse mondo  obed misumba kae to bang’e chi ruodhe bende nohangone thuon wach ma otweye e jela. Be Nyasaye nojwang’e? Ooyo! “Jehova ne ni kod Josef, monyise ng’wono . . . Jehova ne ni kode; kendo mano ma notimo Jehova nomiyo obedo maber.” (Cha. 39:21-23) E kinde matekgo, Josef nodhi nyime rito Jehova mondo okonye.

11 Higni moko bang’e, Farao nogolo Josef e jela mokete obedo jalupne e loch mar piny Misri. (Cha. 41:1, 37-43) Ka ne chi Josef onyuolone jowuoyi ariyo, ‘nying wuode makayo noluongo ni Manase kowacho ni, Nyasaye osemiyo wiya wil gi chandruokna duto, gi jood wuora duto. To nying jal mar ariyo noluongo ni Efraim kowacho ni, Nyasaye osemiya nyak e piny mar chandruokna.’ (Cha. 41:51, 52) Nyasaye noguedho Josef nikech nomakore kode, to mano nomiyo Nyasaye otiyo kode moreso ngima Jo-Israel kod Jo-Misri ka ne kech mager okwako piny. Gima duong’ en ni Josef nofwenyo ni Jehova e ma noguedhe.​—Cha. 45:5-9.

12. Ang’o ma nokonyo Yesu mondo osik komakore gi Nyasaye ka ne oromo gi tembe?

12 Yesu Kristo bende nomakore gi Nyasaye e kinde ma noromo gi tembe mopogore opogore kendo en bende Nyasaye noguedhe. Ang’o ma nokonye mondo onan? Muma wachonwa kama: “Nikech mor maduong’ ma ne oket e nyime, ne onano e yadh-sand ka ochayo wich-kuot.” (Hib. 12:2) Onge kiawa ni keto nying Nyasaye obed maler nomiyo Yesu obedo mamor. E wi mano, noyudo pok nimar Wuon mare noyie kode kendo noyudo migepe mabeyo miwuoro. Muma wacho ni “osebet piny e bat korachwich mar kom-loch mar Nyasaye.” Kendo Muma medo wacho kama: “Nyasaye ne omiye migawo ma malo moloyo, kendo nomiye nying moloyo nyinge mamoko duto.”​—Fil. 2:9.

WI JEHOVA OK NYAL WIL GI GIK MA WATIMO

13, 14. Jehova neno nade gik ma watimone?

13 Wan gadier ni Jehova mor ahinya gi kinda ma watimo mondo watine. Ong’eyo maber luoro kata kiawa ma wanyalo bedogo. Okechowa sama wan gi pek mag yuto kata sama tuwo kata parruok monowa tiyone e okang’ ma wadwaro. Wang’eyo ni Jehova ogeno ahinya gik ma jotichne timo mondo gisik ka gimakore kode.—Som Jo-Hibrania 6:10, 11.

14 Wiwa kik wil bende ni wanyalo chopo ir ‘Jawinj kwayo mag ji’ ka wan gadier ni obiro winjo gik ma chandowa. (Zab. 65:2) “Wuoro ma kecho ji kendo Nyasach hoch duto” biro konyowa e yore duto mondo wadhi nyime tiyone kendo samoro onyalo konyowa kotiyo gi Jokristo wetewa. (2 Kor. 1:3) Jehova bedo mamor sama wan bende wakecho jomoko. ‘Ng’a makecho jochan oholo ni Jehova kendo nochule gi mosetimo maber.’ (Nge. 19:17; Mat. 6:3, 4) Omiyo, sama wachiwore mar konyo joma nigi chandruok, Jehova neno gima watimono kaka gowi monego ochulwa. Osingo ni obiro guedhowa nikech gima watimono.

GUETH E KINDEGI KOD KINDE MABIRO

15. Gin gueth mage ma wageno yudo? (Ne picha manie chak sulani.)

15 Gima tego Jokristo mowal en geno mar yudo ‘osimbo mosekannegi mimiyo joma kare, ma Ruodhwa ma en jang’ad-bura makare biro miyogi kaka pokgi chieng’no.’ (2 Tim. 4:7, 8) Kata kamano,  bedo gi geno mar dak e piny ok nyis ni koro Nyasaye ochayi. “Rombe mamoko” mag Yesu ma kwan-gi chopo milionde nigi geno mar dak nyaka chieng’ e paradiso e piny. E paradiso kanyo, “ginimor moloyo kuom kuwe mang’eny.”​—Joh. 10:16; Zab. 37:11.

16. Ndiko mar 1 Johana 3:19, 20 jiwowa nade?

16 Samoro wanyalo paro ni watiyo ne Jehova e okang’ matin ahinya, kata ni ok omor gi kinda ma wan-go e tiyone. Wanyalo kata bedo gi kiawa ka be wawinjore yudo gueth moro amora. Gima wiwa ok onego owilgo en ni “Nyasaye duong’ moloyo chunywa kendo ong’eyo gik moko duto.” (Som 1 Johana 3:19, 20.) Ka watiyo ne Jehova nikech wan gi yie kuome kendo nikech wahere, wan gadier ni obiro guedhowa kata bed ni gima watimone nyalo nenorenwa ka gima tin ahinya.​—Mar. 12:41-44.

17. Moko kuom gueth ma wayudo sani gin mage?

17 Kata mana e ndalo giko ma Satan lochoeni, Jehova pod guedho joge. Opuonjo jotichne gik mathoth kendo omiyo gibedo mamor e riwruokgi mar owete e piny mangima. (Isa. 54:13) Mana kaka Yesu nosingo, Jehova guedhowa e kindegi kuom miyowa thuolo mar bedo e kind owete gi nyimine moherowa kendo ma yudore e piny mangima. (Mar. 10:29, 30) E wi mano, Jehova guedho joma dware gi kinda kuom miyogi chuny mokuwe kod mor.​—Fil. 4:4-7.

18, 19. Jotich Jehova winjo nade kuom kaka Jehova oseguedhogi?

18 Jotich Jehova e piny mangima oyie ni Jehova oseguedhogi e yo miwuoro. Kuom ranyisi, nyaminwa miluongo ni Bianca ma wuok Germany nowacho niya: “Ago ne Jehova erokamano maduong’ ahinya kuom konya loyo parruok kendo kuom konya odiechieng’ kodiechieng’. Piny omer oko ka. To kaka amedo tiyo kanyachiel gi Jehova, e kaka amedo winjo ka an gi kuwe e chunya. Samoro amora ma achiwora ne Jehova, oolonaga gueth mogundho.”

19 Kata par ane ranyisi mar nyaminwa moro modak e piny Kanada miluongo ni Paula. En jahigni 70 kendo en gi tuwo moro miluongo ni spina bifida momako lihumbrune. Owacho kama: “Kata obedo ni ok anyal wuotho ahinya, mano ok osemona tiyo tij lendo. Atiyo gi yore mopogore opogore mag lendo, kaka tiyo gi simo kod lendo sama an e dijena. An gi buga moro ma andikoe ndiko mopogore opogore kod weche moko ma agolo e bugewa kendo ajasomogiga kinde ka kinde mondo gijiwa. Aluongega ni ‘Buk ma Resa.’ Gik ma nyoso chunywa gin gik ma kalo kapo ni waketo pachwa kuom gik ma Jehova osingonwa. Jehova oikore konyowa kinde duto kata bed ni wan e chal mane.” Samoro pek mikale nyalo pogore gi mar Bianca kata mar Paula. Kata kamano, inyalo paro yore ma Jehova oseguedhigo kod kaka oseguedho jomamoko ming’eyo. Mano kaka en gima ber paro kaka Jehova guedhi kindegi kod kaka obiro guedhi kinde ma biro!

20. Wageno yudo ang’o ka wadhi nyime tiyo ne Jehova gi chunywa duto?

20 Kik wiyi wil ni Jehova biro guedhi kuom dwoko lamo magi. Bed gadier ni ‘ka isetimo dwaro mar Nyasaye, gik ma ne osing nochopni.’ (Hib. 10:35, 36) Kuom mano, wadhiuru nyime tego yiewa kendo tiyo ne Jehova gi chunywa duto. Wabiro timo kamano nikech wang’eyo ni Jehova biro guedhowa e kinde mowinjore.​—Som Jo-Kolosai 3:23, 24.