Kal idhi e weche manie iye

Kal idhi kama ochanie weche mantie

 SULA MAR PUONJRUOK 17

Bed Gadier ni Jehova Oheri!

Bed Gadier ni Jehova Oheri!

“Jehova ohero joge.”​—ZAB. 149:4.

WER 108 Hera mar Nyasaye

GIMA SULANI WUOYE *

Wuonwa ma ni e polo “ohero” ng’ato ka ng’ato kuomwa (Ne paragraf mokwongo)

1. Ang’o ma Jehova neno kuom joge?

JEHOVA NYASAYE “ohero joge” ahinya. (Zab. 149:4) Mano en wach ma morowa sidang’! Jehova neno kido mabeyo ma wan-go, oneno nyalo ma wan-go mar timo gik ma more, kendo oikore konyowa mondo wabed osiepene. Ka wasiko ka wamakore kode, en bende obiro siko ka omakore kodwa nyaka chieng’!​—Joh. 6:44.

2. Ang’o momiyo jomoko nyalo yudo ka teknegi yie ni Jehova oherogi?

2 Jomoko nyalo wacho ni, ‘Ang’eyo ni Jehova ohero joge kaka oganda, kata kamano, ere kaka anyalo bedo gadier ni ohera an awuon?’ Ang’o ma nyalo miyo ng’ato openjre penjono? Nyaminwa Oksana, * ma nokalo e chandruoge mang’eny ka notin wacho kama: “Namor ahinya ka nobatisa mi abedo painia. Kata kamano, higni 15 bang’e, nachako paro gik maricho ma notimorena ka ne pod atin. Nachako paro e chunya ni Jehova ne ok nyal yie koda kendo ni ne ok ohera.” Nyaminwa moro miluongo ni Yua ma en painia, ma bende nokalo e chandruoge mang’eny ka ne pod otin wacho kama: “Nachiwora ne Jehova mi obatisa nikech nadwaro ni amor chunye. Kata kamano, nang’eyo ni Jehova ok nyal hera.”

3. Ang’o ma wadwa nono e sulani?

3 Mana kaka Jokristo ma wasewuoyoego, in bende ihero Jehova gi chunyi duto, kata kamano, nyalo bedo ni in gi kiawa moko ka be oheri adier. Ang’o momiyo dwarore ni ibed gadier ni Jehova oheri? To ang’o ma inyalo timo sa asaya ma ichako paro ni Jehova ok oheri? We wanon ane dwoko mag penjogo.

 BEDO GI KIAWA KA BE JEHOVA OHEROWA NYALO HINYOWA

4. Ang’o momiyo bedo gi kiawa ka be Jehova oherowa nyalo hinyowa?

4 Hera nigi teko ahinya. Ka wan gadier chuth ni Jehova oherowa kendo osirowa, wabiro tiyone gi chunywa duto kata ka waromo gi chandruoge e ngimawa. Komachielo, ka wan gi kiawa ka be Jehova oherowa kendo odewowa, ‘tekowa biro bedo manok.’ (Nge. 24:10) Bende, ka chunywa onyosore mi wachako paro ni Jehova ok oherowa, biro bedo mayot mondo Satan omonjwa.​—Efe. 6:16.

5. Ang’o ma notimore ne owete gi nyimine moko ma ne paro ni Jehova ok oherogi?

5 Nitie owetewa gi nyiminewa moko ma paroga ni Jehova ok oherogi kata dewogi, to mano osemiyo yiegi ochako dok chien. Owadwa moro miluongo ni James ma en jaduong’-kanyakla wacho kama: “Kata obedo ni ne atiyo e Bethel, kendo ne amor bedo e kanyakla ma ne itiyoe gi dhok ma wendo, pod napenjoraga ka be Jehova noyie gi yo ma natiyonego. Nochopo kama nachako bedo gi kiawa ka be Jehova ne winjoga lamo maga.” Nyaminwa Eva ma bende tiyo ne Jehova kuom thuolone duto wacho kama: “Nafwenyo ni bedo gi kiawa ka be Jehova oherowa en gima nyalo kelonwa hinyruok ahinya nikech omiyo kinda ma ng’ato nigo dok chien. Mano miyo ng’ato winjo ka chiemb chuny both bothne, kendo miyo ok obed mamor sama otiyo ne Jehova.” Jaduong’-kanyakla moro miluongo ni Michael ma bende en painia wacho kama: “Ka ok in gadier ni Jehova dewi, mos-mos ibiro bayo yo miweye.”

6. Ang’o ma nyaka watim ka wachako paro ni Jehova ok oherowa?

6 Ranyisi ma wanenogo nyiso maler ni ka wabedo gi kiawa ka be Jehova oherowa, yiewa nyalo dok chien. Ang’o ma onego watim sama wachako bedo gi kiawa e pachwa ka be Jehova oherowa? Nyaka waruch paro ma kamano mapiyo! Kwa Jehova mondo okonyi golo ‘gik ma pachi parogo’ kendo iwilgi gi ‘kuwe ma loyo ng’eyo duto ma biro rito chunyi kod pachi.’ (Zab. 139:23; Fil. 4:6, 7) Par bende ni ok in kendi e ma inyagori gi paro ma kamago. Nitie owete gi nyimine mang’eny ma bende nyagore kamano. To kata mana jotich Jehova machon bende nonyagore gi paro ma kamago. Ne ane gik ma wanyalo puonjore kuom ranyisi mar jaote Paulo.

 GIK MA WAPUONJORE KUOM RANYISI MAR PAULO

7. Gin chandruoge mage ma Paulo ne nyagorego?

7 Be samoro iwinjoga ka ting’ ma in-go othung’i ahinya ma ok inyal timogi giduto? Ka en kamano, ibiro fwenyo ni kare gik ma timoreni chal gi ma notimore ne Paulo. Ne en gi parruok, ok mana ne kanyakla achiel kende, to “ne kanyakla duto.” (2 Kor. 11:23-28) Be dibed ni in gi tuo moro ma mayi mor? Paulo bende ne nigi ‘kudho moro ma ne chuoyo ringrene’ ma nyalo bedo ni ne en tuo moro, kendo nogombo ahinya mondo tuono orum. (2 Kor. 12:7-10) Be samoro iwinjoga ka chunyi onyosore nikech nyawo moko ma in-go? Nitie seche ma Paulo bende ne winjoga kamano. Nowacho ni ne en ng’at ma chandore nikech nosiko kokedo gi nyawo ma ne en-go.​—Rumi 7:21-24.

8. Ang’o ma nokonyo Paulo mondo onyagre gi chandruogene?

8 Kata obedo ni Paulo nokalo e tembe kod chandruoge ma ne nyalo nyoso chunye, nodhi nyime tiyo ne Jehova. Ang’o ma nokonye? Nong’eyo nyawo ma ne en-go, kata kamano, pod ne en gi yie motegno kuom misango ma Yesu nochiwo. Nong’eyo weche ma Yesu nosingo ni ‘ng’at ma nyiso yie kuome, nobed gi ngima ma nyaka chieng’.’ (Joh. 3:16; Rumi 6:23) Onge kiawa ni Paulo ne nigi yie motegno kuom misango ma Yesu nochiwo. Ne en gadier chuth ni Jehova oikore ng’wonone jaricho moro amora moloko chunye.​—Zab. 86:5.

9. Ang’o ma wapuonjore e weche ma Paulo nondiko e Jo-Galatia 2:20?

9 Paulo ne nigi yie ni Nyasaye nohere ahinya nikech Nyasaye nooro Yesu mondo othone. (Som Jo-Galatia 2:20.) Ne ane weche mogik motiekogo wesno. Paulo nowacho kama: “Wuod Nyasaye . . . nohera kendo chiwore owuon ne an.” Paulo notemo mondo kik opar ni en ng’at marach ahinya ma Jehova ne ok nyal hero. Ne ok owacho e chunye ni, ‘Anyalo neno maler gimomiyo Jehova ohero owetena, kata kamano, an to ok onyal hera.’ Paulo noparo ne Jokristo ma Rumi kama: “Ka ne pod wan joricho, Kristo ne othonwa.” (Rumi 5:8) Onge gimoro amora ma nyalo mono Jehova hero joma ohere!

10. Ang’o ma wapuonjore e weche ma ni e Jo-Rumi 8:38, 39?

10 Som Jo-Rumi 8:38, 39. Paulo ne ni gadier ni Nyasaye nohere ahinya. Nondiko ni onge gimoro amora ma nyalo “pogowa gi hera mar Nyasaye.” Paulo nong’eyo maber kaka Jehova nohore gi oganda mar Jo-Israel. Bende,  nong’eyo kaka Jehova ne ng’won kode en owuon. E yo machuok gima Paulo ne temo wacho en ma, ‘Ka Jehova ne nyalo oro wuode mondo othona, be nitie gimoro amora ma di mi abed gi kiawa ka be ohera?’​—Rumi 8:32.

Gima duong’ ma Jehova ng’iyo en gik mwatimo sani kod mwabiro timo e kinde ma biro, to ok ketho ma ne watimo chon (Ne paragraf mar 11) *

11. Kata obedo ni Paulo notimo richo kaka miwuoyoe e 1 Timotheo 1:12-15, ang’o momiyo pod ne en gadier ni Jehova nohere?

11 Som 1 Timotheo 1:12-15. Nyalo bedo ni nitie seche ma Paulo ne winjoga marach ahinya e chunye nikech gik ma notimo ka pok nobedo Jakristo. Nokwanore kaka “jaricho ma rachie moloyo” kuom joricho te! Wanyalo ng’eyo gimomiyo nowinjo kamano. Ka ne pok opuonjore adiera, Paulo notimo kinda ahinya e sando Jokristo koa e taon moro kodhi e machielo, kendo notueyogi e jela. Bende, nogoyo nyaka ombulu mondo oneg moko kuomgi. (Tich 26:10, 11) Tem ane paro kaka Paulo ne nyalo winjo e chunye ka nonyalo romo gi rawera moro ma samoro en e ma nomiyo oneg jonyuolne? Paulo ne winjo marach nikech gik ma notimo chon, kata kamano, nong’eyo ni onge gima nonyalo loko e gik ma nosetimogo. Noyie ni Yesu nothone kendo nondiko gi chir niya: “Kuom ng’wono mogundho mar Nyasaye an gima sani an.” (1 Kor. 15:3, 10) Ang’o ma wapuonjore kuom wachni? Bed gadier ni Kristo nothoni, kendo noyawoni yo mar bedo gi osiep maber gi Jehova. (Tich 3:19) Gima duong’ ma Jehova ng’iyo en gik mwatimo sani kod mwabiro timo e kinde ma biro, to ok ketho ma ne watimo chon bed ni ne wan Joneno mag Jehova e kindego kata ooyo.​—Isa. 1:18.

12. Ere kaka weche ma ni e 1 Johana 3:19, 20 nyalo konyowa sama wawinjo ni wan joma nono kendo ni Nyasaye ok nyal herowa?

12 Sama iparo kaka Yesu notho nikech richoni, samoro inyalo wacho e chunyi ni, ‘An misangoneno ok nyal konya.’ Ang’o ma nyalo  miyo ichak paro kamano? Chunywa morem nyalo wuondowa mi wachak paro ni wan joma nono e wang’ Nyasaye, kendo ni ok onyal herowa. (Som 1 Johana 3:19, 20.) Sama wachako winjo kamano, onego wang’e ni “Nyasaye duong’ moloyo chunywa.” Kata bed ni wawinjo nade e chunywa, Wuonwa ma ni e polo to pod oherowa kendo oikore weyonwa richowa. Onego watem ahinya mondo watim gik mabiro miyo wabed gadier ni Jehova oherowa. Gigo oriwo puonjruok Muma gi kinda, wuoyo gi Jehova e lamo nyading’eny, kendo mako osiep gi joma ohero Jehova. Ang’o momiyo dwarore ni watim gigo?

KAKA PUONJRUOK MUMA, LAMO, KOD MAKO OSIEP GI JOMA OHERO JEHOVA NYALO KONYOWA

13. Ere kaka puonjruok Wach Nyasaye nyalo konyowa? (Ne bende sanduk ma wiye wacho ni “ Kaka Wach Nyasaye Osekonyogi.”)

13 Puonjri Wach Nyasaye pile ka pile mondo ine kido mag Jehova e yo ma ber moloyo. Ibiro fwenyo ni kare oheri malich ahinya. Sama iparo matut kuom weche mipuonjori e Wach Nyasaye pile ka pile, mano biro konyi neno gik moko e yo maler, kendo rieyo paro moko ma ok kare minyalo bedogo e chunyi. (2 Tim. 3:16) Jaduong’-kanyakla moro miluongo ni Kevin ma kinde moko ne paro ni en ng’at ma nono wacho kama: “Ka nasomo Zaburi 103 kendo paro matut kuome, nafwenyo paro ma Jehova nigo kuoma.” Nyaminwa Eva ma a wasewuoyo kuome motelo wacho kama: “E giko odiechieng’ kodiechieng’, atemoga mondo abed kama okuwe ka aparo weche Jehova. Mano miyo abedoga gi chuny mokuwe kendo yiena medo bedo motegno.”

14. Lamo nyalo konyowa nade?

14 Lem nyading’eny. (1 The. 5:17) Mondo osiep ma ni e kindwa gi dhano wetewa odhi maber, nyaka wawuoga nyading’eny, kendo watim kamano kowuok e chunywa. Mano bende e gima nyaka watim mondo warit osiep ma ni e kindwa gi Jehova. Sama wawuoyo kode e lamo ka wanyise kaka wawinjo e chunywa, gik ma waparo, kaachiel gi gik ma chandowa, wanyiso ni wan gi yie motegno kuome kendo ni wan gadier ni oherowa. (Zab. 94:17-19; 1 Joh. 5:14, 15) Nyaminwa Yua ma a wasewuoyo kuome motelo wacho kama: “Sama alemo, ok anyisga Jehova mana gik ma notimorena e odiechieng’no kende, to anyisega nyaka weche ma ni e chunya ma iye. Mano osekonya neno Jehova kaka Wuoro mohero nyithinde gadier, to ok mana kaka jatend kambi moro.”​—Ne sanduk ma wiye wacho ni “ Be Isesome?

15. Jehova osenyiso nade ni odewowa?

15 Bed machiegni gi joma omakore gi Jehova nikech gin mich ma Jehova omiyi. (Jak. 1:17) Wuonwa ma ni e polo osenyiso ni odewowa kuom miyowa owete gi nyimine ‘moherowa  ndalo duto.’ (Nge. 17:17) E barua ma Paulo nondiko ne Jo-Kolosai, nowuoyo kuom Jokristo moko ma nosire kowacho ni ne gihoyo chunye ahinya. (Kol. 4:10, 11) Kata Yesu bende ne dwaro ni osiepene ojiwe kendo osire, bed ni ne gin dhano wetene kata malaike.​—Luka 22:28, 43.

16. Ere kaka osiepe momakore gi Jehova nyalo konyowa sudo machiegni kode?

16 Be iyiega mondo Jokristo weteni momakore gi Jehova okonyi? Sama wanyiso Jakristo moro motegno chandruok moro ma wan-go, mano ok nyis ni wayom yom. Timo kamano nyalo konyowa kendo ritowa. Ne ane gima James ma ne wasewuoyo kuome motelo wacho: “Mako osiep gi Jokristo motegno osekonya ahinya. Sa asaya ma an-gi paro ma ok kare, gichikona itgi, gihore koda, kendo giparonaga kaka gihera. Kokalo kuomgi, anyalo neno maber ni Jehova ohera awuon kendo odewa.” To mano kaka en gima ber mondo wabed gi osiep motegno gi owetewa kod nyiminewa, kendo wasik ka wamakore kodgi!

SIK E HERA MAR JEHOVA

17-18. En ng’a monego wachikne itwa, to nikech ang’o?

17 Satan dwaro ni wawe timo gik mabeyo. Odwaro ni wapar ni Jehova ok oherowa kendo ni wan joma nono ma Jehova ok nyal reso. To mana kaka waseneno e sulani, mano miriambo maduong’!

18 Jehova oheri kendo ogeni ahinya. Ka itimo gik ma odwaro, ‘ibiro siko e herane’ nyaka chieng’ mana kaka Yesu. (Joh. 15:10) Kik ichik iti ne miriambo mag Satan, bende kik chunyi wuondi ni in ng’ama nono ma Jehova ok nyal hero. Kar mano, chik iti ne gik ma Jehova wacho nikech en oneno gik mabeyo kuom ng’ato ka ng’ato. Bed gadiera chuth ni “Jehova ohero joge” moriwo nyaka in!

WER 141 Ngima En Hono

^ par. 5 Nitie owetewa gi nyiminewa moko ma yudo ka teknegi yie ni Jehova oherogi. E sulani, wabiro wuoyo e wi gik ma nyalo miyo wabed gadier ni Jehova oherowa ng’ato ka ng’ato. Bende, wabiro nono matut kaka wanyalo golo kiawa moro amora mwanyalo bedogo e chunywa ka be Jehova oherowa kata ooyo.

^ par. 2 Nyinge moko oloki.

^ par. 67 WECHE MA LERO PICHNI: E kinde machon, Paulo nomiyo otue Jokristo mang’eny e jela. Bang’e, ka noyie gi gima Yesu nosetimone, noloko kit ngimane, kendo nojiwo Jokristo wetene ma samoro moko kuomgi ne gin wede joma nosando chon