Kal idhi e weche manie iye

Kal idhi kama ochanie weche mantie

 SULA MAR 33

Yesu Chopo Wach ma Janabi Isaya Nokoro

Yesu Chopo Wach ma Janabi Isaya Nokoro

MATHAYO 12:15-21 MARIKO 3:7-12

  • OGANDA RIYORE MONDO GIMUL YESU

  • YESU CHOPO WACH MA JANABI ISAYA NOKORO

Bang’ fwenyo ni Jo-Farisai gi jolup Herode chano mondo ginege, Yesu kaachiel gi jopuonjrene giwuok mondo gidhi e Nam Galili. Oganda wuok kuonde mopogore opogore kendo gibiro ire. Giwuok Galili, gi Tiro kod Sidon ma gin taonde manie dho nam. Bende, giwuok loka yo Wuok Chieng’ mar Aora Jordan, gi Jerusalem, kod mwalo Idumea. Yesu chango thothgi ma tuore. Nikech mano, ng’eny joma nigi tuoche madongo riyore mondo gichop ire. Ok girit mondo Yesu omulgi. Gitemo ahinya mondo gimule.​—Mariko 3:9, 10.

Ogandano bedo maduong’ ahinya ma chopo kama Yesu wacho ne jopuonjrene ni giikne yie moro matin monyalo dhigo ka i nam matin mondo oganda kik thung’e. Bende, onyalo puonjogi ka en e yie, kata dhi e alwora machielo manie dho nam mondo okony jomamoko.

Mathayo ma en japuonjre Yesu ndiko konyiso ni gik ma Yesu timogo, chopo ‘wach ma ne okor kokalo kuom janabi Isaya.’ (Mathayo 12:17) En wach mane mokor ma Yesu chopo kae?

Wach mokorno wacho niya: “Neuru! Jatichna ma ayiero, jal ma ahero, ma chunya oyiego! Anaket rohona kuome, kendo enoler ne ogendni mamoko tiend tim makare. Ok obi dhawo, bende ok obi kok matek, kendo ng’ato ok nowinj dwonde e wang’ yore madongo. Onge odundu motore ma obiro ketho, kendo onge kitambi ma liel ma rachrach mobiro simo nyaka chop okel tim makare chuth. Kuom adier, ogendni noket geno kuom nyinge.”​—Mathayo 12:18-21; Isaiah 42:1-4.

En adier ni Yesu e jatich Nyasaye, ma ohero kendo ma oyiego. Yesu konyo ji ng’eyo gima tiend tim makare en. To chike kod puonj mag din mar miriambo osemiyo ji ok ong’eyo gima tim makare en. Jo-Farisai osebedo ka tiyo gi Chik Nyasaye ka luwore gi pachgi giwegi, omiyo ok ginyal kata mana konyo ng’at matuo chieng’ Sabato! Yesu nyiso tiend tim makare mar Nyasaye kendo onyiso ni roho mar Nyasaye ni kuome. Onyiso mano kuom konyo joma chike ma ok kare kod puonj mag dhano osebedo ka turo. Mano miyo jotend din dwaro nego Yesu. Mano kaka gima gidwaro timono en gima lit!

Sama ndiko wacho ni “ok obi dhawo, bende ok obi kok matek, kendo ng’ato ok nowinj dwonde e wang’ yore madongo” mano tiende ang’o? Sama Yesu chango ji, ok oyienegi “gimi ji ong’e  ni en ng’a,” kata yie ne jochiende bende mondo otim kamano. (Mariko 3:12) Ok odwar ni ji ong’e wachne mana kokalo kuom lendo mag koko mitimo e wang’ yore, kata kokalo kuom weche miwacho awacha gi dhok to ok gin adier.

Bende, Yesu tero otene ma chiwo hoch ne joma gin kaka odundu motore e yor ranyisi, joma okulore kendo mogo piny. Gichalo kitambi ma liel ma rachrach, machiegni sim. Yesu ok keth odundu motore kata simo kitambi ma liel ma rachrach. Kar mano, ochungo joma muol konyisogi ng’wono kod hera. Kuom adier, Yesu e ng’at ma ogendni duto nyalo keto geno margi kuome!