Kaisar Agusto, jatelo mar Loch Rumi, osegolo chik ni nyaka ndik nying ji duto. Omiyo, Josef kod Maria nyaka dog Bethlehem taon ma thurgi ma yudore milambo mar Jerusalem.

Ji mang’eny obiro Bethlehem mondo ondik nyinggi. Kuom mano, Josef gi Maria ok yud kar bworo, mak mana e ot ma punde kod jamni mamoko nindoe. Odno e ma Maria nyuoloe Yesu. Maria boye gi lewni kendo opiele e sanduk mimiyoe dhok chiemo.

Nyaka bed ni Nyasaye e ma nomiyo Kaisar Agusto ogolo chik ni ji odhi thuchegi mondo ondik nyinggi. Nikech ang’o? En nikech mano nomiyo onyuol Yesu Bethlehem, e taon ma Ruoth Daudi kwargi ne wuokie. Ndiko nosekoro chon ni mano e taon ma ne idhi nyuolie Jaloch ma ne osesing ni dhi biro.​—Mika 5:2.

Ma en otieno makende ndi! Jokwath moko ni oko e otienoni ka girito jamni, kendo ler marieny ahinya kwako kama gintieno. En ler ma nyiso duong’ mar Jehova! Achiel kuom malaike Nyasaye wacho ne jokwathgo niya: “Kik uluor, nimar neuru! ahulonu wach maber mar ilo maduong’ ma ji duto biro bedogo. Nikech kawuono osenyuolnu jawar ma en Kristo Ruoth e taon mar Daudi. Kendo ma e ma nobednu ranyisi: Ubiro yudo nyathi mayom ma obo gi nanga ka onindo e sanduk mimiyoe dhok chiemo.” Apoya nono, malaike mamoko mang’eny fwenyore kendo gipako Nyasaye kama: “Duong’ obed ne Nyasaye man malo kendo kuwe obed e wi piny e kind joma oyiego.”​—Luka 2:10-14.

Ka malaikego osea, jokwathgo wacho e kindgi niya: “Wadhiuru Bethlehem mondo wane gima osetimore, ma Jehova osemiyo wang’eyo.” (Luka 2:15) Giwuok mapiyo kendo giyudo nyathi ma Yesu mana kama malaika nowacho ni gibiro yudee. Sama jokwath lero gima malaika oa owachonegi, joma winjogi duto wuoro ahinya. Maria mor ahinya gi wechego kendo okanogi koparo tiendgi e chunye.

Ji mang’eny e kindegi wacho ni ne onyuol Yesu Desemba 25. Kata kamano, e alwora mar Bethlehem, Desemba en dwe ma koth kod koyo ng’enyie ahinya. Nitie kinde ma kata baraf betiega. E kinde kaka mago, jokwath ok ne nyal bet oko gotieno ka girito jamni. Bende, ok dibed ni jaloch mar Rumi ne nyalo chiko joma chunygi ne osedwaro ng’anjone mondo owuoth e koyo mager kamano kuom ndalo mogwaro mana ni odhi ondik nyinggi. Nenore ni Yesu ne onyuol e dwe mar Oktoba.