Kal idhi e weche manie iye

Kal idhi kama ochanie weche mantie

 SULA MAR 7

Jokor Wach Olimo Yesu

Jokor Wach Olimo Yesu

MATHAYO 2:1-12

  • JOKOR WACH LUWO “SULWE” MORO NYAKA JERUSALEM EKA BANG’E GIDHI IR YESU

Jomoko oa yo Wuok-Chieng’. Gin jokor wach ma konyore gi sulwe, giwacho ni kuom timo kamano ginyalo ng’eyo tiend gik ma timore e ngima dhano. (Isaiah 47:13) Ne gineno “sulwe” moro kane pod gin yo Wuok-Chieng’, kendo gisewuotho kilomita mang’eny ka giluwo sulweno. Sulweno tayogi nyaka Jerusalem, kar tayogi nyaka Bethlehem.

Bang’ chopo Jerusalem, jokorgo penjo kama: “Ere jal monyuol ma en ruodh Jo-Yahudi? Nimar ne waneno sulwe mare ka wan yo Wuok-Chieng’, kendo wasebiro mondo wakulrene ka wamiyego luor.”​—Mathayo 2:1, 2.

Herode ma ruodh Jerusalem winjo wachno kendo chunye chandore ahinya. Omiyo, oluongo jodong-jodolo kod jotend din mar Jo-Yahudi, kendo openjogi kama ne idhi nyuolie Kristo. Gidwoke ka gitiyo gi Ndiko niya: “E Bethlehem.” (Mathayo 2:5; Mika 5:2) Bang’ mano, Herode chano mondo oter jokor wachgo ire ling’ling’. Kae to owachonegi kama: “Dhiuru unon wach nyathi matinno adimba, to ka uyude, uduokna wach mondo an bende adhi akulrane.” (Mathayo 2:8) To adier en ni Herode dwaro ni oneg nyathi matinno bang’ yude.

Ka jokorgo osewuok e nyim Herode, gimoro miwuoro timore. “Sulwe” ma ne oyudo giseneno ka gin yo Wuok-Chieng’ telo kendo e nyimgi. Kuom adier, mano ok en aena sulwe mapile, to en sulwe mana moket mondo otagi. Jokorgo luwo sulweno nyaka kama ochung’ie e wi ot ma Josef gi Maria sani odakie kanyachiel gi wuodgi ma pod tin.

Sama jokor wachgo odonjo e ot, giyudo Maria gi Yesu ma pod en nyathi matin. Gikanyono, jokorgo kulore ne Yesu. Kendo gimiye mich mag dhahabu, ubani ma rachar, kod manemane. Bang’e, ka gichiegni dok ir Herode, Nyasaye kwerogi e lek ni kik gitim kamano. Omiyo, gidok e pinygi ka gitiyo gi yo machielo.

Ng’ano miparo ni nochiwo “sulwe” ma notayo jokor wachgo? Ng’e ni sulweno ne ok otayogi achiel kachiel nyaka Bethlehem ir Yesu. Kar mano, sulweno ne otayogi nyaka Jerusalem, kama ne giromoe gi Ruoth Herode, jal ma ne dwaro nego Yesu. To Herode dotimo kamano ka dine bed ni Nyasaye ok ogeng’o jokor wachgo mondo kik gidhi ginyis Herode kama Yesu ne nitie. Kuom adier, nenore maler ni jasik Nyasaye ma en Satan e ma ne dwaro nego Yesu, kendo notiyo gi yorno mondo otem chopogo dwacheno.