Kal idhi e weche manie iye

Kal idhi kama ochanie weche mantie

 SULA MAR 132

“Adier, Jali ne En Wuod Nyasaye”

“Adier, Jali ne En Wuod Nyasaye”

MATHAYO 27:45-56 MARIKO 15:33-41 LUKA 23:44-49 JOHANA 19:25-30

  • YESU THO E YATH

  • HONNI MA TIMORE SAMA YESU THO

Koro en “sa auchiel odiechieng’.” Mudho moro ma chalo hono imo “pinyno duto nyaka sa ochiko” odiechieng’. (Mariko 15:33) Mano ok en mudho ma betga sama dwe ogeng’o ler mar wang’-chieng’ godiechieng’, nimar mudho kaka mago betga sama dwe pod nyien. Kata kamano, sani to en kinde mar Pasaka ma ler mar dwe rieny maler. Mudho motimoreni to budho kuom kinde malach. Omiyo, nyaka bed ni en mudho ma Nyasaye e mokelo!

Parie kaka gima otimoreno nyaka bed ni obwogo joma jaro Yesu. E kinde ma mudhono nitiere, mon moko ang’wen sudo machiegni gi yadh-sand. Mon-go gin: Maria min Yesu, Salome, Maria Magdalin, kod Maria min jaote Jakobo Matin.

Jaote Johana nigi Maria min Yesu kendo gichung’ “machiegni gi yadh-sand.” Maria ng’iyo wuowi ma nonyuolo kendo ma nopidho koliero gi lit e yath. Chalo mana ka gima ochwo Maria gi “lingangla moro mabor.” (Johana 19:25; Luka 2:35) Kata obedo ni Yesu winjo rem malit kamano, pod wiye ok wil gi ngima min mare. Otemo ahinya loko wiye kochomo Johana kendo wacho ne min mare niya: “Dhako, ne! Ero wuodi!” Oloko wiye kendo kochomo Maria kae to owacho ne Johana ni: “Ne! Ero minu!”​—Johana 19:26, 27.

Nimar nenore ni gie sani Maria min Yesu en chi liel, mano e momiyo Yesu keto ting’ mar rite e lwet Johana japuonjre ma nohero ahinya. Yesu ong’eyo ni owetene mamoko ma Maria onyuologigo pok oketo yie kuome. Omiyo, oketo chenro ma dhi miyo min mare oyud rit e yor ringruok kendo e winjruokne gi Nyasaye. Mano kaka Yesu ketonwa ranyisi maber ahinya!

Seche ma mudhono rumo, Yesu wacho kama: “Riyo ohinga.” Wechenego bende chopo wach moro ma ne okor e Muma. (Johana 19:28; Zaburi 22:15) Chalo ka gima Yesu fwenyo ni Wuon mare ojwang’e e lwet nono mondo eka okadh e tem chuth. Kristo kok gi dhok ma chalo ni en dho Aram miwacho e alwora mar Galili. Okok niya: “Eli, Eli, lama sabakthani?” ma tiende en ni, “Nyasacha, Nyasacha, iseweya nang’o?” Jomoko mochung’ machiegni ok ong’eyo tiend gima owacho, omiyo gikok kama: “Neuru! Oluongo Elija.” Achiel kuomgi ringo to nyumo sipanj e divai mawach kae to okete e odundu kendo omiye mondo omadh. To jomamoko wacho ni: “We obedne kamano! Wane ane kabe Elija dhi biro mondo olore piny.”​—Mariko 15:34-36.

Kae to Yesu kok niya: “Duto oserumo!” (Johana 19:30) Ee, osetieko tije duto ma Wuon mare ne oore mondo otim e piny. Gikone, Yesu wacho kama: “Wuora, much ngimana aketo e lweti.” (Luka 23:46) Wechego nyiso ni oketo ngimane e lwet Jehova kendo en gadier ni Jehova biro dwokonego. Bang’ nyiso geno motegno kamano kuom Nyasaye, Kristo kulo wiye piny kae to otho.

Gikanyono, piny yiengni matek ma baro kata mana lwendni. Yiengnino duong’ ahinya ma kata mana dho liete man oko mar Jerusalem yawore kendo ringre joma otho me igi nyenyore oko. Joma kadho moneno ringre joma othogo  ka ni oko donjo e “dala malerno,” tiende ni Jerusalem, kae to giwacho ne ji gik ma gia nenogo.​—Mathayo 12:11; 27:51-53.

Sama Yesu tho, pasia mapek ma rabora ma pogo Kama Ler gi Kama Ler Moloyo e hekalu mar Nyasaye barore ariyo a malo nyaka piny. Gima lich motimoreno en gima nyiso mirima ma Nyasaye nigo kuom jogo monego Wuode kendo ma nyiso ni koro oseyaw yo mar donjo Kama Ler Moloyo ma en polo.​—Jo-Hibrania 9:2, 3; 10:19, 20.

Ok kawwa gi wuoro ni luoro mako ji ahinya. Jatend-askeche mochung’ ne nek mar Yesu kok niya: “Adier, jali ne en Wuod Nyasaye.” (Mariko 15:39) Nyalo bedo ni ne entie sama ne iyalo Yesu e nyim Pilato kane inono kabe Yesu en wuod Nyasaye adier. Sani to koro en gadier chuth ni Yesu en ng’at makare kendo ni, adier, en e Wuod Nyasaye.

Jomamoko to onyosore nikech honni malich motimorego kendo giwuok ka gichomo miechgi “ka gigoyo korgi” mondo ginyisgo kuyo maduong’ ma gin-go kod wich-kuot momakogi. (Luka 23:48) Kuom joma ng’icho gi chien, nitie mon moko ma kinde moro ne jowuotho gi Yesu. Gin bende honni malich motimorego ochuoyo chunygi ahinya.