Kal idhi e weche manie iye

Kal idhi kama ochanie weche mantie

 SULA MAR 120

Jopuonjre e Bede ma Nyago Olemo Kendo Gin e Osiepe Yesu

Jopuonjre e Bede ma Nyago Olemo Kendo Gin e Osiepe Yesu

JOHANA 15:1-27

  • YADH MZABIBU MADIER KOD BEDENE

  • KAKA WANYALO SIKO E HERA MAR YESU

Yesu osebedo ka jiwo jootene mochung’ kode motegno kogoyo kodgi mbaka kaka osiepe mogenorego. Seche olewo kendo nyalo bedo ni sa auchiel gotieno osekalo. Kae to koro Yesu chiwo ranyisi moro ma jiwo jolupne.

Ochako kama: “An e yadh mzabibu madier, to Wuora e japur.” (Johana 15:1) Ranyisino chalo gi moro ma ne osewach higni mang’eny motelo e wi oganda mar Jo-Israel kane oluonggi ni yadh mzabibu mar Jehova. (Yeremia 2:21; Hosea 10:1, 2) Kata kamano, koro Jehova tamore ogandano. (Mathayo 23:37, 38) Omiyo, Yesu tuch gi wach moro manyien. Onyiso ni en e yadh mzabibu ma Wuon mare osebedo ka pidho chakre ne wir Yesu kokalo kuom roho maler e higa 29. Kata kamano, Yesu nyiso ni ranyisi mar yadh mzabibuno ok tigo kiwuoyo kuome kende.

Owacho kama: “Bede duto man kuoma ma ok nyag olemo [Wuora golo] oko, to bede duto ma nyago olemo, olwero maler mondo eka ginyag olemo momedore. . . . Mana kaka bat ok nyal nyago olemo kende owuon mak mana ka osiko e yadh mzabibu, un bende ok unyal nyago olemo mak mana ka usiko e winjruok achiel koda. An e yadh mzabibu; un e bedene.”​—Johana 15:2-5.

Yesu osesingo ne jopuonjrene mochung’ kode motegno ni bang’ ka osedhi, obiro oronegi jakony ma en roho maler. Odiechienge piero abich gachiel bang’e, sama rohono dhi biro kuom joote kod jomamoko, ema gibedoe bede yadh mzabibuno. Kendo biro chuno ni ‘bedego’ duto osik e winjruok achiel gi Yesu. Mondo gichop ang’o?

Yesu lero kama: “Ng’ato ang’ata ma siko e winjruok achiel koda kendo ma siko e winjruok achiel kode, jali nyago olemo mang’eny; nimar ka ok an, to ok unyal timo gimoro ngang’.” ‘Bedego,’ ma gin jolupne mosechung’ kode motegno ne dhi nyago olemo mang’eny ka giluwo ranyisi mar kit Yesu, ka giyalo wach maber mar Pinyruodh Nyasaye, kendo loko jomamoko mondo obed jopuonjre. To nade ka nitie ng’at ma ok sik e winjruok achiel gi Yesu kendo ok onyag olemo? Yesu lero niya: “Ka ng’ato ok sik e winjruok achiel koda, iwite oko.” Kae to Yesu wacho ne jolupne kama: “Un kusiko e winjruok achiel koda, kendo ka wechena siko e iu, kwauru gimoro amora mudwaro, to biro timorenu kamano.”​—Johana 15:5-7.

Koro Yesu nwoyo wach moro ma koro osewuoye nyadiriyo. Wachno en wach rito chikene. (Johana 14:15, 21) Olero yo achiel maduong’ ma jopuonjrene nyalo nyisogo ni girito chikene. Owachonegi niya: “Kurito chikena, ubiro siko e herana, mana kaka aserito chike Wuora kendo asiko e herane.” Kata kamano, hero Jehova Nyasaye kod Wuode kende ok oromo. Yesu wacho kama: “Ma e chikna, ni mondo uherru ng’ato gi ng’ato mana kaka aseherou. Onge ng’at ma nigi hera maduong’ ma loyo ma: ni ng’ato chiwo ngimane nikech osiepene. Un osiepena kutimo gima achikou.”​—Johana 15:10-14.

Bang’ seche manok ma luwo, Yesu biro nyiso ni ohero jogo duto ma nyiso yie kuome kuom chiwonegi ngimane. Ranyisine onego omi jolupne bende onyis hera ma kamano e kindgi ng’ato gi nyawadgi. Herano e ma ibiro fwenygigo mana kaka Yesu nosewacho motelo niya: “Ma e ma nomi ji duto ong’e ni un jopuonjrena​—ka un gi hera e kindu uwegi.”​—Johana 13:35.

Joote Yesu onego ong’e gimomiyo Yesu luongogi ni “osiepene.” Onyiso gimomiyo en kamano kowachonegi kama: “Aseluongou ni osiepena, nimar asemiyo ung’eyo gik moko duto ma asewinjo kuom Wuora.” Mano kaka bedo osiepe  Yesu kendo ng’eyo weche ma Wuon mare osenyise en gima jaber ndi! Kata kamano, mondo mi gibed osiepe Yesu e okang’ ma kamano, nyaka gibed joma ‘nyago olemo.’ Yesu nyiso ber ma gibiro yudo ka gitimo kamano. Owachonegi niya: “Gimoro amora mukwayo Wuora e nyinga, obiro miyou.”​—Johana 15:15, 16.

Hera manie kind ‘bedego,’ tiende ni e kind jopuonjrene, biro konyogi nano e bwo masiche man nyime. Onyisogi chon-chon ni piny biro sin kodgi, ka gie kindeno bende ohoyogi kama: “Ka piny osin kodu, ng’euru ni nokwongo sin koda ka pok osin kodu. Ka da un mag piny, piny dine ohero gige owuon. To koro nikech ok un mag piny, . . . piny osin kodu nikech mano.”​—Johana 15:18, 19.

Yesu medo lero gimomiyo piny biro sin kodgi kowachonegi kama: “Gibiro timonu mago duto nikech nyinga, nimar ok ging’eyo Jal ma noora.” Yesu wacho ni chalo ka gima honni madongo motimo nyiso ni bura oseloyo joma osin kode. Owacho kama: “Ka dine bed ni ok ne atimo e diergi tije ma onge ng’at machielo mosetimo, dikoro gionge gi richo; to sani gisenena kendo gisin koda kanyachiel gi Wuora.” Kuom adier, sin ma gisin-go kode chopo weche ma ne okor.​—Johana 15:21, 24, 25; Zaburi 35:19; 69:4.

Yesu singonegi kendo ni obiro oronegi jakony ma en roho maler. Jolupne duto nyalo yudo teko maduong’ ma rohono chiwo mi chop kama ginyago olemo, tiende ni “chiwo neno.”​—Johana 15:27.