Kal idhi e weche manie iye

Kal idhi kama ochanie weche mantie

 SULA MAR 50

Jehova Nokonyo Jehoshafat

Jehova Nokonyo Jehoshafat

Jehoshafat ruodh Juda ne oketho altar mag Baal gi sanamu duto ma ne ni e piny Juda. Ne odwaro ni ji ong’e chike Jehova. Omiyo, ne ooro jodongo mage kod Jo-Lawi e Juda duto mondo gipuonj ji chike Jehova.

Ogendni ma ne odak machiegni gi Jo-Juda ne oluor monjogi nikech ne ging’eyo ni Jehova ne ni kodgi. Ne gikelo nyaka mich ne Ruoth Jehoshafat. Kata kamano, Jo-Moab, Jo-Amon, kod joma ne a e alwora mar Seir nodhi monjo Jo-Juda. Jehoshafat nong’eyo ni Jehova e ma ne nyalo konyogi. Ne ochoko chwo, mon, gi nyithindo duto e Jerusalem. Nolemo e nyim ogandano kama: ‘Jehova, ok wanyal loyo lwenyni mak mana ka in e ma ikonyowa. Nyiswae gima onego watim.’

Jehova nodwoke kama: ‘Kik iluor. Abiro konyi. Un chung’uru achung’a kar tiendu mondo une kaka aresou.’ Ere kaka Jehova noresogi?

Kinyne gokinyi, Jehoshafat noyiero jower, monyisogi ni gipangre ka giwer e nyim jolweny. Ne gipangore ka gia Jerusalem nyaka e paw lweny ma ne ni kama iluongo ni Tekoa.

Sama jowergo ne pako Jehova gi mor kendo gi dwol maduong’, Jehova ne kedonegi. Ne omiyo Jo-Ammon gi Jo-Moab ochochni ma gichako negore kendgi giwegi, mi githo te. Jehova ne orito Jo-Juda, jolwenygi, kaachiel gi jodolo maggi mondo kik hinygi. Ka ne jirendegi owinjo gik ma Jehova notimogo, ne ging’eyo ni adier, Jehova pod ne kedo ne Jo-Israel. Ere kaka Jehova resoga joge? Otimo mano e yore mang’eny. Ok ochuno ni dhano okonye.

“Ok onego ukedi e lwenyni: ikreuru, chunguru mos, une warruok mar Jehova man kodu.”​—2 Weche mag Ndalo 20:17