Kal idhi e weche manie iye

Kal idhi kama ochanie weche mantie

 SULA MAR 10

Paruru Chi Lut

Paruru Chi Lut

Lut nodak e piny Kanaan gi Ibrahim owadgi wuon-gi. Mosmos Ibrahim gi Lut nobedo gi jamni mang’eny ma koro kama ne gidakieno ne ok nyal romogi. Ibrahim ne onyiso Lut niya: ‘Ok wanyal dhi nyime dak kanyachiel kama tinni. Yier kama diher dakie, kae to kama iweyo e ma abiro kawo.’ Mano nyiso ni Ibrahim ne en ng’at ma chunye ler, donge?

Lut noneno lowo moro maber machiegni gi taon ma niluongo ni Sodom. Kanyo ne nitie pi mang’eny kod lum mayom. Noyiero kanyo mi gidakie gi joode. Gikone ne gidak e i Sodom.

Joma ne odak Sodom kaachiel gi joma ne odak e taon mar Gomora ne richo ahinya. Mano nomiyo Jehova ong’ado mar kethogi. Nikech Jehova ne dwaro reso Lut kaachiel gi joode, ne ooro malaike ariyo mondo odhi omigi siem. Malaikego nonyisogi kama: ‘Wuoguru mapiyo e taondni! Jehova dhi kethe.’

Lut ne ok owuok mapiyo kaka nonyise. En pod nodigni kanyo. Ka malaikego noneno mano, ne gimako lwet Lut, chiege, gi nyige ariyo kendo ywayogi ka giwuok e taondno, ka ginyisogi ni, ‘Ringuru matek mondo ures ngimau! Kik ung’i chien, nono to utho!’

Ka ne gichopo e taon miluongo ni Zoar, Jehova ne omiyo mach olor koa e polo mowang’o taon mar Sodom gi Gomora. Taonde ariyogo ne oketh chuth. Chi Lut ne ok oluwo kaka Jehova nochikogi. En nong’iyo chien. Mano nomiyo olokore kidi maduong’ mar chumbi. Kata kamano,  Lut gi nyige ne otony nikech ne giwinjo Jehova. Nyaka bed ni ne giwinjo malit ahinya nikech chi Lut ne ok owinjo wach. To ne ok giywago ang’e nikech gin ne gitimo kaka Jehova ne onyisogi.

“Paruru chi Lut.”​—Luka 17:32