Kal idhi e weche manie iye

Kal idhi kama ochanie weche mantie

 SULA MAR 82

Yesu Opuonjo Jopuonjrene Lemo

Yesu Opuonjo Jopuonjrene Lemo

Jo-Farisai ne ohero nyisore e nyim ji. Gimoro amora ma ne gitimo, ne gitimo mana mondo ji onegi. Ne gilemoga e lela mondo ji onegi. Ne gimako lamo maboyo boyo e wigi, kendo ne ginwoyoga lamogo e sunagogi kod e wang’ yore mondo ji owinjgi. Mano e momiyo ji ne ohum ka Yesu nonyisogi kama: ‘Kik ulem kaka Jo-Farisai lemoga. Giparo ni Nyasaye winjogi nikech gitiyo gi weche mang’eny. Lamo en gima onego obed e kind ng’ato kod Jehova. Sama ulemo, kik unwo anwoya weche ma usemako e wiu. Jehova dwaro ni ng’ato ka ng’ato onyise gima ni e chunye.

‘Un to koro onego ulem kama: “Wuonwa manie polo, nyingi mondo obed maler. Pinyruodhi mondo obi. Dwaroni mondo otimre bende e piny, kaka e polo.”’ Yesu ne onyisogi bende ni onego gikwa Jehova  chiemo mapile ka pile, gikwaye owenegi richogi, kendo ginyise weche duto ma chandogi.

Yesu ne owacho kama: ‘Kik iwe lemo. Sik kikwayo Wuonu manie polo Jehova mondo oguedhi. Onge janyuol ma nyalo miyo nyathine gima ong’eyo ni rach. Wawach ni nyathini okwayi makate, be dibukri imiye kidi? To nade kokwayi rech, be dibukri imiye thuol?’

Bang’ wacho wechego, Yesu ne ochiwo puonj kama: ‘Ka un e ma ung’eyo miyo nyithindu mich mabeyo, donge Jehova Wuonu manie polo biro chiwonu rohone? Gima dwarore en ni mondo ukwaye.’ Be itiyo gi weche ma Yesu ne owachogo? In ikwayoga Nyasaye gik ma chalo kaka mage?

“Sikuru ka ukwayo, to nomiu; sikuru ka umanyo, to unuyud; sikuru ka udwong’o, to noyawnu.”​—Mathayo 7:7