Kal idhi e weche manie iye

Kal idhi kama ochanie weche mantie

 SULA MAR 75

Jachien Otemo Yesu

Jachien Otemo Yesu

Ka ne osetis Yesu, roho maler notere nyaka e thim. Ne oriyo kech kuom ndalo 40, kendo kech ne kaye ahinya. Kae to Jachien ne odhi ir Yesu mondo oteme konyise niya: ‘Ka in Wuod Nyasaye gadier, nyis kitegi mondo gilokre makati.’ Kata kamano, Yesu ne odwoke kotiyo gi Ndiko niya: ‘Wach Nyasaye wacho ni chiemo kende ok e ma mi ng’ato obed mangima. Ng’ato nyaka winj gik ma Jehova wacho e ka obed mangima.’

Bang’e, Jachien ne onyise niya: ‘Ka in wuod Nyasaye gadier, to tem ane chikori ka ia malo e wi tat hekalu nyaka piny. Donge ondik ni Nyasaye biro oro malaikene mondo omaki ka pok ichopo e lowo?’ Yesu to ne odwoke niya: ‘Ondik bende ni kik item Jehova.’

Kae to Jachien ne otang’o ne Yesu sirkande duto mag piny kod mwandu ma gin-go konyise niya: ‘Abiro miyi gigi te, to mana kiyie lama dichiel kende.’ Yesu ne odwoke kama: ‘Ne, dhina kucha Satan! Ondik ni Jehova kende e ma onego lam.’

Kae to Jachien nowere kode, kendo malaike nobiro mi gimiyo Yesu chiemo. Chakre kanyo, Yesu ne ochako lando wach maber mar Pinyruodh Nyasaye. Mano e tich ma nokele e piny ka. Ji ne ohero weche ma Yesu ne puonjo, kendo ji mathoth ne luwe kamoro amora ma nodhiyoe.

“Sama [Jachien wacho] miriambo, owacho mana kaka kite owuon obet, nimar en jamiriambo kendo wuon miriambo.”​—Johana 8:44