Kal idhi e weche manie iye

Kal idhi kama ochanie weche mantie

 SULA MAR 18

Kaka Wayudo Pesa ma Wasirogo Tije mag Pinyruoth

Kaka Wayudo Pesa ma Wasirogo Tije mag Pinyruoth

WACH MADUONG’ MA SULANI WUOYE

Kaka jotich Jehova tiyo gi pesa e siro tij Pinyruoth, kod gimomiyo gitimo kamano

1, 2. (a) Ka ne jayalo moro openjo Owadwa Russell kaka Jopuonjre Muma yudo pesa ma gisirogo tijgi, Russel nodwoke nang’o? (b) En ang’o ma wadwaro nono e sulani?

CHIENG’ MORO, jayalo moro mar Reformed Church ne odhi ir Owadwa Charles T. Russell mi openje kaka Jopuonjre Muma yudo pesa ma gisirogo tijgi.

Owadwa Russell nolerone kama: “Ok wachokga sadaka.”

Jayalono nopenje kama: “Kare ugolo pesa kanye?”

Russell nodwoke niya: “We alerni, en mana ni samoro ok ibi yie gi gima adwa wachoni. Sama joma wayalonegi obiro lemo kodwa, onge adita ma ipaso e nyimgi mondo giketie sadaka. Kata kamano, gineno gi wang’gi ni pesa dwarore, kendo giwacho e chunygi niya: ‘Yawa, ot ma walemeeni ok oyudore nono. Donge an be anyalo jolo kamoro?’”

Jayalono nong’iyo wang’ Owadwa Russell kowuoro ahinya.

Russell ne odhi nyime nyise niya: “Gima anyisini en adier. Gin giwegi e ma gipenjaga ni, ‘Ka an gi pesa moro matin ma adwaro sirogo tij Nyasaye, anyalo timo nang’o?’ Sama ng’ato oyudo pesa, otemo matek mondo osirgo tij Ruoth. Sama oongego, ang’o ma dimi wadhire mondo ochiw?” *

2 Gima Owadwa Russell nowachono en adier. Kuom higni mang’eny, jotich Jehova osebedo ka golo chiwo misirogo lamo madier. E sulani, wadwaro nono ranyisi moko e Muma mag joma nogolo chiwo, kod kaka wasebedo ka watimo kamano e kindewagi. Sama wanono kaka watiyo gi pesa e siro tij Pinyruoth, ng’ato ka ng’ato kuomwa onego openjre kama: ‘Ang’o ma anyalo timo mondo an be asir tije mag Pinyruoth?’

“Ng’at ma Chunye Ohero Mondo Okel ne Jehova Chiwo”

3, 4. (a) En wach mane ma Jehova nigo gadier gi jotichne? (b) Ere kaka Jo-Israel noriwo lwedo tij gero tabenakel?

3 Jehova ogeno jotichne ahinya. En gadier ni komiyo jotichne thuolo mar golo chiwo misirogo tije, gitimo kamano gi chunygi duto. Wane ane ranyisi ariyo e kinde Jo-Israel.

 4 Bang’ ka Jehova nosegolo Jo-Israel e piny Misri, nochikogi ni giger tabenakel ma ne ginyalo lamee. Tabenakelno nonego los e yo ma ne ginyalo dargo mayot sama gidhi nyime gi wuoth. Tijno ne dhi dwaro gik mang’eny ahinya. Kokalo kuom Musa, Jehova nomiyo Jo-Israel thuolo mar siro tijno. Nowacho niya: “Ng’at ma chunye ohero mondo okel ne Jehova chiwo.” (Wuok 35:5NW ) Ere kaka Jo-Israel nokawo wachno kata obedo ni gi e sechego e ka ne gia e sand malit kod tich matek? (Wuok 1:14) Ne giriwo tijno lwedo gi chunygi duto ka gikelo dhahabu, fedha, gi gik mamoko ma nengogi tek ma ng’enygi ne giyudo kuom Jo-Misri ka ne giwuok. (Wuok 12:35, 36) Jo-Israel nochiwo gik mang’eny mokalo ma ne dwarore mochopo kama koro ne igeng’ogi mondo “kik gikel” gik momedore.—Wuok 36:4-7.

5. Ka ne Daudi omiyo Jo-Israel thuolo mar siro tij gero hekalu, ne gitimo ang’o?

5 Higni 475 bang’e, Daudi nochiwo ‘mwandu ma mare owuon’ mondo osirgo tij gero hekalu. Helakuno e ma ne dhi bedo kar lamo mokwongo ma ok dargo. Ka Daudi nosegolo chiwo mare, ne omiyo Jo-Israel thuolo mar siro tijno kopenjogi niya: ‘Ere ng’ama oyie golo chiwo ne [Jehova] gi chuny achiel kawuono?’ Ji duto ‘nogolo chiwo gi chuny achiel.’ (1 We. 29:3-9The Bible in Luo, 1976) Nikech Daudi nong’eyo ni Jehova e wuon mwandu duto, nolemo kogoyo ne Jehova erokamano kama: “In ema ichiwo gik moko duto, kendo wadwokoni mana gik misemiyowa.”—1 We. 29:14, Luo, 1976.

6. Ang’o momiyo pesa dwarore e siro tije mag Pinyruoth, to mano kelo penjo mage?

6 Musa gi Daudi ne ok othung’o jo Nyasaye mondo ogol chiwo. Kar mano, ji ne ochiwo gi chuny mohero. To nade e kindewagi? Wang’eyo maber ni gik ma Pinyruodh Nyasaye timo dwaro pesa. Pesa dwarore mang’eny mondo ogo Muma kod buge ma lero Muma kendo kowogi kuonde mopogore opogore, gero ute mag lamo kod ofise, kod konyo Jokristo wetewa moyudo masira. Mano kelo penjo moko: Wayudo pesa kanye ma wasirogo tijego duto? Be onego dhir tok jolup Ruodhwa mondo gigol chiwo?

“Ok Wabi Kwecho Kata Solo Pesa Kuom Ji”

7, 8. Ang’o momiyo jo Jehova ok kwa ji pesa kata solo pesa kuomgi?

7 Owadwa Russell gi jopuonjre wetene notamore tiyo gi yore ma kanise mang’eny ma luongore ni Jokristo tiyogo e manyo pesa. Gocho mar ariyo mar Watch Tower ne nigi wich moro ma ne wacho ni “Do You Want ‘Zion’s Watch Tower’?” (tiende ni “Be Udwaro Gaset mar Zion’s Watch Tower?”). E bwo wijno, Russell nowacho kama: “Nikech wan gi yie ni Jehova e ma siro tij goyo gaset mar Zion’s Watch Tower, ok  wabi kwecho kata solo pesa kuom ji mondo wagogo gasedni. Chieng’ ma Jehova ma e wuon ‘fedha gi dhahabu’ nowe miyowa pesa ma dwarore e siro gasedni, wabiro ng’eyo ni mano e sa mar weyo goye.” (Hag. 2:7-9) Higni 130 koro osekalo, to pod wan mana tie, to Ohinga mar Jarito be pod wagoyo agoya!

8 Jo Jehova ok kwa ji pesa ma gisirogo tije mag Pinyruoth. Ok gichok sadaka kata ndiko ne ji barupe ka gikwayogigo pesa. Bende, ok gigo harambee, ok gilos nyolworo, ok giyaw skunde, kendo ok giswekre e tie josiasa mondo giyud pesa ma gisirogo tijegi. Pod gimakore gi gima Watch Tower nowacho chon niya: “Pok waparoga kata matin ni wasol pesa kuom ji mondo wasirgo tij Ruodhwa kaka kanise mamoko timoga . . . Wan kaka wanene en ni solo pesa kuom ji kirendruok gi nying Ruodhwa ok en gima owinjore kata matin. Ruodhwa ok mor gi timno, kendo ok onyal guedho joma isolo pesa kuomgi kaachiel gi tich ma pesago timo.” *

“Ng’ato ka Ng’ato Otim Mana Kaka Oseng’ado ei Chunye”

9, 10. Achiel kuom gik momiyo wagolo chiwo en ang’o?

9 Nikech wan raia mag Pinyruoth, ok dhirwa e ka wagol chiwo. Kar mano, wamor chiwo pesawa kod mwanduwa mondo wasir tije mag Pinyruoth. Ang’o momiyo? Ne ane weche moko adek.

10 Mokwongo, wagolo chiwo nikech wahero Jehova kendo dwaher ‘timo gik mabeyo e wang’e.’ (1 Joh. 3:22) Jehova mor gi joma chiwone kowuok e chunygi. Wanon ane gima jaote Paulo nowacho e wi chiwo ma Jokristo golo. (Som 2 Jo-Korintho 9:7.) Jakristo madier ok gol chiwo nikech ochune kata odhire ni mondo otim kamano. Kar mano, ogolo chiwo nikech “oseng’ado ei chunye” mar timo kamano. * Tiende ni, bang’ kosefwenyo ni rem nitie kamoro, ogolo chiwo ka luwore gi nyalone. Nyasaye ohero ng’at ma kamano nikech en “ng’at ma chiwo gi ilo.” Muma moro oketo ndikono kama: “Nyasaye ohero joma ohero chiwo.”

Nyithindwa ma ni Mozambique bende ohero golo chiwo

11. En ang’o ma chwalowaga mondo wami Jehova mich maberie mogik?

11 Mar ariyo, wagolo chiwo mondo wagonego Jehova erokamano kuom gueth mang’eny ma oolo kuomwa. Ne ane puonj moro ma yudore e Chik Musa. (Som Rapar mar Chik 16:16, 17.) Ka ne Jo-Israel dhi e nyasi adek madongo ma ne gitimoga higa ka higa, ne dwarore ni dichwo ka dichwo ochiw mich ‘moromo gi gueth ma noseyudo kuom Jehova.’ Omiyo, ka pok ne gidhi e nyasi ma kamago, dichwo ka dichwo ne nyaka nonre owuon mondo ong’e gueth ma  Jehova osemiye, e ka oyier mich ma noneno ni ber kochiwo ne Jehova. E yo ma kamano, wan be ka wanono maber gueth duto ma Jehova osemiyowa, mano chwalowa mondo wamiye mich maberie mogik. Chiwo ma wagolo kowuok e chunywa, moriwo nyaka mwanduwa, nyiso okang’ ma wamorgo gi gueth ma Jehova oseolonwa.—2 Kor. 8:12-15.

12, 13. Ang’o momiyo wanyalo wacho ni chiwo ma wagolo nyiso ni wahero Ruodhwa Yesu Kristo, to ng’ato ka ng’ato onego ogol chiwo ma romo nade?

12 Mar adek, chiwo ma wagolo nyiso ni wahero Ruodhwa Yesu Kristo. Ang’o momiyo wawacho kamano? Ne ane gima Yesu nonyiso jopuonjrene e otieno mogik kae to otho. (Som Johana 14:23.) Yesu nowacho kama: “Ka ng’ato ohera, obiro rito wachna.” Achiel kuom weche ma Yesu dwaro ni jopuonjrene orit en chik ma dwaro ni waland wach maber mar Pinyruoth e piny mangima. (Mat. 24:14; 28:19, 20) Waluwo chikno kuom tiyo gi sechewa, tekowa, kod mwanduwa e siro tij Pinyruoth. Mano biro nyiso ni wahero Ruodhwa Yesu Kristo.

 13 Nikech wamakore gi Pinyruodh Nyasaye, dwaher timo duto ma wanyalo mondo wasir tije mag Pinyruoth kuom golo chiwo mag pesa. Watimo mano e yo mane? Ng’ato ka ng’ato timo kaka ong’ado e chunye ka luwore gi nyalone. To nade joma odhier? (Mat. 19:23, 24; Jak. 2:5) Gin be ginyalo golo matin ma ginyalo ka gin gadier ni Jehova kod Yesu mor gi chiwo ma gigolo gi chuny achiel.—Mar. 12:41-44.

Kaka Pesa ma Ji Chiwo Choponwa

14. Kuom higni mang’eny, ne dwarore ni joma kawo bugewa otim ang’o?

14 Kuom higni mang’eny, ne dwarore ni ng’ato ogol chiwo moro matin mondo miye buge ma lero Muma ma Joneno mag Jehova ne chiwo. Pesa ma ne dwarore ni ng’ato ochiw ne tin ahinya ma kata mana joma ne onge pesa mandha pod ne nyalo yudo bugego. To kata ka ng’ato ne onge gimoro to nodwaro somo bugego, pod ne imiye amiya. Dwach jolendogo ne en chiwo bugego ne joma bugego ne nyalo konyo.

15, 16. (a) E higa mar 1990, Bura Matayo nochako chenro mane mar chiwo bugewa? (b) Gin yore mage ma ji nyalo gologo chiwo mag siro tijewa? (Ne bende sanduk ma wiye wacho ni, “ Chiwo ma Wagolo Itiyogago Nade?”)

15 E higa mar 1990, Bura Matayo nochako loko yo ma wachiwogo bugewa ma lero Muma. Chakre higano, koro ne oyie ne owetewa ma Amerka miyo ji bugewa ma onge nengo sie moketnegi. Ng’at mohero ne nyalo golo gima oneno ni ber. Ne oor ne kanyakla duto ma pinyno barua ma ne lero niya: “Gasede kod bugewa ibiro mi jolendo kod ng’ato ang’ata ma diher somogi ma ok okwagi gimoro amora mondo e ka migi bugego. . . . Ng’ato ang’ata ma diher golo chiwo mar siro tij puonjo Muma nyalo timo mano, kata kamano, buge to pod gibiro yudo bed ni gichiwo gimoro kata ok gichiwo.” Lokruok ma notimno nonyiso maler ni tich ma watimo en mana chiwruok kendo ‘ok walok ohala gi wach Nyasaye.’ (2 Kor. 2:17) Bang’ kinde, chenrono ne oyar e piny ngima.

16 Gin yore mage ma ji nyalo gologo chiwo? E Ute Romo mag Joneno mag Jehova, nitiega sanduge mag golo chiwo. Ng’ato nyalo keto chiwo mare e sandugego kata onyalo oro achiel kachiel ne riwruok ma Joneno mag Jehova tiyogo e pinygi. Higa ka higa, nitiega sula moro e Ohinga mar Jarito ma nyiso yore mopogore opogore mag golo chiwo.

Kaka Watiyo gi Pesa ma Ji Chiwo

17-19. Ler ane kaka watiyo gi pesa ma ji ogolo e (a) siro tij piny mangima, (b) gero Ute Romo e piny mangima, kod (c) siro tije mag kanyakla.

17 Siro tij piny mangima. Pesa ma ji chiwo itiyogo e siro tije motudore gi yalo wach maber e piny ngima. Moko kuom tijego gin goyo buge kendo kowogi kuonde ma gidwaroree,  gero ofisewa kod Bethel kendo loso kuonde mokethore, kod siro skunde mitiegoe jo Nyasaye. Bende, itiyo gi pesago e rito jomisonari, jorit-alwora, kod jopainia makende. E wi mago, chiwogo itiyogo e konyo Jokristo wetewa moyudo masira. *

18 Gero Ute Romo e piny mangima. Watiyo gi pesa ma ji golo e gero kata loso Ute Romo. Bende, pesa moko inyalo tigo e konyo kanyakla mamoko e gero Ute Romo kata loso kuonde mokethore e utego. *

19 Siro tije mag kanyakla. Pesa moko itiyogo e timo tije ma nyalo dwaro pesa e Od Romo. Jodong-kanyakla nyalo yiero mar oro pesa moko e ofis mondo tigo e medo siro tij piny mangima. Sama jodongo oyiero timo kamano, gikwayoga jo kanyakla mondo opwodhi. Ka kanyakla opwodho, jodongo oro pesago e ofis. Dwe ka dwe, owadwa ma rito pesa mag kanyakla losoga ripot ma nyiso kaka pesa otiyo e dwe mangima, kae to isomo ripodno ne kanyakla.

20. Ere kaka wanyalo miyo Jehova duong’ ka watiyo gi ‘gigewa’?

20 Ka wanono gik mitimo e siro tije motudore gi yalo wach Pinyruoth e piny ngima kod puonjo ji Muma, mano chwalowa mondo ‘wami Jehova duong’ kuom chiwone gigewa.’ (Nge. 3:9, 10) Gigewa oriwo tekowa, pachwa, kod nyalo moko makende ma wan-go. Gombowa maduong’ en tiyo gi gigo e siro tij Pinyruoth gi chunywa duto. Par bende ni gigewa oriwo mwandu ma wan-go. Wang’aduru e chunywa ni wabiro dhi nyime chiwo duto ma wanyalo mondo wasir tij Pinyruoth. Chiwo ma wagolo miyo Jehova duong’ kendo nyiso ni wariwo Pinyruodh Mesia lwedo.

^ par. 1 The Watch Tower ma Julai 15, 1915, ite mag 218-219.

^ par. 8 The Watch Tower ma Agost 1, 1899, ite mar 201.

^ par. 10 Jasomo moro wacho ni wach Grik molok ni ‘ng’ado’ oriwo “gima ng’ato oparo motelo ka pok otimo.” Omedo kama: “Kata obedo ni chiwo kelo mor, pod nyaka ng’ato bed gi chenro maber e ka ogol chiwo e yo moriere.”—1 Kor. 16:2.

^ par. 17 Mondo iyud weche momedore e wi kaka wakonyo joma oyudo masira, ne Sula mar 20.

^ par. 18 Mondo iyud weche momedore e wi kaka wagero Ute Romo, ne Sula mar 19.