Kal idhi e weche manie iye

Kal idhi kama ochanie weche mantie

 SOMO MAR 18

Bed Osiep Nyasaye Nyakachieng’!

Bed Osiep Nyasaye Nyakachieng’!

Mako osiep kawo kinda; rito osiep kawo kinda. Kinda mitimo mondo ibed osiep Nyasaye kendo irit osiepno biro gwedhi. Yesu nowacho ne joma ne oyie kuome: “Adiera nyalo gonyou.” (Johana 8:32, NW) Mano nyiso ang’o?

Inyalo gonyi sani. Inyalo gonyi sani kuom puonj ma ok adier kod miriambo ma Satan oselando. Inyalo gonyi kuom kuyo mopong’o ngima ji gana gi gana ma ok ong’eyo Jehova. (Jo Rumi 8:22) Kendo osiepe Nyasaye osegony kuom “luoro ma tho.”​—Jo Hibrania 2:14, 15.

Inyalo mor e piny manyien mar Nyasaye. Inyalo mor ahinya endalo mabiro. Lweny, tuo, kod timbe mahundu ok nobedi e piny Paradis. Dhier kod kech ok nobedi. Ti kod tho ok nobedi. Luoro, diyoji kod timbe ma ok kare ok nobedi. Muma wacho kama kuom Nyasaye: “Iyawo lweti, kendo iyieng’o gik mangima duto, kaka gidwaro.”​—Zaburi 145:16.

 Osiepe Nyasaye nodag nyakachieng’. Ngima ma nyakachieng’ en mich maber ahinya ma Nyasaye biro miyo ji duto ma dwaro bedo osiepene. (Jo Rumi 6:23) Parie kaka ngima ma nyakachieng’ biro bedoni!

Ibiro bedo gi thuolo mar timo gik mang’eny. Inyalo dwaro puonjori goyo thum moro. Kata inyalo dwaro puonjori buko picha kata puonjori goyo randa. Kata inyalo dwaro puonjori kuom le kata yien. Kata dibed ni idwaro wuotho neno pinje gi ji. Dak nyakachieng’ biro miyo gigi duto nyalre!

Ibiro bedo gi thuolo mar mako osiep mang’eny. Dak nyakachieng’ biro miyo ing’e ji mamoko mang’eny magin osiepe Nyasaye. Ibiro ng’eyo michgi kod kitgi mabeyo, kendo gibiro bedo osiepeni bende. Ibiro herogi, kendo gibiro heri. (1 Jo Korintho 13:8) Dak nyakachieng’ biro miyi thuolo mar mako osiep gi ji duto e piny! To maber moloyo duto, osiepu gi Jehova biro medore kaka higni miche gi miche medo kalo. Bed osiep Nyasaye nyakachieng’!