Kal idhi e weche manie iye

Kal idhi kama ochanie weche mantie

 APENDIKS

Kaka Muma Neno Wach Ketho Kend Chuth kod Pogo Dak

Kaka Muma Neno Wach Ketho Kend Chuth kod Pogo Dak

Jehova dwaro ni joma okendore osiki e singruokgi mar kend. Kane oriwo dichwo gi dhako mokwongo e kend, Jehova ne owacho kama: “Dichwo . . . nopadre gi chiege: mi ginibedi ringruok achiel.” Bang’e, Yesu Kristo ne onwoyo wachno kendo medo kama: “Omiyo gi ma Nyasaye oseriwo, kik dhano opogi.” (Chakruok 2:24; Mathayo 19:3-6) Kuom mano, Jehova kod Yesu neno kend kaka gima riwo joma okendore e ngimagi duto ma gik mana ka achiel kuomgi otho. (1 Jo Korintho 7:39) Nikech kend en chenro maler, ketho kend chuth ok en gima onego okaw mayot. Kuom adier, Jehova osin gi kend miketho chuth ka onge gima omiyo itimo mano kaluwore gi Ndiko.Malaki 2:15, 16.

 Ang’o ma Ndiko nyiso ni nyalo miyo ng’ato oketh kend chuth? En adier ni, Jehova osin gi chode kod terruok. (Chakruok 39:9; 2 Samuel 11:26, 27; Zaburi 51:4) Kuom adier, oneno terruok ka tim mochido ahinya ma omiyo oyie ni en gima nyalo miyo oketh kend chuth. (Mondo iyud weche mawuoyo kuom gima terruok en, ne Sula mar 9, paragraf mar 7, kama olerie gima terruok en.) Jehova omiyo jaot ma ok oketho e kendno ratiro mar yiero kabe obiro dong’ e kend gi jaode ma oterore kata ka obiro ketho kend chuth. (Mathayo 19:9) Kuom mano, ka jal ma ok oketho oyiero ketho kend chuth, Jehova ok sin gi ketho kend e yo ma kamano. Kata kamano, kanyakla mar Jokristo bende ok jiw ng’ato ang’ata mondo oketh kend chuth. En adier ni, nitie kinde ma jal ma ok oketho nyalo yiero dong’ e kend gi jal moketho, to moloyo ka jal mokethono oloko chunye gadier. Kata kamano, jogo ma nigi ratiro mar ketho kend chuth kaluwore gi Ndiko nyaka tim yiero margi giwegi kendo kawo ting’ moro amora mabiro nikech ketho kend chuth.Jo Galatia 6:5.

E kinde moko ma weche tek ahinya, Jokristo moko oseyiero pogo dak kata ketho kend chuth gi jaot kata bedni ok oterore. Ka ng’ato otimo kamano, Muma wacho ni jal mowuok e kendno “onego osik ma ok okende, kata mondo odog owinjre” gi jal ma ne gikendorego. (1 Jo Korintho 7:11) Jakristo mokawo okang’ ma kamano ok ni thuolo mar kendruok gi ng’at machielo. (Mathayo 5:32) Wane ane moko kuom weche matek ma jomoko oseneno ni chiwo thuolo mar pogo dak.

Tamruok rito joode. Joot nyalo bedo modhier ahinya, ma ok giyud gik mochuno e ngima, nikech dichwo otamore ritogi to en gi nyalo mar timo kamano. Muma wacho kama: “Ka ng’ato ok rit . . . joode, ng’atno osekwero yie, kendo orach moloyo ng’at ma ok oyie.” (1 Timotheo 5:8) Ka ng’at ma kamano otamore loko yorene, chiege biro dwarore ni oyier kabe dwarore ni orit ngimane kod mar nyithinde kuom pogo dak kaluwore gi chik sirkal. Kuom adier, jodongo ma  Jokristo onego onon ahinya ka odonjne Jakristo ni otamore rito joode. Ka ng’ato otamore rito joode mano nyalo miyo ogole ei kanyakla.

Gero mokalo tong’. Achiel kuom joma nie kend nyalo bedo mager ahinya ma mi ngima jaode mogoyo obed kama rach. Ka ng’at ma gocho en Jakristo, jodong-kanyakla onego onon wachno ahinya mondo ging’e kabe en adier. Bedo gi mirima kod tim gero gin gik manyalo miyo ogol ng’ato ei kanyakla.Jo Galatia 5:19-21.

Ka bedo gi winjruok maber gi Jehova ni kama rach. Jaot achiel kinde duto nyalo miyo obed ma ok nyalre ne jaode bedo e lamo madier kata onyalo temo chune mondo oketh chike Nyasaye e yo moro. E kinde ma kamano, jaot ma ngimane ni kama rach biro yiero kabe yo makende monyalo ‘winjogo Nyasaye moloyo winjo dhano’ en pogo dak kaluwore gi chik sirkal.Tich Joote 5:29.

E kinde duto ma weche adek mowach malogo yudo ng’ato, onge ng’ama onego ochun jaot mitimone marach mondo opog dak, kata odhi nyime dak gi jaode. Kata obedo ni Jokristo motegno e winjruokgi gi Nyasaye kod jodongo nyalo chiwo kony kod puonj manie Muma, ok ginyal ng’eyo weche duto matimore e kind dichwo gi dhako. Jehova kende ema nyalo neno mago. Kuom adier, dhako ma Jakristo ok bi bedo ni chiwo luor ne Nyasaye kata ne chenro mar kend ka oowo wach seche mowuoyo kuom chandruok ma oyudo e ode mana mondo opog dak gi chwore, kata dichwo bende ok owinjore otim kamano. Jehova ong’eyo chenro maling’ling’ ma ng’ato timo kapok opogo dak, kata otem pando wachno e yo manade. Kuom adier, “gik moko duto gin duk, kendo gibet e lela nyim wang’ Jalo man gi wach kodwa.” (Jo Hibrania 4:13) To ka wach moro marach pod siko, onge ng’ama onego owuo marach kuom Jakristo moyiero pogo dak nikech onge gimachielo monyalo timo. Gikone, “wan duto wabiro chung’ nyim kom bura mar Nyasaye.”Jo Rumi 14:10-12.