Kal idhi e weche manie iye

Kal idhi kama ochanie weche mantie

 PENJO MAR 5

Onego Atim Ang’o Sama Ng’ato Kwinya e Skul?

Onego Atim Ang’o Sama Ng’ato Kwinya e Skul?

GIMOMIYO NG’EYO WACHNO BER

Gik ma itimo kata wacho sama ng’ato okwinyi nyalo miyo weche odhini maber kata marach.

INYALO TIMO NANG’O?

Par ane wachni: Thomas ok dwar dhi skul kendo. Mano en nikech kuom dweche adek mokalo, joskul wetene osebedo ka wacho weche maricho kuome. Ne giluonge gi nyinge ma galagala. Seche moko ng’ato ne nyalo tuomo buk manie lwete kae to owuondore ni obothne abotha. Samoro ka en e grup gi nyithindo wetene, achiel kuomgi ne nyalo dhiro wiye gi katoke to sama olokore mondo one ni en ng’a modhiro wiye, ng’atno ling’ thi ma ok onyal kata fwenyo ni en ng’a. Nyocha Thomas oyudo ka joskul wetene ondikone weche moko maricho moloyo kendo ma bwogone ngima ahinya e intanet . . .

Ka dine bed ni in Thomas, ditimo nang’o?

PAR ANE MONDI!

Nitie gima inyalo timo. Kuom adier, inyalo loyo ng’at ma kwinyi ma ok udhawo. E yo mane?

  •   LING’ ALING’A. Muma wacho niya: “Ng’a mofuwo ogolo mirimbe duto; to ng’a mariek ogeng’o mirimbe, mi okweye.” (Ngeche 29:11) Kapo ni inenori ng’at mokue mos, joma kwinyi samoro nyalo ol ma giwere aweya kodi.

  • KIK ICHUL KUOR. Muma wacho kama: “Kik uchul richo kar richo ne ng’ato ang’ata.” (Jo-Rumi 12:17) Chulo kuor biro mana ketho weche.

  • BED MOTANG’. Muma wacho niya: ‘Ng’at ma terore mos neno gimoro marach mi opondo.’ (Ngeche 22:3) Tim duto minyalo mondo kik ibed machiegni gi joma nyalo rwaki e chandruok kendo kik idhi kuonde minyalo kwinyie mayot.

  • MIGI DWOKO MA NE OK GIPAR. Muma wacho kama: ‘Dwoko wach mamuol geng’o mirima.’ (Ngeche 15:1) Inyalo kata temo lungo wach. Kuom ranyisi, ka ng’ato kwinyi kowacho ni ichwe ka anguro, inyalo mana nyiero matin kiwacho ni, “An ni to be anyalo mana duoke chien matin!”

  • WERI KODGI. Nora ma jahigni 19 wacho kama: “Ka iling’ sama ng’ato kwinyi, mano nyiso ni in ng’at ma pache otegno, kendo itek moloyo ng’at ma kwinyino. Mano nyiso ni in ng’at man gi ritruok, ma en kido ma ng’at ma kwinyino ongego.”—2 Timotheo 2:24.

  • BED GI CHIR. Jokwinyo fwenyoga ng’at ma luor luor kendo ma samoro ok nyal kedo kodgi. Mopogre gi mano, jokwinyo nyalo were kodi ka gifwenyo ni ok in ng’at ma yomyom.

  • PIM NE NG’AT MACHIELO GIK MA TIMORE. Japuonj moro moseritaya wacho kama: “Daher nyiso ng’ato ang’ata ma ikwinyo ni kik oling’ gi wachno. Nyiso ng’at machielo ber nikech mano nyalo reso jomamoko ma bende ikwinyo.”

Bedo gi chir biro miyo ibed gi teko ma ng’at ma kwinyi ongego