Kal idhi e weche manie iye

Kal idhi kama ochanie weche mantie

 SIGANA MAR 116

Kaka Wanyalo Dak Nyaka Chieng’

Kaka Wanyalo Dak Nyaka Chieng’

BE INYALO ng’eyo gima nyako matinno kod osiepenego somo? Ee, gisomo mana buk misomoni—Buga Moting’o Sigendini mag Muma. Kendo gisomo mana sigana misomoni—“Kaka Wanyalo Dak Nyaka Chieng’.”

Be ing’eyo gima gipuonjore? Mokwongo, gipuonjore ni onego wang’e Jehova kod Yesu Wuode, ka wadwaro dak nyaka chieng’. Muma wacho ni: ‘Mani e kaka inyalo dak nyaka chieng’. Puonjri e wi Nyasaye madier kod Wuode ma ne ooro e piny, Yesu Kristo.’

Ere kaka wanyalo ng’eyo Jehova Nyasaye kod Yesu Wuode? Achiel kuom yore mamoko en somo Buga Moting’o Sigendini mag Muma a chakruokne nyaka gikone. Bugni wuoyo ahinya kuom Jehova kod Yesu, donge? Kendo owuoyo ahinya kuom gik ma gisetimo kaachiel gi gik ma gibiro timo. Kata kamano, nitie gik ma onego watim maloyo somo bugni kende.

Be ineno buk moro e dier ot kanyo? En Muma. Yud ng’ato mondo osomni kuonde ma sigendini manie bugni yudore ei Muma. Muma miyowa weche duto ma onego wang’e mondo omi wati ne Jehova e yo makare, kendo mondo wayud ngima mochwere. Kuom mano, somo Muma pile onego obed gima watimo ndalo duto.

Kata kamano, puonjruok e wi Jehova Nyasaye kod Yesu Kristo kende ok oromo. Wanyalo bedo gi ng’eyo matut ahinya kuomgi kaachiel kod puonjgi, to ema podi ngima mochwere nyalo bayowa. Be ing’eyo gi machielo ma dwarore?

Dwarore bende ni wadag kaluwore gi gigo ma wapuonjore. Bende inyalo paro Judas Iskariot? Ne en achiel kuom ji 12 ma ne Yesu oyiero mondo obed jootene. Judas ne ong’eyo Jehova kod Yesu e yo matut. Kata kamano, ang’o ma ne otimorene? Bang’ kinde, ne obedo ng’at ma oherore kende, kendo ne ondhogo Yesu ir wasike kuom ng’inje 30 mag fedha. Nikech mano, Judas ok noyud ngima mochwere.

Bende iparo Gehazi, ng’at ma ne wapuonjore kuome e Sigana mar 69? Ne odwaro lewni kod pesa ma ne ok mage. Kuom mano, ne otiyo gi miriambo mondo omi oyud gigi. Kata kamano, Jehova ne omiye kum. Kendo obiro kumowa wan bende, ka ok waluw chikene.

Kata kamano, nitie ji mabeyo mang’eny mosebedo ka tiyo ni Jehova kinde duto. Wadwaro ni mondo wabed kaka gin, donge? Rawera Samuel en ranyisi maber ma wanyalo luwo. Par bende kaka ne waneno e Sigana mar 55, ni Samuel ne en jahigini ang’wen kata abich kane ochako tiyo ni Jehova e hekalu mare. Kuom mano, kata bed ni itin maromo nade, ok itin ahinya ma ok inyal tiyo ni Jehova.

Kuom adier, ng’at ma waduto wadwaro luwo en Yesu Kristo. Kata mana e kinde ma ne podi en rawera, mana kaka onyis e Sigana mar 87, Yesu ne ni e hekalu kowuoyo gi ji e wi Wuon mare manie polo. We mondo waluw ranyisi mare. Kendo we mondo wanyis ji mang’eny ma wanyalo, gik mabeyo kuom Jehova Nyasaye kod Wuode Yesu Kristo. Ka watimo gigi, to wabiro dak nyaka chieng’ e paradis manyien mar Nyasaye e piny kae.