Kal idhi e weche manie iye

Kal idhi kama ochanie weche mantie

 SIGANA MAR 69

Nyako Moro Konyo Jatelo Maduong’

Nyako Moro Konyo Jatelo Maduong’

BE ING’EYO gima nyako matinni wacho? Onyiso dhakono wach Elisha, janabi mar Jehova, kod gik mabeyo ma Jehova konyo Elisha timo. Dhakono ok ong’eyo Jehova nikech ok en Nya-Israel. Koro, we mondo wane gimomiyo nyakono ni e od dhakono.

Dhakono en Nya-Suria. Chwore en Naaman, jatend jolweny ma piny Suria. Jo-Suria ne omako nyako matinni ma Nya-Israel, kendo ne okele ir chi Naaman mondo obed jatichne.

Naaman nigi tuwo marach miluongo ni dhoho. Tuwoni nyalo kata miyo kuonde moko e del mondo opokore ma lwar. Kuom mano, ma e gima nyakono nyiso chi Naaman: ‘Ma ruodha dodhi ir janabi mar Jehova man Israel. Dine ochange kuom tuwone mar dhohono.’ Bang’e, inyiso chwor dhakono wachni.

Naaman gombo ahinya mondo ochangi; omiyo ong’ado ni mondo odhi Israel. Ka ochopo kuro, odhi e od Elisha. Elisha oro jatichne ni mondo onyis Naaman odhi olwokore e Aora Jordan nyadibiriyo. Wachni wang’o i Naaman ahinya, kendo owacho ni: ‘Aore mag pinywa beyo moloyo aore duto mag Israel!’ Bang’ wacho mano, Naaman a.

Kata kamano, jotichne nyise ni: ‘Ruoth, ka Elisha dine onyisi ni mondo itim gima tek timo, donge di timo. Koro, ang’o momiyo ok ilwokori alwoka kaka owachono?’ Naaman winjo wach jatichne, odhi kendo onyumore e Aora Jordan nyadibiriyo. Kane otimo kamano, ringre nobedo motegno kendo mangima!

Naaman mor ahinya. Odok ir Elisha kendo onyise ni: ‘Koro, ang’eyo adier ni Nyasaye mantie Israel e Nyasaye makende mar adier e piny ngima. Kuom mano, koro yie ikaw michnani.’ Elisha to dwoko ni: ‘Ooyo, ok abi kawe.’ Elisha ong’eyo ni ok en gima kare kawo michno nikech Jehova ema ne ochango Naaman. Kata kamano, Gehazi jatij Elisha dwaro ni michno obed mare.

Kuom mano, ma e gima Gehazi timo. Bang’ Naaman wuok, Gehazi ringo mondo ojuke. Gehazi wacho ni: ‘Elisha oora iri mondo anyisi ni odwaro moko kuom michgo, nikech osiepe moko obiro limbe.’ Kuom adiera mano en miriambo. Naaman to ok ong’eyo ni mano miriambo; koro, omiyo Gehazi moko kuom gigo.

Ka Gehazi duogo, Elisha ng’eyo gima osetimo. Jehova osenyise. Kuom mano, Elisha koro wacho ni: ‘Nikech itimo gima rachno, dhoho mar Naaman nobed kuomi.’ Kendo mano timore mana gikanyono!

En puonj mane ma wanyalo yudo kuom wechegi duto? Mokwongo en ni, onego wawuo kuom Jehova mana kaka nyako matinno. Mano nyalo kelo ber mang’eny. Mar ariyo, ok onego wabed jong’ayi kaka Naaman ne okwongo bedo, to kar mano, onego wawinj wach jotich Nyasaye. To mar adek, kik wawach miriambo kaka Gehazi notimo. Donge wanyalo puonjore gik mang’eny ka wasomo Muma?