Kal idhi e weche manie iye

Kal idhi kama ochanie weche mantie

 SIGANA MAR 111

Wuowi ma ne Nindo Otero

Wuowi ma ne Nindo Otero

YAWA! En ang’o matimore kae? Be nyathi man pinyno ohinyore ahinya? Ne! achiel kuom joma wuok e odno en Paulo! Be inyalo neno Timotheo bende kanyo? Nyathino opodho kowuok e dirisa, koso?

Ee, mano e gima oa timore. Paulo ne onwang’o golo twak ne jopuonjre man Troa kae. Ne ong’eyo ni ok ne odhi nenogi machiegni kendo, nikech ne nyaka oidh yie moago e odiechieng’ maluwe. Kuom mano, ne odhi nyime gi wuoyo nyaka chuny otieno.

Ne onwang’o wuowini, miluongo ni Yutiko obet e dirisa, kendo nindo ne otere. Ne owuok e dirisa ma olwar piny kowuok e gorofa mar adek! Kuom mano, inyalo neno gimomiyo chuny ji chandore kae. Ka ji dhi ting’o wuowino, otimore mana kaka ne giparo. Osetho!

Ka Paulo neno ni wuowino osetho, oluowore kuome, kendo okwake. Bang’e owachonegi ni: ‘Kik chunyu chandre. Ongima!’ Kendo ongima adier! Mani en hono! Paulo oseduoke e ngima kendo! Ji bedo gi iilo mang’eny nikech wachno.

Giduto gidok e gorofa malo mondo gichiem. Paulo dhi nyime gi twak nyaka okinyi. Kata kamano, inyalo bedo gi adiera ni Yutiko ok ochako odok e nindo kendo! Bang’e, Paulo, Timotheo kod jogo ma ne giwuothogo idho yie. Bende ing’eyo kama gidhiye?

Paulo koro tieko wuodhe mar adek e tij lendo, kendo odok dalagi. E wuodhni, Paulo ne odak kuom higini adek e dala mar Efeso kende. Kuom mano, mani en wuoth makawo ndalo mang’eny maloyo wuodhe mar ariyo ma ne osetimo.

Bang’ wuok Troa, yie gowo Mileto kuom kinde matin. To nikech Efeso en mana mail matin gi kanyo, Paulo oro ote ni mondo jodong kanyakla man Efeso obi Mileto, mondo owuo kodgi mogik. Bang’ mano, e seche ma koro yie wuok, giwinjo malit ahinya nikech neno Paulo kadhi!

Gikone, yie duogo nyaka Kaisaria. Kinde ma Paulo dak e od japuonjre Filipo, janabi Agabo nyiso Paulo wach moro. Owacho ni ibiro timo Paulo mabus kobiro Jerusalem. To adier, ma e gima timore. Bang’ bedo e jela Kaisaria kuom higini ariyo, Paulo itero Rumi mondo oyale e nyim Kaisar ma jatend Rumi. We mondo wane gima timore e wuodhe mar dhi Rumi.