Kal idhi e weche manie iye

Kal idhi kama ochanie weche mantie

 SIGANA MAR 25

Jood Jakobo Dar Dhi Misri

Jood Jakobo Dar Dhi Misri

OSEF chunye chandore ahinya ma ok onyal pando. Onyiso jotichne duto mondo owuog ei ot. Seche ma odong’ kende gi owetene, Josef chako yuak. Wanyalo paro kaka owetene ne obwok, nikech gikiya gimomiyo oyuak. Gikone, Josef wachonegi niya: ‘An Josef. Wuora be podi ngima?’

Owetene obwok ahinya ma dhogi omoko. Giluor. Kata kamano, Josef wachonegi ni: ‘Yie mondo ubi machiegni.’ Gitimo kamano, omiyo onyisogi ni: ‘An owadu Josef, ma ne uuso e piny Misri.’

Josef dhi nyime gi wuoyo e yo mamuol ka owacho ni: ‘Kik une marach e chunyu ni ne uusa koni. Kuom adier, Nyasaye ema ne oora e piny Misri mondo ares ngima ji. Farao oseketa mondo abed jatend pinyni duto. Kuom mano, koro returu udog ir wuora unyise wachni. Kendo unyise ni obi odag koni.’

Bang’ mano, Josef keto lwete kuom owetene, okwakore kodgi, kendo onyodhogi. Farao ka winjo ni owete Josef obiro, owacho ni Josef niya: ‘We mondo gikaw geche punda mondo gidhi giom wuon-gi, mondegi koda nyithindgi duto gibi kodgi koni. Abiro miyogi lowo maber ahinya e piny Misri.’

Mano e gima ne gitimo. Inyalo neno Josef kanyo ka romo ni wuon mare kane obiro Misri gi joode duto.

Jood Jakobo ne osebedo mang’eny ahinya. Kwan margi ne romo ji 70 kane gidhi Misri, mano ka wakwano Jakobo, nyithinde kod nyikwaye. Kata kamano, ne nitie kata mondegi, to bende nyalo bedo ni ne nitie jotich mang’eny. Jogo duto ne ochako dak Misri. Ne iluongogi ni Jo-Israel, nikech Nyasaye ne oloko nying Jakobo mondo obed Israel. Jo-Israel ne obedo joma kende ahinya e wang’ Nyasaye, mana kaka wabiro neno bang’e.