Kal idhi e weche manie iye

Kal idhi kama ochanie weche mantie

 SIGANA MAR 13

Ibrahim—Osiep Nyasaye

Ibrahim—Osiep Nyasaye

ACHIEL kuom kuonde ma ji ne odhi dakie bang’ Ataro ne iluongo ni Ur. Ur ne obedo boma maduong’ miwuoro ma nigi mier mabeyo e iye. Kata kamano, joma ne ni kuno ne lamo nyiseche manono. Kamano bende e kaka ne gitimo kane gin Babel. Joma ne ni Ur koda Babel ne ok chal kaka Noa gi Shem wuode, ma ne osiko ka tiyo ni Jehova.

Noa ma ne en ng’at makare, ne otho higini 350 bang’ ataro. Higini ariyo bang’ mano, ne onyuol ng’at ma ineno e pichani. Ne en ng’at makende e wang’ Nyasaye. Nyinge ne en Ibrahim. Ne odak gi joode e boma maduong’ mar Ur.

Odiechieng’ moro achiel, Jehova ne owacho ni Ibrahim niya: ‘A e pinyu kendo e kind anyuolau, e od wuoru, idhi e pinyno ma ananyisi.’ Bende Ibrahim ne owinjo wach Nyasaye ma oweyo ber duto ma ne ni Ur? Ee ne otimo mano. Ibrahim ne iluongo ni osiep Nyasaye nikech ndalo duto ne otimo gima Nyasaye dwaro.

Wede Ibrahim moko ne odhi kode kane owuok Ur. Tera wuon mare ne otimo kamano. Lut ma okewe bende ne otimo kamano. Sara chi Ibrahim bende ne odhi. Bang’ kinde matin ne gichopo kama iluongo ni Haran, kama Tera ne othoe. Ne gin mabor ahinya gi Ur.

Bang’e, Ibrahim kod joode ne owuok Haran ma gidhi e piny miluongo ni Kanaan. Kane gin kanyo, Jehova ne owachone ni: ‘Kothi anami pinyni.’ Ibrahim ne odak e hema kane en Kanaan.

Nyasaye ne ochako konyo Ibrahim ma obedo kod kweth maduong’ mag rombe koda jamni mamoko kaachiel gi jotich mang’eny. Kata kamano, Ibrahim gi Sara ne onge nyithindo ma maggi.

Ibrahim kane jahigini 99, Jehova ne owachone kama: ‘Asingora, ni inibedi wuon ogendini mang’eny.’ To mano ne nyalo timore nade nikech Ibrahim kod Sara koro ne oti ma ne ok ginyal yudo nyathi?