Kal idhi e weche manie iye

Warwaki Mondo Ibi Ilim Bethel ma Amerka

Warwaki Mondo Ibi Ilim Bethel ma Amerka

Dichwo moro gi chiege mawuok e piny Vanuatu nowacho niya bang’ limo Bethel ma Amerka: “Wiwa ok nyal wil ngang’ gi kaka ne wamor kane walimo Bethel.” Higa ka higa ji mokalo aluf 70 limoga Bethelno, kendo ng’enygi wachoga kamano.

Nitie Bethel adek ma oger kuonde mopogore opogore e piny Amerka. Be iselimo kuonde adekgo? Ka podi, warwaki mondo itim kamano.

Ofiswa Maduong’ man Brooklyn, New York. Kibiro limo ofisni, achiel kuomwa biro wuotho kodi konyisi tije mitimo kuno masiro tij lando wach maber e piny mangima. Nitie kuonde ariyo mochanie gik mineno ma ng’ato nyalo wuothoe kende. Achiel kuom kuondego wiye wacho ni “A People for Jehovah’s Name,” to ochanie gik manyiso histori mar oganda Jehova chakre kinde Yesu nyaka kindewagi. Kamachielo wiye wacho ni “The Bible and the Divine Name,” mochanie loko mopogore opogore mag Muma moting’o nying Nyasaye.

Kama Itime Skunde mag Muma man Patterson, New York. Bi mondo ing’e weche momedore e wi skunde mopogore opogore mitimo kuno kaka Skul mar Gilead gi Skul mar Jokomiti Matayo Bad Ofis kod Mondegi. Bende, ibiro neno piche gi vidio mopogore opogore manyiso tije mitimo e ofise mamoko man kuno moriwo ofise mag Art, Audio/Video Services, Legal office, gi Service department.

Kar Goyo gi Kowo Buge, Wallkill, New York. Warwaki kae mondo ibi ine kaka Muma gi buge malero Muma igoyo, iriwo, kendo ikowo e kanyakla mopogore opogore man Amerka, Caribbean, gi pinje mamoko.

Wuotho kuonde adekgi kawo seche adi?

Wuotho e ofise man Brooklyn kawo gimoro sa achiel; Patterson, kawo seche ariyo kama; to Wallkill, kawo gimoro sa achiel gi nus.

Gin ng’a gini mabiro wuotho kodi ka leroni gik mitimo kuondego?

Joma tiyo Bethel ema wuotho gi welo ka ginyisogi gik matimore kuno. Gikawo migawoni kaka achiel kuom migepe mowinjore gitim mondo gisir tij puonjo Muma mitimo e piny mangima. Chop Mei 2014, ji mokalo 5,000 ne tiyo kuonde adekgo kendo ji 3,600 kuomgi ne osetieg kaka ginyalo lero ne welo gik mitimo kuno. Inyalo ler ne welo tije mitimo e ofisego e dhok madirom 40 kama.

Ng’ato chulo pesa adi eka owuoth kode kuondego?

Onge pesa moro amora michulo.

Be ochuno ni ng’ato obed Janeno mar Jehova mondo eka oyiene limo ofisego*?

Ooyo. Ji mang’eny malimo ofisego ok gin Joneno. Bed ni ng’ato en Janeno kata ooyo, obiro puonjore weche mathoth mitimo masiro tich ma Joneno mag Jehova timo e piny mangima.

Miyo moro ma Ja-Islam ne olimo Patterson. Bang’ limbeno nowacho kama: “Daher ahinya bedo achiel kuom joma tiyo kae. Erokamanouru ahinya kuom nyisa luor ma kama.”

Be oyiene nyithindo limo ofisegi?

Ee! Orwakgi ahinya. Limo ofisegi nyalo yawo pach nyathi ahinya. John, modak Amerka ne olimo ofisego mondiko niya: “Nyithindo ma ne walimogo ofisego pod wuoyo e wi wach limbeno. Kane pok wabiro kuno, wach tiyo e Bethel ne chalonegi lek, to gie sani, gineno ni en gima nyalore kendo gidwaro tiyo kuno ka gibedo jomadongo.”

Be ng’ato nyalo limo ofise mag Joneno mag Jehova e pinje mamoko?

Ee. Onyalo. Osetim chenro mondo joma dwaro olim ofise mang’eny mag Joneno e pinje mamoko. Mondo iyud kama ofis nitie e piny moro, dhi kar Office and Tour Information. Warwaki ahinya mondo ibi ilim achiel kuom ofise mag Joneno mag Jehova.