Kal idhi e weche manie iye

Puonjruok Muma En Ang’o?

Puonjruok Muma En Ang’o?

Joneno mag Jehova nigi chenro mar puonjruok Muma, kendo chenrono konyo ji yudo dwoko mag penjo mang’eny, kuom ranyisi:

  • Nyasaye en ng’a?

  • Be Nyasaye dewa adier?

  • Ang’o ma anyalo timo mondo kend mara odhi maber?

  • Ang’o ma anyalo timo mondo abed gi ngima mopong’ gi mor?

Weche ma luwogi nyiso dwoko mag penjo ma ji ohero penjo e wi chenrowa mar puonjruok Muma.

Wanyalo kawo wach moro maduong’, kuom ranyisi, “Nyasaye” kata “kend,” kae to wanono ndiko mopogore opogore e Muma ma wuoyo kuom wachno. Sama wapimo ndiko mopogore opogore kamano, waneno gik ma Muma wacho e wi wach ma wanonono, to mano miyo Muma lerore owuon.

Wapuonjorega ka watiyo gi buk miluongo ni Gima Muma Puonjo. Bugno wuoyo kuom weche mopogore opogore, moriwo gima Muma wacho e wi Nyasaye, Yesu, kod ngima ma kinde mabiro.

Ng’ato chulo pesa adi mondo opuonjre Muma? Onge. Bug puonjruok be ichiwo nono.

Puonjruok kawoga seche adi? Ji mang’eny tiyoga gi sa achiel kama juma ka juma e puonjruok Muma kodwa. Onge sa sie moketi. Wabiro temo mondo wati gi thuolo ma in iwuon e miyiero.

Ka akwayo mondo opuonja Muma, ang’o ma biro timore? Kikwayo mondo opuonji Muma, achiel kuom Joneno mag Jehova biro manyi mondo upuonjru e sa miyiero, kod kama iyiero. Obiro tiyo gi dakika machuok mondo onyisi kaka watimoga puonjruok. Ka mitni, inyalo dhi nyime.

Ka ayie mondo puonja Muma, be ochuno ni abed achiel kuom Joneno mag Jehova? Ooyo. Joneno mag Jehova mor gi puonjo ji Muma, kata kamano, ok wachun ng’ato ang’ata mondo obi e dinwa. Kar mano, wan wanyiso mana ji gima Muma puonjo, nikech wang’eyo ni ng’ato ka ng’ato nigi ratiro mar yiero puonj mobiro rwako kata kama obiro lemee.​—1 Petro 3:15.