Joneno mag Jehova ok donjre e weche siasa nikech yie margi otenore kuom puonj mag Muma. Ok wagoga ombulu kata kura ne chama moro amora kata ne josiasa, bende, ok wachung’ga e yiero mondo ogonwa ombulu, kendo ok wadonjre e chenro moro amora mar temo loko chike mag sirkal mondo giwinjre gi dwachwa, kata loko sirkal chuth. Muma nyisowa gimomiyo ok onego wadonjre e weche siasa.

•   Waluwo ranyisi mar Yesu, ma ne odagi mondo ji okete ruoth. (Johana 6:15) Nonyiso jopuonjrene ni ‘kik gibed mag piny,’ kata riwo lwedo konchiel e weche mag siasa.​—Johana 17:14, 16; 18:36; Mariko 12:13-17.

•   Waketo genowa kuom Pinyruodh Nyasaye, ma ne Yesu owuoye ka ne owacho niya: “Wach maber mar Pinyruoth ibiro yal e piny mangima.” (Mathayo 24:14) Nikech watiyo e lo Pinyruodh Nyasaye kendo oorwa mondo waland ni Pinyruodhno biro, ok wadonjre e weche siasa mag piny moro amora, moriwo nyaka piny ma wadakie.​—2 Jo-Korintho 5:20; Jo-Efeso 6:20.

•   Nikech ok wadonjre e weche siasa, mano miyo wanyalo wuoyo gi ji duto e wi Pinyruodh Nyasaye ka wan thuolo, moriwo nyaka joma nigi paro mopogore opogore e wi weche siasa. Wanyiso kokalo kuom wechewa kod timbewa ni wan gadier ni Pinyruodh Nyasaye kende e ma biro tieko chandruoge duto manie piny.​—Zaburi 56:11.

•   Nikech ok wadonjre e weche siasa kata riwo lwedo konchiel, mano miyo wabedo riwruok mar owete moherore e piny ngima. (Jo-Kolosai 3:14; 1 Petro 2:17) Mopogore gi mano, dinde ma donjore e weche siasa to pogo joma nie dindego.​—1 Jo-Korintho 1:10.

 Wachiwo luor ne sirkende. Kata obedo ni ok wadonjre e weche siasa, wachiwo luor ne sirkende ma locho e pinje ma wadakie. Mano winjore gi gima Muma wacho niya: “Ng’ato ka ng’ato mondo obolre ne joloch.” (Jo-Rumi 13:1) Waluwo chike sirkende, wachulo osuru, kendo wariwo lwedo chenro ma giketo mondo gikonygo joma nie pinje ma gilochoe. Kar temo loko sirkal, waluwo puonj manie Muma ni walem ne “ruodhi gi jotelo duto,” to ahinya ahinya sama ging’ado paro e wi weche ma nyalo mulo ratiro ma wan-go mar lamo.​—1 Timotheo 2:1, 2.

 Wachiwo luor ne yiero ma jomamoko timo e wi weche mag siasa. Kuom ranyisi, ok wachoch chenro mag goyo ombulu kata temo loko pach joma oseyiero mar dhi goyo ombulu.

 Be tamruok donjore e weche siasa en gima wachako mana e kindegi? Ooyo. Joote kod Jokristo mokwongo ne nigi paro achiel achielno e wi sirkende. Buk miluongo ni Beyond Good Intentions wacho kama: “Kata obedo ni Jokristo mokwongo ne ong’eyo ni ne nyaka gimi joloch luor, ne ok gidonjore e weche siasa.” Bende, buk miluongo ni On the Road to Civilization wacho ni Jokristo mokwongo “ne ok oyie ni oyiergi mondo gibed joloch.”

 Be wachochoga kuwe e pinje ma wadakie mana nikech ok wadonjre e weche mag siasa? Ooyo. Sirkende ok onego obed gi luoro moro amora, nikech wan joma ohero kuwe. Ripot ma ne ogol gi National Academy of Sciences of Ukraine e higa mar 2001, nowacho kama ka ne owuoyo e wi Joneno mag Jehova: “E kindegi, nitie joma osin gi Joneno mag Jehova nikech ok gidonjre e weche siasa; chung’ margino e ma nomiyo sirkende mag Nazi kod Komunist ma ne locho gi agoko e kinde mokalo odonjonegi.” To kata obedo ni ne osandgi e bwo loch mar Soviet Union, Joneno mag Jehova pod ne odhi nyime luwo chike mag sirkal. Nikech ne gin joratiro, ne gitiyo gi kinda e puothe kod e kembe ma ne oorgi ni gitiye, kendo ne ok gitimo gimoro amora ma ne nyalo miyo sirkal otang’ kodgi.” Ripodno notieko ka wacho ni e kindewagi bende, gik ma Joneno mag Jehova timo, kod yie margi “ok keth kuwe e pinje ma gidakie.”