Joneno mag Jehova oyie ni chike kod puonj ma yudore e Muma nyalo konyowa timo yiero ma moro Nyasaye kendo ma kelonwa ber. (Isaya 48:17, 18) Ok waloso chikego kod puonjgo, kata kamano, wayie mondo gita ngimawa. Ne ane kaka moko kuomgi otudore gi timo kisera. a

•   Kend en riwruok ma siko. (Mathayo 19:6) Joneno mag Jehova neno kisera kaka okang’ ma iko ng’ato ne kend, to mano e momiyo wakawe mapek.

•   Joma timo kisera nyaka bed joma hikgi oromo donjo e kend. Joma kamago “osekalo higni ma rowere thiewoe,” tiende ni gisekalo higni ma gombo mag nindruok niga malo ahinya.​—1 Jo-Korintho 7:36.

•   Joma timo kisera onego obed thuolo mar donjo e kend. Moko kuom joma oseketho kendgi chuth ka luwore gi chik pod ok ni thuolo donjo e kend gi ng’at machielo e wang’ Nyasaye, nikech ka luwore gi Ndiko, terruok kende e ma nyalo miyo ng’ato oketh kend chuth.​—Mathayo 19:9.

•   Jokristo ma dwaro donjo e kend onego otim kamano mana gi joma gin-go e yie. (1 Jo-Korintho 7:39) Joneno mag Jehova ong’eyo ni chikno ok wuo mana kuom joma ochiwo luor ne yie kod puonj maggi, to owuoyo kuom donjo e kend gi Janeno ma osebatisi. (2 Jo-Korintho 6:14) Nyasaye osebedo ka chiko jotichne ni gikendre mana gi joma nigi yie kaka margi. (Chakruok 24:3; Malaki 2:11) Jotim nonro ma kindegi bende osefwenyo ni chikno konyo ahinya. b

•   Nyithindo onego owinj jonyuolgi. (Ngeche 1:8; Jo-Kolosai 3:20) Chikno nyiso ni nyithindo ma pod nie bwo jonyuolgi onego oluw chike ma oketnegi e wi weche kisera. Mago oriwo higni ma nyathigi ma wuoyi kata ma nyako nyalo chakoe kisera gi ng’at machielo, kod weche mamoko.

•   Ka luwore gi Ndiko, Janeno ka Janeno e ma onego oyier ka be obiro chako kisera gi ng’at machielo kod kinde ma onego otimie mano. Mano winjore gi puonj mar Muma ma wacho niya: “Ng’ato ka ng’ato noting’ ting’ne owuon.” (Jo-Galatia 6:5) Kata kamano, thoth Joneno ma gombo chako kisera manyoga paro kod rieko kuom Joneno motegno kendo ma dwaro ni weche odhinegi maber.​—Ngeche 1:5.

•   Timbe mang’eny ma thoth joma timo kisera timoga gin richo madongo. Kuom ranyisi, Muma chikowa ni wakwed terruok. Mano ok oriwo mana nindruok kende, to oriwo nyaka timbe mamoko mochido e kind joma ok okendore kaka tugo gi duong’ ng’ama chielo, kata nindruok mar dhok kata mar sianda. (1 Jo-Korintho 6:9-11) Kata mana timbe ma chiero gombo mag nindruok e kind joma ok okendore ikwano kaka “tim ma ok ler” kendo ma Nyasaye osin-go. (Jo-Galatia 5:19-21) Bende, Muma kwero mbaka mochido mopong’ gi “weche modwanyore.”​—Jo-Kolosai 3:8.

•   Chuny oting’o wuond mang’eny. (Jeremia 17:9) Onyalo wuondo ng’ato ma tim gima ong’eyo maber ni rach. Joma timo kisera nyalo geng’o chandruoge mang’eny ka gitemo mondo kik gibed kar kendgi e alwora ma nyalo miyo gidonj mayot e tem. Ginyalo yiero bedo e grup ma nigi ji mang’eny, kata yiero mondo ng’at machielo obed kodgi sama gin kar kendgi. (Ngeche 28:26) Jokristo ma pok odonjo e kend ma manyo joma ginyalo kendorego onego otang’ ahinya gi kisera mitimo e kuonde tudruok e intanet, to moloyo sama gichako kisera gi ng’at ma ok ging’eyo maber.​—Zaburi 26:4.