Aruse mag Joneno mag Jehova itimoga e yo ma nyiso luor, kendo kinde mang’eny igologa twak ma wuok e Muma. Bang’ mano, samoro weg arus nyalo chano nyasi moro mondo ji obed kanyachiel kendo gichiem. a Yesu nodhi e nyasi machal gi mano e taon mar Kana e kinde ma nochako tije mar lendo e piny kae.​—Johana 2:1-11.

•  Ang’o ma timorega e nyasi mar arus?

•  Joneno mag Jehova timoga arusegi kanye?

•  Gin jomage ma nyalo dhi e arusego?

•  Ere kaka ji onego orwakre sama gidhi e arusego?

•  Be ji chiwoga mich e arusego?

•  Be oyie ne ji ting’o glese malo kata tuomogi?

•  Be ikiroga ochele kuom weg arus?

•  Be ji chiemoga kendo metho?

•  Be nitiega thum kata miel?

•  Be Joneno mag Jehova timoga nyasi mar paro odiechieng arusegi higa ka higa?

 Ang’o ma timorega e nyasi mar arus?

 Gima duong’ ma timorega e nyasi mar arus en twak mar dakika 30 kama migologa gi achiel kuom Joneno mag Jehova. Twagno jiwoga kaka Muma nyalo konyo joma timo arusgo mondo gibed gi kend masiko, mopong’ gi hera, kod mor.​—Jo-Efeso 5:33.

 E pinje mang’eny, sirkal oyienega Joneno moko mag Jehova mondo giriw kend e kind joma dwaro kendore. Ka mano e gima chik oyiego, jogo ma dwaro kendore singorega ka twak chiegni rumo. Ka gihero, moro ka moro kuomgi nyalo rwako ne nyawadgi tere. Bang’ mano, ng’at ma riwo kendno nyalo lando ni dichwono gi dhakono koro osekendore.

 E pinje moko, chik dwaro ni joma dwaro kendore oriw kend margi e ofis mar sirkal. Jogo ma dwaro kendore timoga kamano kinde matin ka pok ogolnegi twak mar kend. Ka po ni joma dwaro kendore ok osingore e ofis mar sirkal, ginyalo timo kamano ka twak chiegni rumo. To ka po ni gisesingore e ofis mar sirkal, ginyalo nwoyo weche mag singruokgo e yo ma nyiso ni ne gisetimo kamano. Twagno ibiro tiek gi lamo mikwayogo Nyasaye mondo oguedh joma okendorego.

 Joneno mag Jehova timoga arusegi kanye?

 Joneno mang’eny yieroga mondo gitim arusgi e Kingdom Hall ka mano nyalore. b Ka po ni weg arus dwaro timo nyasi mar chiemo kata budho, ginyalo timo kamano kamachielo.

 Gin jomage ma nyalo dhi e arusego?

 Ka po ni itimo arus e Kingdom Hall, ng’ato ang’ata nyalo biro, bed ni en Janeno kata ok en Janeno. Ka weg arus oloso nyasi moro mar chiemo kata budho, ginyalo gwelo joma giyiero.

 Ere kaka ji onego orwakre sama gidhi e arusego?

 Kata obedo ni onge chik moro sie moket ma nyiso kaka ji onego orwakre sama gidhi e aruse mitimo e Kingdom Hall, Joneno mag Jehova rwakorega e yo ma nyiso luor kendo ma ok okalo tong’, mana kaka Muma tayogi. Gimorga ka jomamoko bende timo kamano. (1 Timotheo 2:9) Onge kiawa ni ka po ni weg arus oloso nyasi mar chiemo kata budho, pod gibiro rwakore e yo mowinjore.

 Be ji chiwoga mich e arusego?

 Muma jiwowa ni wabed jochiwo. (Zaburi 37:21) Joneno mag Jehova morga chiwo kata kawo mich momigi e arus. (Luka 6:38) Kata kamano, Joneno ok kwaga mich kata lando nying joma ochiwo mich e arus. (Mathayo 6:3, 4; 2 Jo-Korintho 9:7; 1 Petro 3:8) Ok gitimga kamano nikech mano ok luwre gi puonj mag Muma, to mano bende nyalo chwanyo jomoko kata kuodo wigi.

 Be oyie ne ji ting’o glese malo kata tuomogi?

 Muma ok kwer tim mar ting’o glese malo kata tuomogi, kata kamano, weg arus moko nyalo yiero mar kwero welo mondo kik gitim kamano nikech mano nyalo chwanyo welo mamoko.​—Jo-Rumi 14:21.

 Be ikiroga ochele kuom weg arus?

 Ooyo. Kuonde moko ji kiroga ochele kata otese moko matindo tindo kuom joma eka oya kendore. Giparo ni ka gitimo kamano to joma okendorego biro yudo hawi maber, mor, kendo gibiro dak aming’a. Kata kamano, Joneno mag Jehova kwedoga gik motudore gi timbe juok. Timbego oriwo gik ma ji timo mondo giyud hawi maber, ma gin timbe ma Muma ok oyiego.​—Isaya 65:11.

 Be ji chiemoga kendo metho?

 Ok oyie ne ji chiemo kata metho e nyasi mar kend mitimo e Kingdom Hall. Kata kamano, weg arus moko yieroga mondo gibag nyasi mar chiemo kod metho kamoro machielo bang’ riwo kend. (Eklesiastes 9:7) Ka giyiero mar keto kong’o e nyasino, nyaka gine ni ji ok ometho mokalo tong’ kendo ni joma madho kong’o gin joma osechopo higni ma sirkal oyienegi madho kong’o.​—Luka 21:34; Jo-Rumi 13:1, 13.

 Be nitiega thum kata miel?

 Ka weg arus oloso kama ji nyalo chiemoe kata budhoe, ginyalo yiero mondo ji owinj thum kata omiel. (Eklesiastes 3:4) Thum ma giyieroga pogorega ka luwore gi alwora ma gintie kod kit thum ma gihero. Nyasi mitimoga e Kingdom Hall bedoga gi thumbe ma wechegi osir gi Muma.

 Be Joneno mag Jehova timoga nyasi mar paro odiechieng arusegi higa ka higa?

 Nikech puonj mag Muma ok riw lwedo kata ok kwer tim mar paro odiechieng arus higa ka higa, Joneno mokendore biro yiero kendgi ka be gibiro paro odiechiengno kata ooyo. Ka giyiero paro odiechiengno, ginyalo timo kamano ka gin kar kendgi kata ka gin gi wedegi kod osiepegi.