CHISHINA CHAMUKAPETULU

Kuzanga vandumbwetu namulwola lwaukalu

1, 2. (a) Vaka-Kulishitu muYuleya vapwile muukalu muka? (b) Vyuma muka vyavevwishile kuwaha?

MUMWAKA wa 46 C.E., muYuleya mwapwile zala yakalombolombo. Tumbaji vaKulishitu vaze vapwile muYuleya kavapwile najimbongo jakulanda vyakulyako mwomwo jindando jatohwele chikuma. Vazeyele chikuma mwomwo yazala. Oloze Yehova avakafwile mujila yakulipwila yize kanda akafwengaho lyehi tumbaji veka. Uno jila muka avakafwilililemo?

2 Omu vaka-Kulishitu vavaYuleya navaka-mafuchi eka muAndeyoka muSulya vevwile ngwavo vandumbwavo muYelusalema namuYuleya vali muukalu, vakungulwile vyuma vyakuvakafwa. Kaha vasakwile malunga vakuhya vavali vaMbalanape naSaulu, mangana vatwale vyuma kana kuvakulwane muchikungulwilo chamuYelusalema. (Tangenu Vilinga 11:27-30; 12:25.) Achishinganyekenu kuwaha vevwile vandumbwetu muYuleya hakuvatumina wana kana kuli vandumbwavo muAndeyoka.

3. (a) Vatu jaKalunga makumbi ano veji kukavangizanga ngachilihi vyuma valingile vaka-Kulishitu muAndeyoka? Hanenu chakutalilaho. (Talenu nawa lipwata “ [lya]Mulimo Watete Twazachile waKukafwa Vaze Vali muUkalu.”) (b) Vihula muka natushimutwila mukapetulu uno?

3 Mujimbu kanou wamulikulukaji lyamyaka lyakulivanga wakukafwa chakufuma kuli vaka-Kulishitu vakulifuchi lyeka, ukiko mujimbu watete vasoneka wakukafwa vandumbwetu vapwile muukalu. Makumbi ano tweji kukavangizanga vyuma valingile vandumbwetu muAndeyoka. Nge tunevu ngwavo vandumbwetu kulifuchi limwe vali muukalu, tweji kuvakafwanga. * Hakusaka tutachikize omu mulimo wetu wakukafwa vakwetu watambukila hamwe namilimo yeka yamuliuka, tushimutwilenu vihula vino vitatu: Mwomwo ika twamwena kukafwa vakwetu kupwa chachilemu? Mwomwo ika tweji kuvakafwilanga? Kaha tweji kunganyalanga ngachilihi?

Mwomwo Ika Kukafwa Vakwetu Chapwila “Mulimo Wajila”?

4. Vyuma muka Paulu alwezele vaka-Kulishitu muKolinde hamulimo vatwama nawo?

4 Mumukanda wamuchivali uze Paulu asonekelele vaka-Kolinde, alumbunwine ngwenyi mulimo wavaka-Kulishitu watwama muvihanda vivali. Numba tuhu Paulu asonekele ou mukanda kuli vaka-Kulishitu vawavisa, oloze makumbi ano mazu kana azata nakuli “mikoko veka” vaKulishitu. (Yowa. 10:16) Shikaho chihanda chatete chamulimo wetu chapwa “mulimo wakwambulula kuwanyisa,” kulumbununa mulimo wetu wakwambulula nakunangula vatu. (Koli. 2, 5:18-20; Chimo. 1, 2:3-6)  Chihanda chikwavo chapwa mulimo uze tweji kuzatanga hakukafwa vakwetu vaka-Kulishitu. Paulu avulukile mulimo kana ngwenyi, “mulimo wakukafwa.” (Koli. 2, 8:4) Lizu “mulimo” lize lyatwama mumazu akwamba ngwavo, “mulimo wakwambulula kuwanyisa” ‘namulimo wakukafwa vatu,’ valyalumuna kufuma kulizu lyachiHelase di·a·ko·niʹa. Mwomwo ika chapwila chachilemu kutachikiza chuma kana?

5. Mwomwo ika chapwile chakutamo Paulu kuhanjika ngwenyi kukafwa vakwetu chapwa mulimo waulemu?

5 Paulu hakuzachisa lizu lyolimwe lyachiHelase kumilimo yivali, asolwele nge mulimo wakukafwa vakwetu watambukila hamwe namilimo yeka tweji kuzatanga muchikungulwilo. Hakavanga ahanjikile ngwenyi: “Kuli milimo yakulisezaseza, oloze Mwata youmwe kaha, kaha kuli vyuma vyakuzata vyakulisezaseza, . . . Oloze [veji kuvizatanga] kushipilitu yoyimwe kaha.” (Koli. 1, 12:4-6, 11) Paulu afwanyishile milimo yayivulu muchikungulwilo “[ku]mulimo wajila.” * (Loma 12:1, 6-8) Echi chikiko chamulingishile awaneko lwola ‘lwakuzachila vaka-kujila.’—Loma 15:25, 26.

6. (a) Kweseka namazu aPaulu, mwomwo ika mulimo wakukafwa vandumbwetu wapwila kulemesa Kalunga? (b) Lumbununenu omu mulimo wakukafwa vanakuuzata mukaye kosena. (Talenu lipwata “ [lya]Nge Kunasoloka Ukalu” halifwo 214.)

6 Paulu akafwile vaka-Kulishitu muKolinde vamone nge kukafwa vandumbwavo chapwa nachikiko hikulemesa Yehova. Talenu vyuma ahanjikile: Vaka-Kulishitu vaze veji kukafwanga vakwavo vali muukalu vapwa vakuliluula “kumujimbu wamwaza waKulishitu.” (Koli. 2, 9:13) Ngocho vaka-Kulishitu veji kukafwanga vakwavo mwomwo vafwila kukavangiza kunangula chaKulishitu. Paulu ambile ngwenyi, milimo yalikoji veji kuzachilanga vandumbwavo yapwa “kumbwambumuka chalikoji lyalinene lyaKalunga.” (Koli. 2, 9:14; Petu. 1, 4:10) Kaposhi Kakutalila waDecember 1, 1975 ahanjikile hamulimo wakukafwa vandumbwetu vali muukalu ngwenyi: “Twatela kwijiva chikupu ngwetu Yehova Kalunga naMwanenyi Yesu Kulishitu vamona mulimo kanou kupwa waulemu chikuma.” Enga mulimo wakukafwa vandumbwetu vali muukalu wapwa wajila.—Loma 12:1, 7; Koli. 2, 8:7; Hepe. 13:16.

Vyuma Vyatulingisa Twazane muMulimo waKukafwa Vakwetu

7, 8. Chuma muka chatete cheji kutulingisanga tukafwe vakwetu? Lumbununenu.

7 Mwomwo ika tweji kukafwilanga vaze vali muukalu? Paulu akumbulwile chihula kana mumukanda wenyi asonekelele vaka-Kolinde. (Tangenu Wavaka-Kolinde 2, 9:11-15.) Mujivesi kana Paulu ashindakanyine havyuma vitatu vyeji kutulingisanga twazane “[mu]mulimo kanou wakuzachila vatu,” kulumbununa kukafwa vakwetu. Tushimutwilenu havyuma kanevi vitatu.

8 Chatete, mulimo wetu wakukafwa vatu weji kutohwesanga Yehova. Mujivesi jitanu tunavuluka helu, Paulu alwezele vandumbwenyi vatohwese Yehova Kalunga mumulimo wavo. Ou kaposetolo avanukishile “chuma chize nachilingisa Kalunga vamusakwililenga” nachuma chakuvulisa “mazu akumusakwilila Kalunga.” (Vesi 11, 12) Avulukile omu mulimo wakukafwa weji kulingisanga vaka-Kulishitu “kumutohwesanga Kalunga”  nakumwalisa “mwomwo yakumbwambumuka chalikoji lyalinene lyaKalunga.” (Vesi 13, 14) Paulu akukulwile mazu enyi ahanjikile hamulimo wakukafwa ngwenyi: “Vamusakwililenga Kalunga.”—Vesi 15; Petu. 1, 4:11.

9. Mulimo wakukafwa vatu unahase kwalumuna ngachilihi muchima wamutu? Hanenu chakutalilaho.

9 Ngana mwaPaulu, vangamba jaKalunga makumbi ano vamona mulimo wakukafwa vakwavo kupwa mulimo wakwalisa Yehova nakuwahisa kunangula chenyi. (Koli. 1, 10:31; Chitu. 2:10) Mulimo kana nawa weji kufumisa makuli aze veji kuvangijikilanga Yehova naVinjiho jenyi. Chakutalilaho: Pwevo umwe mungalila muze mwahichile nyamanganda apwile nachinjikizo hachikolo chenyi ngwenyi: “Kangweshi Nakusaka Vinjiho jaYehova Hanoko.” Kaha likumbi limwe amwene vatu vanakuwahisa zuvo yize yashiukile hakamwihi nayikiye. Avamwene hamakumbi amavulu vanakuzata oku vanawahilila, kaha ayileko nakuvameneka. Ngocho vamulwezele ngwavo vapwa Vinjiho jaYehova, kaha alikomokelele chikuma nakwamba ngwenyi, “Kumana mwatwama namuchima wamwaza.” Vyuma muka vyafuminemo? Hahaze vene ayile nakufumisa chize chinjikizo hachikolo chenyi.

10, 11. (a) Vyakutalilaho muka vyasolola nge tweji kuzakama vandumbwetu nge vali muukalu? (b) Chinoma muka chakafwile vaka-kuzata mulimo wakukafwa vali muukalu? (Talenu lipwata “ [lya]Chinoma chaKukafwa Vaka-kuzata Mulimo waKukafwa Vali muUkalu.”)

10 Chamuchivali, tweji kuhananga vandumbwetu “vyuma vanakalikiza.” (Koli. 2, 9:12a) Twafwila kukafwa washiwashi vandumbwetu vanakalikiza. Mwomwo ika? Mwomwo tuvosena muchikungulwilo twapwa “mujimba umwe,” kaha “kachi nge chilyo chimwe nachiyanda, kaha vilyo vyosena naviyanjila hamwe nachikiko.” (Koli. 1, 12:20, 26) Shikaho vandumbwetu veji kulisuula kwecha milimo yavo hahaze vene nge vanavalweze kuya nakukafwa vandumbwavo vaze vali muukalu mwomwo vavazanga nakuvatetela. (Yako. 2:15, 16) Chakutalilaho, omu vula yachijimbilanganga yanokele muJapan mu 2011, ofesi yamutango yamuUnited States yatumine mukanda kuKomiti Yakutungisa YamuNgalila yamuUnited States nakuvahulisa numba nge “vandumbwetu vamwe vaze vatachikiza mulimo wakutunga” vanahase kuya nakutunga jiZuvo jaWangana jize japuzukile. Vyuma muka vyasolokele? Muvyalumingo vyavindende kaha vandumbwetu kafwe 600 valisuwile kuya nakukafwa, kaha valifwetelele vavene jimbongo jakunyina ndeke nakuya kuJapan. Ofesi yamutango yamuUnited States yambile ngwayo, “Tunevu kuwaha hamuchima wavandumbwetu wakulisuula.” Ndumbwetu wamuJapan ahulishile ndumbwetu umwe hali vaze vejile nakukafwa ngwenyi, “Chuma muka chinamilingisa mwizenga nakutukafwa kuno?” Ikiye akumbulwile ngwenyi: “Vandumbwetu vamuno muJapan vapwa ‘mujimba umwe nayetu.’ Kaha nayetu tunakwivwa kukola haukalu vali nawo.” Zangi yinakulingisa vandumbwetu valisuule kuya nakukafwa vakwavo, kaha shimbu jimwe veji kuhakanga nachiyoyelo chavo muponde hakufwila kuvakafwa. *Yowa. 1, 3:16.

11 Navatu vaze kavapwa Vinjihoko veji kunganyalanga kumulimo wetu wakukafwa vatu. Chakutalilaho, omu kwapwile  ukalu wakulijila muArkansas, U.S.A., mu 2013, lipapilo lyamijimbu lyahanjikile hamuchima waVinjiho wakulisuula washi nakukafwa vatu ngwavo: “Liuka lyaVinjiho jaYehova lyanoneka kanawa vyuma, kaha vatu javo veji kulisuulanga nakuzata mukulonga.” Chapundu vene, ngana muze ahanjikile kaposetolo Paulu, tweji ‘kuhana’ vandumbwetu vali muukalu vyuma vali nakusaka.

12-14. (a) Mwomwo ika chapwila chachilemu kukafwa vandumbwetu vali muukalu? (b) Vyakutalilaho muka vyasolola kulema chakutwalaho lika kuzata vyuma vyakushipilitu?

12 Chamuchitatu, tweji kukafwanga vaze vali muukalu mangana vaputuke cheka kuzata milimo yavo yakushipilitu. Mwomwo ika chapwila chachilemu? Paulu ahanjikile ngwenyi vaze navakafwa veji kuhanjikanga “mazu akumusakwilila Kalunga.” (Koli. 2, 9:12b) Tweji kwivwanga kuwaha kumona vaze vali muukalu navasakwilila Yehova nakutwalaho kuzata milimo yavo yakushipilitu. (Fwili. 1:10) Mu 1945, Kaposhi Kakutalila ahanjikile ngwenyi: “Paulu amwene ngwenyi . . . chapwile chakutamo kukungulula wana wakukafwa . . . vandumbwetu vaze vapwile muukalu, mangana vahase kuzata natwima mulimo waYehova.” Namakumbi ano twamona kukafwa vandumbwetu kupwa chachilemu. Nge vandumbwetu navaputuka cheka kuzata natwima mulimo wavo wakwambulula, kaha navavendejeka vakwavo nakuzamisa lufwelelo lwavo.—Tangenu Wavaka-Kolinde 2, 1:3, 4.

13 Talenu mazu vahanjikile vandumbwetu vamwe vaze vakafwile omu vapwile muukalu, nakuputuka cheka kwambulula. Ndumbwetu walunga ambile ngwenyi: “Chapwile hikutokwa tanga yetu kuya muwande. Chatulingishile tuvulyameko chindende ukalu wetu nakuvendejeka vakwetu.” Ndumbwetu wapwevo ambile ngwenyi: “Kushinganyeka havyuma vyakushipilitu changulingishile nguvulyameko ukalu wami. Ngwevwile kumuchima hwo.” Ndumbwetu weka wapwevo ambile ngwenyi: “Numba tuhu twapwile muukalu chikuma, oloze kwazana mumulimo wamuwande chajikijishile tanga yetu. Kushimutwila navatu vyalutalililo lwakukayoya mukaye kakahya chatulingishile tufwelele chikupu ngwetu vyuma vyosena vatushika navikatesamo.”

14 Chuma chikwavo cheji kukafwanga vandumbwetu vali muukalu shina kuyanga kukukunguluka. Achitalenu vyasolokele kuli ndumbwetu wapwevo Kiyoko wamyaka 50. Vula yachijimbilanganga yenyekele vyuma vyenyi vyosena, kusala kaha navize avwalile hamujimba, ngocho alizakaminyine hachiyoyelo chenyi. Jino mukulwane umwe muchikungulwilo amulwezele ngwenyi navakungulukilanga mumunyau wenyi. Ndumbwetu Kiyoko ambile ngwenyi: “Uze mukulwane napuwenyi nandumbwetu weka wapwevo nayami twatwamine mumunyau. Twalivwishile kuwaha kukunguluka ngocho twavulyamine nauze ukalu twapwile nawo. Ngwevwile nakumuchima hwo. Kukunguluka kana changukafwile ngumone kulema chakulikungulwila hamwe navandumbwetu.” Ndumbwetu weka wapwevo ahanjikile hakukunguluka vapwile nacho halwola vapwile  muukalu ngwenyi: “Kukunguluka kana changukafwile ngumike muukalu ngwapwilemo.”—Loma 1:11, 12; 12:12.

Mulimo waKukafwa Vakwetu Weji Kunehanga Nganyo Yayinene

15, 16. (a) Vaka-Kulishitu vamuKolinde navakumafuchi eka vanganyalile ngachilihi hakukafwa vakwavo? (b) Makumbi ano tweji kunganyalanga ngachilihi hakukafwa vakwetu?

15 Paulu alumbunwinyine nawa vandumbwenyi vamuKolinde nganyo vanahase kuwana hakukafwa vandumbwavo vali muukalu. Ambile ngwenyi: “Vakiko hakumilembelelako, [vaka-Kulishitu vavaYuleya muYelusalema vaze vatambwile wana] vasolola nge vamizanga chikuma mwomwo yakumbwambumuka chalikoji lyalinene lyaKalunga vamisolwela enu.” (Koli. 2, 9:14) Enga, muchima wavaka-Kolinde wakuhana walingishile vaka-Kulishitu muYuleya valombeleko vandumbwavo muKolinde, kuhakilako vene navaze vakumafuchi eka, kahechi chavalingishile vavazange chikuma.

16 Kaposhi Kakutalila waDecember 1, 1945 ahanjikile hamazu aPaulu aze asolola kuwaha chamulimo wakukafwa vakwetu ngwenyi: “Nge vatu jaKalunga kulifuchi limwe navakafwa vandumbwavo vali kulifuchi likwavo, kaha veji kupwanga vakulinunga.” Omu mukiko veji kwivwanga vandumbwetu vaze veji kwazananga mumulimo wakukafwa vakwavo makumbi ano. Mukulwane umwe uze azanyine mumulimo wakukafwa ambile ngwenyi: “Kwazana mumulimo wakukafwa vaze vali muukalu changupandamishile chikuma kuli vandumbwami kuhambakana muze ngwevwilenga kunyima.” Ndumbwetu umwe wapwevo uze vakafwile ahanjikile ngwenyi, “Kulizanga chetu navandumbwetu chasolola omu nachikapwa muPalachise hamavu.”—Tangenu Vishimo 17:17.

17. (a) Mazu ahali Isaya 41:13 azata ngachilihi kumulimo wakukafwa vatu? (b) Hanenu vyakutalilaho vize vyasolola omu mulimo wakukafwa vatu wavumbika Yehova nakuzamisa usoko wetu navandumbwetu. (Talenu nawa lipwata “ [lya]Vaka-Kuzata Mulimo Wakulisakila Mukaye Kosena Vejile Nakukafwa.”)

 17 Omu vaka-kukafwa veji kuhetanga kuchihela kuli ukalu, vandumbwetu vali muukalu veji kumonanga muchano wamazu atushika Kalunga ngwenyi: “Ami Yehova Kalunga kove nangukukwachililanga nalivoko lyami lyachilyo, yami nguli nakukulweza ngwami, ‘Kanda nawivwa womako, nangukukafwa.’” (Isa. 41:13) Ndumbwetu wapwevo uze ayovokele kuponde ambile ngwenyi: “Ngwahombele hakumona omu vyalyekele vyuma, oloze Yehova apwile nayami. Vandumbwami vangukafwile chikuma.” Omu mundenda wenyekele vyuma mungalila yavo, vakulwane vavali vasonekele mukanda kwimanyinako vikungulwilo vyavo ngwavo: “Numba tuhu twevwile kupihya havyuma vyalyenyekele namundenda, oloze Yehova atuvendejekele kuhichila muli vandumbwetu. Twatangilenga mijimbu yakukafwa vandumbwetu vali muukalu, oloze halwola kana twalimwenenene nameso etu kapu.”

Kutala Namwazana muMulimo Kana Tahi?

18. Vyuma muka mwatela kulinga nge muli nakusaka kwazana mumulimo wakukafwa vatu? (Talenu nawa lipwata “ [lya]Chalumwine Chiyoyelo Chenyi.”)

18 Kutala munakusaka kulivwisa kuwaha kwazana mumulimo wakukafwa vatu tahi? Nge mukiko kaha tachikizenu ngwenu vaze veji kwazananga mumulimo kana veji kuvatongolanga hali vaze vatwama mumulimo wakutunga jiZuvo jaWangana. Shikaho lwezenu vakulwane muchikungulwilo chenu vamihane fwomu yakwihwilaho. Mukulwane uze nazate chikuma mulimo kanou wakukafwa vatu ambile ngwenyi: “Kanda kuya kuchihela kuli ukalu shimbu kanda vamitavise kuKomiti yaKukafwa Vatu Vali muUkalu Wakulijilako.” Nge namulinga ngocho kaha mulimo wetu nautambuka mukulonga.

19. Vaka-kuzata mulimo wakukafwa vanakusolola ngachilihi ngwavo twapwa tutumbaji vaKulishitu vamuchano?

19 Kwazana mumulimo wakukafwa vaze vali muukalu chasolola nge tuli nakwononoka mazu aKulishitu akwamba ngwenyi, “lizangenunga navakwenu.” Nge natupwa nazangi kana, kaha natusolola nge twapwa tutumbaji vaKulishitu vamuchano. (Yowa. 13:34, 35) Ocho kuwaha kana tunakwivwa makumbi ano hakupwa navandumbwetu vavavulu vakulisuula vaze vanakwalisa Yehova hakukafwa vandumbwavo vaze vakundwiza Wangana waKalunga!

^ par. 3 Kapetulu uno nashimutwila kaha hamulimo wakukafwa vandumbwetu. Chipwe ngocho tweji kukafwanga navatu veka vaze kavapwa vandumbwetuko.—Ngale. 6:10.

^ par. 5 Paulu azachishile lizu di·aʹko·nos lize lyahanjika havyuma vyavivulu, mangana alumbunune “vaka-kuzachila.”—Chimo. 1, 3:12.

^ par. 10 Talenu chihande chakwamba ngwavo, “Aiding Our Family of Believers in Bosnia,” muKaposhi Kakutalila kaNovember 1, 1994, mafwo 23-27.