OVYO CHAPWILA CHACHILEMU

Jila mukumbulwilamo nayilingisa vakuyanjisenga lika chipwe nduma.

NAULINGA NGACHILIHI?

Chakutalilaho: Thomas ali nakusaka kulitwamina kuyanga jino kushikola. Munahichi jino tukweji vatatu kufuma haze vakwavo vaputukile kumuvangijikila vyuma vyavipi, nakumusekeleka. Shimbu jimwe vakwavo veji kumushinjikanga nakuholola mikanda yenyi nakulyonga nge kavamumonangako, chipwe kumungongola kahomu mwatalako mwahona kumona uze namungongola. Zau vamutuminanga mujimbu haInternet wakumulweza ngwavo vanamufunyina chikuma . . .

Nge yove wapwanga Thomas, kachi unalingi ngachilihi?

SHINGANYEKA

Echi kachalumbununa nge kaweshi najingoloko, oloze unahase kuvafungulula chakuhona kuvaveta. Naulinga ngachilihi ngocho?

  •   KANDA KUPIHILILAKO. Mbimbiliya ngwayo: “Chiheu eji kutufulanga vyeshovyo vili kumuchima wenyi, oloze muka-mangana eji kuundanga nakukekesa vyuma mwahanjika.” (Vishimo 29:11) Nge nauunda muchima, kaha vaze vanakukuyanjisa navalitwamina kukuyanjisanga.

  • KANDA KUVAHILWISHILAMOKO. Mbimbiliya ngwayo: “Kanda namuhilwisa upi kumutu namilingi mwamupiko.” (Wavaka-Loma 12:17) Nge muvahilwishilangamo, kaha navakuyanjisanga chikuma.

  • LIHENDE KUPWANGA NAVO. Mbimbiliya ngwayo: “Muka-kuzangama eji kumonanga ponde, kaha himwaswama.” (Vishimo 22:3) Lihende kupwanga navatu vaze vanahase kukuyanjisa, chipwe kuyanga kuze veji kupwanga.

  • KUMBULULA MUJILA YAMWAZA. Mbimbiliya ngwayo: “Kukumbulula mujila yayivwovu cheji kupeulanga kulundundu.” (Vishimo 15:1) Kanda kuhombanga lwola lwosenako. Chakutalilaho, nge mukwenu mwakusekeleka ngwenyi unatoho chikuma, kaha watela kumwitavila ngwove, “Mukiko vene, nayami ngunatachikiza.”

  • FUMAKO. Nora wamyaka 19 ambile ngwenyi: “Nge muhola kulu nakuliyila kwove, nachisolola nge uli namangana kaha nawa uwakuhamuka kuhambakana uze anakukuyanjisa.”—WaChimoteu 2, 2:24.

  • PWAKO WAKUMIKA. Vaze veji kuyanjisanga vakwavo veji kutachikiza mutu uze nahase kwivwa kupihya nge navamuyanjisa. Kakavulu veji kulitwaminanga kuyanjisa mutu nge vanamono ngwavo keshi nakuvahaka manganako.

  • LWEZAKO MUTU WEKA. Mulongeshi umwe ambile ngwenyi: “Nge vali nakukusekelekanga nakukuyanjisa kuli vakwenu watela kwambululanga, mwomwo echi nachivalingisa valitwamine kukuyanjisa yove navakwenu.”

Kumika nachikulingisa usolole nge ukwechi ngolo kuhambakana uze ali nakukuyanjisa