KaIsalele umwe walijina lyaElekana apwile namapwevo vavali, umwe apwile Hana mukwavo Penyina, oloze azangile chikuma Hana. Penyina apwile navana vavavulu, ngocho atolekelenga muhalika wenyi Hana mwomwo kapwile navanako. Mwaka himwaka Elekana ayilenga natanga yenyi kuShilo kuze kwapwililile tavanaku mangana vakalemese Kalunga. Likumbi limwe omu vapwile hatavanaku, Elekana amwene puwenyi Hana nahombo. Kaha ambile ngwenyi: ‘Hana, kanda kulilako. Uli nayami, kaha ngwakuzanga chikuma.’

Kutwala muze, Hana ayile ukawenyi nakulomba. Apwile nakulila lika omu apwile nakulembelela Yehova amukafwe. Ngocho ashikile Yehova ngwenyi: ‘Nge munguhana mwana walunga, kaha nangukakuhanayo mangana akakuzachilenga mukuyoya chenyi chosena.’

Kufumaho, Kapilishitu Wakulitulaho Eli amwene Hana ali nakulila, ngocho ashinganyekele ngwenyi pamo napende. Kaha amwambile ngwenyi: ‘Ove Hana, unapende?’ Oloze Hana ambile ngwenyi: ‘Nduma, kangwapendeleko ove mwata wami. Nguli kaha naukalu waunene uze ngunakulweza Yehova.’ Ngocho Eli ashinganyekele ngwenyi nalimbenje. Kaha amulwezele ngwenyi: ‘Kalunga akuhane vyuma uli nakusaka.’ Hana evwile nakumuchima hwo, kaha alovokele nakuya. Kutwala muze, asemene mwana walunga  kaha amulukile ngwenyi Samwele. Achishinganyeke hakuwaha evwile Hana!

Hana kavulyamine lushiko luze ashikile Yehovako. Omu Samwele asumukile, Hana amutwalile kutavanaku mangana akazachilengako. Ngocho alwezele Eli ngwenyi: ‘Ou ikiye mwana walunga ngwalombele. Ngunamuhane kuli Yehova mangana amuzachilenga hamakumbi enyi osena.’ Mwaka himwaka Elekana naHana vayilenga nakushikama namwanavo nakumutwalila uvwalo wauhya. Ngocho Yehova akiswile Hana nakumuhana vana vamalunga vatatu navamapwevo vavali.

“Lombenunga lika, kaha navakamihana. Tondenunga lika, kaha namukawana.”—Mateu 7:7