Omu Isaka apwile namyaka yakusemuka 40, ambachile pwevo walijina lyaLaveka. Isaka azangile chikuma puwenyi. Mukuhita chalwola vasemene vapasa vamalunga.

Mwana watete vamulukile ngwavo Esau, kaha songo yenyi ngwavo Yakova. Esau azangilenga kuya mumusenge, kaha atachikijile kanawa kujiha tunyama. Oloze Yakova azangilenga kutwama hembo.

Mumakumbi aze, nge chisemi walunga nafu kaha mwana walunga watwatwa mutanga vamuhanyinenga musuka wamavu waunene najimbongo, kupwa uswana wenyi. Ngocho, uswana uze vahanyinenga mutanga yaIsaka mwaliwezele najishiko jize Yehova ashikile Apalahama. Esau kahakile muchima kujishiko kanako, oloze Yakova ajimwene kupwa jajilemu.

Likumbi limwe, omu Esau afumine mumusenge azeyele chikuma. Kaha amwene Yakova ali nakuteleka vyakulya, ambile kuli ikiye ngwenyi: ‘Nguhaneko ovyo vyakulya vichila! Mwomwo ngunevu chikuma zala.’ Yakova ambile kuli ikiye ngwenyi: ‘Nangukuhana, oloze chatete vangila kungulanjisa utwatwa wove.’ Esau ambile ngwenyi: ‘Utwatwa kaweshi namulimo kuli amiko, unahase tuhu kuutambula, ami ngwakusaka kaha kulya.’ Uno unashinganyeka ngwove chuma alingile Esau chapwile chakwoloka tahi? Nduma, kachapwile chakwolokako. Esau ahanyine vyuma vyavilemu chikuma, hakusaka kaha lilonga lyamakunde.

 Omu Isaka apwile kashinakaji, asakile jino kukisula mwanenyi watwatwa. Oloze Laveka akafwile mwanenyi wakanyike Yakova mangana vamukisule. Omu Esau atachikijile chuma kana, apihililile chikuma nakutondatonda jila yakusaka kujihilamo songo yenyi. Ngocho Isaka naLaveka vasakile kukinga Yakova, kaha vamulwezele ngwavo: ‘Katuka ukatwame nanatwove Lavane kuHalane palanga nomu nawatula matoto nakukwachila Esau.’ Yakova evwililile kuvyuma vamulwezele visemi jenyi, kaha ayile mangana ayovole mwono wenyi.

“Nganyo mukaze mwawanyinaho mutu kachi nge mwaheta kaye kosena, oloze mwatokesa mwono wenyi?”—Mako 8:36, 37