Nganda yaUle yapwile kwakamwihi nanganda yaMbavele. Kaha vatu munganda yaUle valemeselenga tulunga vavavulu mukutela kulemesa Yehova. Oloze munganda kana mwapwile lunga umwe uze alemeselenga kaha Yehova. Lijina lyenyi ikiye Apalahama.

Yehova alwezele Apalahama ngwenyi: ‘Seza lifuchi lyove, navausoko wove, nakuya kulifuchi lize nangukulweza kuya.’ Kufumaho Yehova amushikile ngwenyi: ‘Nangukakulingisa kupwa umuyachi waunene, nangukalingila vatu vavavulu vyuma vyamwaza hano hamavu kuhichila muli ove.’

Numba tuhu Apalahama katachikijile lifuchi lize mwayako, oloze afwelelele lika Yehova. Ngocho, Apalahama napuwenyi Sala, namuhya wenyi Lote, naise Tela valongejekele vyuma vyavo vyosena nakuputuka kuya ungeji wausuku.

 Apalahama apwile namyaka yakusemuka 75 omu ikiye natanga yenyi vahetele mulifuchi lize Yehova avalwezele kuya. Lifuchi kana valivulukile ngwavo Kanane. Jino Kalunga ahanjikile kuli Apalahama ngwenyi: ‘Lifuchi lino unamono nangukalihana kuli vana vove.’ Apalahama naSala vapwile tushinakaji, oloze kavapwile navanako. Uno Yehova mwatesamo ngachilihi lushiko kana?

“Mwomwo yalufwelelo . . . Apalahama . . . ononokele nakuya kuchihela chize mwakatambula kupwa uswana wenyi. Akatukile nakuya numba tuhu katachikijile okwo apwile nakuyako.”—WavaHepeleu 11:8