Omu mwahichile makumbi 10 kufuma haze Yesu akindulukile mwilu, tumbaji twenyi vatambwile shipilitu yajila. Vatu vavavulu vayile kuYelusalema haPendekoseta 33 C.E., kuchiwanyino. Kaha tumbaji twaYesu vakuheta 120, valikungulwilile mukapete kahelu. Hahaze vene, vakasumukile kunasoloka tumilangi twakakahya hamutwe wakambaji hikambaji, ngocho vaputukile kuhanjika mumalimi akulisezaseza. Kaha muzuvo mwevwakanyine lushindo lwakufwana nge kuhuhwa chapeho yangolo yize yazalishile muzuvo.

Vatu vafumine kumafuchi eka vaze vejile kuYelusalema, vevwile vyema kaha valahililile muzuvo mangana vamone vyuma vyapwile nakusoloka. Ngocho, valikomokelele chikuma hakwivwa tumbaji vali nakuhanjika mumalimi akulisezaseza. Jino vambile ngwavo: ‘Ava vatu vanafumu kuNgalileya. Oloze mwomwo ika vali nakuhanjikila mumalimi etu?’

Kufumaho, Petulu navaposetolo vakwavo vemanyine kumeso avaze vatu vavavulu. Petulu alwezele vatu omu Yesu vamujihile, nomu  Yehova amusangwile kuvafu. Ngocho Petulu ambile ngwenyi: ‘Oholyapwa jino ali kulivoko lyachilyo lyaKalunga, kaha nahingununa shipilitu yajila yize ashikile. Shikaho munamwena nakwivwa evi vyakukomwesa.’

Mazu ahanjikile Petulu akwachile vatu kumichima kaha vamuhulishile ngwavo: “Natulinga muka?” Petulu avakumbulwile ngwenyi: ‘Pihililenu nakwalumuka kujishili jenu mangana vamimbapachise mulijina lyaYesu. Kaha nayenu namutambula wana washipilitu yajila.’ Kaha halikumbi vene lize, vambapachishile vatu kafwe 3,000. Kufuma vene haze, tumbaji vavulile chikuma muYelusalema. Vaposetolo vatungile vikungulwilo vyavivulu hakuvakafwa nashipilitu yajila mangana vanangule tumbaji vyuma vyosena vize avalwezele Yesu.

“Kachi nge namuhanjika hatoma kumeso avatu natunwa twenu ngwenu Yesu ikiye Mwata, nakufwelela mumichima yenu ngwenu, Kalunga amusangwile kuvafu, kaha navamilwila.”—Wavaka-Loma 10:9