MuFwilipi mwapwile ngamba wapwevo wakanyike, uze apwile nandemone. Uze ndemone azachishilenga ou kanyike wapwevo kuhanjika vyuma vyakulutwe, kaha awanyinenga jimbongo jajivulu nakujitwala kuli vakaka jenyi. Omu Paulu naShilase vayile kuFwilipi uze kanyike wapwevo avakavangijile lika hamakumbi amavulu. Ngocho, uze ndemone amulingishile atambakanenga ngwenyi: “Ava malunga hivandungo jaKalunga Wakulitulaho Chikuma.” Kufumaho, Paulu alwezele uze ndemone ngwenyi: ‘Mulijina lyaYesu, lovoka muli ikiye!’ Ngocho uze ndemone alovokele muli uze kanyike wapwevo.

Omu vakaka jauze kanyike wapwevo vatachikijile jino ngwavo kaveshi kuwananga jimbongo kuli ikiyeko vapihilile chikuma. Kaha vakwachile Paulu naShilase nakuvatwala kuli vaka-kuyula, nakwamba ngwavo: ‘Ava malunga kaveshi nakukavangiza lushimbiko, kaha vali nakuneha liwayanga munganda yetu!’ Jino vaka-kuyula vahanyine lushimbi lwakuveta Paulu naShilase nakuvakasa mukamenga. Ngocho, muka-kulama kukamenga avatwalile mukapete kamukachi muze mwapwile milima chikuma nakuvahaka mujikuli.

Omu Paulu naShilase vapwile nakwimba myaso yakwalisa Yehova, vafunge vakwavo vapwile nakwivwilila. Jino mukachi kaufuku kwejile mundenda uze wanyikishile chihela chakamenga. Kaha vikolo vyosena vyakukamenga vyasokolokele, kaha malenge akasunukile, jikuli nawa jazokokele. Uze muka-kulama kukamenga alahile washi mukamenga kaha awanyine vikolo vyosena vyahululu. Ngocho ashinganyekele ngwenyi vafunge vosena vanachinyi, kaha ambachile poko yenyi yamukwale mangana alijihe.

Hahaze vene, Paulu atambakanyine ngwenyi: ‘Kanda ulilemekako, tuvosena mutuli muno!’ Jino uze muka-kulama kukamenga alahile nakuya nakulimbila kumahinji aPaulu naShilase. Kufumaho, avahulishile ngwenyi: “Vyuma muka ngwatela kulinga mangana vangulwile?” Jino vakiko vamulwezele ngwavo: ‘Ove navakuzuvo yove mwatela kufwelela Yesu.’ Shikaho, Paulu naShilase vaputukile kuvanangula mazu aYehova, kaha ikiye navakuzuvo yenyi vosena vavambapachishile.

“Vatu navakamikwatanga nakumiyanjisa, kaha navakamitwalanga kujisunangonga namutumenga. Navakamitwalanga nawa kumeso avamyangana navanguvulu mwomwo yalijina lyami. Echi nachikamilingisa mukahane vatu unjiho.”—Luka 21:12, 13