Omu Paseka yakumine, Yesu natumbaji twenyi vahichile muSamaliya, omu vapwile nakukinduluka kuNgalileya. Kahomu vahetele kwakamwihi nanganda yaSukale, vanokele halishima lize vavulukilenga ngwavo lishima lyaYakova. Yesu atwamine nakunokako, kaha tumbaji twenyi vengilile munganda nakulanda vyakulya.

Jino pwevo umwe ejile halishima nakuswita meya. Kaha Yesu ambile kuli ikiye ngwenyi: “Nguhaneko meya akunwa.” Ngocho uze pwevo amuhulishile ngwenyi: ‘Mwomwo ika unakuhanjikila nayami? Ami ngupwevo wakaSamaliya, kaha vaYuleya kavalihanjikisa navaSamaliyako.’ Yesu amukumbulwile ngwenyi: ‘Kachi nge wangutachikizanga kanawa, kachi unangulombo ngukukuhane meya akuyoya.’ Kaha uze pwevo amuhulishile ngwenyi: ‘Unatalisa mulihi? Nambekete yakuswichisa kaweshi nayoko.’ Yesu ambile kuli ikiye ngwenyi: ‘Weshowo mwanwa meya nangumuhana, keshi kukevwa lipwila chekako.’ Uze pwevo ambile kuli ikiye ngwenyi: “Ove mwata, nguhane owo meya kana.”

Kaha Yesu amulwezele ngwenyi: ‘Yako ukasanyike lunga lyove nakwiza nenyi kuno kulishima.’ Uze pwevo ambile ngwenyi: ‘Kangwatwama nalungako.’ Yesu ambile kuli ikiye ngwenyi: ‘Unahanjika muchano. Mwomwo wasombokele kumalunga vatanu, kaha oholyapwa uli nakutwama nalunga uze kakumbatako.’ Kaha uze pwevo ambile ngwenyi: ‘Ngunatachikiza jino ngwami, ove wapwa ukapolofweto. Vatu jami veji kwambanga ngwavo twatela kulemesela Kalunga hapili yino, oloze vaYuleya ngwavo twatela kulemesela Kalunga muYelusalema. Oloze ngwafwelela ngwami, omu Meshiya mwakeza mwakatunangula omu twatela kulemesela Kalunga.’ Ngocho, Yesu amulwezele mazu aze  kalwezele mutu numba umweko ngwenyi: ‘Ami yami Meshiya.’

Kutwala muze, uze pwevo alahile washi nakuya kunganda nakulweza vaSamaliya ngwenyi: ‘Ngunafwelela ngwami ngunawane Meshiya. Natachikiza vyuma vyosena hali ami. Twayenu mumone!’ Ngocho, vamukavile kulishima mangana vakevwilile vyuma mwavanangula Yesu.

Kufumaho, vaSamaliya valwezele Yesu mangana atwame munganda yavo. Kaha avanangwile hamakumbi avali, ngocho vamufwelelele chikuma. Jino vatu valwezele uze pwevo ngwavo: ‘Etu tunatachikiza jino ngwetu, ou mutu ikiye mulwilo wakaye.’

“‘Twaya!’ Kaha weshowo ali nalipwila ezenga, weshowo mwasaka, atambule meya akuyoya awana.”—Kusoloka 22:17