Omu mwahichile myaka yayivulu Mbeleshaza apwile jino mwangana waMbavilone. Kaha ufuku umwe, asanyikile vatu vavalemu vavavulu mangana vapwenga nachiwanyino chakulya nakunwa. Ngocho, alwezele vangamba jenyi vanehe jipasa jaulu jize Nevukataneza akambachile mutembele yaYehova. Mbeleshaza navangeji jenyi vanwinyinyine muze mujipasa nakuputuka kwalisa tulunga twavo. Hahaze vene, kwasolokele livoko lyamutu, kaha lyaputukile kusoneka hambango yazuvo.

Mbeleshaza evwile woma. Ngocho asanyikile vaka-kulinga visava nakuvafwelelesa ngwenyi: ‘Weshowo mwangulweza ulumbunwiso wamazu awa, mwapwa muka-kuyula wamuchitatu muwangana waMbavilone.’ Numba tuhu vesekele kutonda vawane mwalumbunukila mazu kana, oloze vosena vahonene. Kaha naye yamwangana ejile nakumulweza ngwenyi: ‘Kuli lunga umwe uze alumbunwinyinenga iso Nevukataneza vyuma, lijina lyenyi ikiye Ndanyele. Nahase kukulumbunwina awa mazu kana.’

Omu Ndanyele ayile kuli mwangana Mbeleshaza, mwangana amulwezele ngwenyi: ‘Nge nautanga awa mazu vanasoneka nakungulweza ulumbunwiso wamazu kana, kaha nangukuhana lilenge lyaulu lyakuvwala mushingo yove. Naupwa nawa umuka-kuyula wamuchitatu muwangana waMbavilone.’ Kaha Ndanyele ambile ngwenyi: ‘Kangweshi nakutonda unguhane mawana oveko. Oloze nangukulweza kaha ulumbunwiso wamazu kana. Iso Nevukataneza apwile wakulivwimba, ngocho Kalunga amwinyishile. Shikaho unatachikiza vyuma vyosena vyasolokele kuli iso, oloze unalikange kuli Yehova hakunwina vinyo mujipasa jaulu jize japwile mutembele yenyi. Evi vikiko Kalunga nasonekela awa mazu: Mene, Mene, Tekele, naPalashine. Awa mazu alumbununa nge vaMete navaPeleja vakiko navafungulula Mbavilone, kaha yove kaweshi kupwa cheka umwanganako.’

 Chasolokele nge namutu nahase kufungulula Mbavilone wauchi. Eyi nganda kana yapwile najikembwe jakukola kaha vayijingilikile kukalwiji wakukunama. Oloze ufuku vene uze vayilukukile kuli vaMete navaPeleja. Mwangana waPeleja Kuluse akondolwele meya akalwiji, kaha atepulukile ngocho maswalale vahashile kuheta kuvikolo vyanganda. Omu vahetele vawanyine vikolo vyahululu, kaha vengilile nakufungulula nganda nakujiha mwangana. Kaha Kuluse apwile jino muka-kuyula Mbavilone.

Mumwaka vene uze Kuluse avilikile ngwenyi: ‘Yehova nangulweze ngwenyi ngutungulule tembele yenyi muYelusalema. Kala mutu mwasaka kulisuula kwazana mumulimo kanou nahase kulinga vene ngocho.’ Shikaho ngana muze Yehova ashikile, vaYuleya vavavulu vakindulukile kwimbo lyavo omu mwahichile myaka 70 kufuma haze Yelusalema vayinongesele. Ngocho, Kuluse akindulwishile jipasa jaulu napalata navyuma vyeka vize ambachile Nevukataneza mutembele. Unamono omu Yehova azachishile Kuluse akafwe vatu jenyi tahi?

“Mbavilone Yayinene yinashiuka, yinashiuka, yinapu jino chihela chakutwama vandemone.”—Kusoloka 18:2