Kutala nayove wamonaho lyehi ukalu tunavuluka mumbuloshuwa yino tahi? Nge mukiko, kaha tachikiza ngwove kaweshi ukawoveko. Vangamba jaKalunga vavavulu vakushikulu navamakumbi ano vanamononga ukalu kanou. Yehova avakafwile vahonese ukalu kana, ngachize nayove mwakukafwa.

Yehova mwapwa nayove omu mukinduluka kuli ikiye

 TACHIKIZA ngwove Yehova mwapwa nayove omu mukinduluka kuli ikiye. Mwakukafwa uhonese kulizakamina, ukonekele vaze vanakupihisa kumuchima, nakwivwa kumuchima hwo mwomwo yakupwa nachivezu chitoma. Unahase kuputuka cheka kuzachila Yehova hamwe kaha navakwenu vaka-kwitava. Ukalu wove unalifwane nauze vamwene vaka-Kulishitu vamulikulukaji lyamyaka lyakulivanga vaze kaposetolo Petulu asonekelele ngwenyi: “Enu mwapwilenga nge mumikoko vaze vanajimbala, oloze jino munakinduluka lyehi kuli kafunga uze apwa kalama wamyono yenu.”—WaPetulu 1, 2:25.

Kukinduluka kuli Yehova chapwa hichuma chamwaza chikuma chize watela kulinga. Mwomwo ika? Mwomwo mwivwisa Yehova kuwaha kumuchima. (Vishimo 27:11) Hakuwana nge Yehova eji kwivwanga kukola kumuchima, ngachize vilinga vyetu vinahase kumwivwisa kupihya. Oloze Yehova katushinjila tumuzange chipwe tumuzachileko. (Lushimbi lwamuchivali 30:19, 20) Muka-kulinangula Mbimbiliya umwe ahanjikile ngwenyi: “Kakweshi mutu weka nahase kusokolola mumuchima woveko, kuvanga ove yavene kaha.” Nge natuzachila Yehova namuchima wazangi, kaha tunahase kusokolola mumuchima wetu. Nge natulinga ngocho, kaha natumuhana muchima wetu wakulonga nakumusuulwisa chikuma. Kakweshi chuma cheka nachilyeseka nakuwaha tweji kwivwanga hakulemesa Yehova namuchima wetu wosenako.—Vilinga 20:35; Kusoloka 4:11.

Omu muputuka cheka kuyanga nakukunguluka, muputuka cheka kuzachila Kalunga. (Mateu 5:3) Mujila muka? Vatu vavavulu mukaye veji kulihulisanga ngwavo, ‘Mwomwo ika twapwila hano hamavu?’ Kavatachikiza mwakukumbulwila chihula kanako. Yehova atengele vatu mangana vamuzachilenga. Atutengele mangana tulivwisenga kuwaha kumuzachila. Kakweshi vyuma vyeka vinahase kutusuulwisa kuhambakana kutachikiza ngwetu tuli nakulemesa Yehova mwomwo twamuzangako.—Samu 63:1-5.

Tachikiza ngwove Yehova ali nakusaka ukinduluke kuli ikiye. Unatachikiza ngachilihi ngocho? Achishinganyeke hachuma chino. Vandumbwetu valombele chikuma kuli Yehova hakusoneka mbuloshuwa yino. Vakunehelele mbuloshuwa kana pamo kuli mukulwane wamuchikungulwilo chipwe ndumbwetu weka. Kaha wayitangile nakukavangiza mujimbu ulimo. Echi chili nakusolola nge Yehova achili nakukwanuka. Kaha nawa ali nakukupandamisa kuli ikiye chindende chindende.—Yowano 6:44.

Kutachikiza ngwetu Yehova keshi kuvulyama vangamba jenyiko chinahase kutuvendejeka chikuma. Omu mukiko amwene ndumbwetu umwe wapwevo walijina lyaDonna. Ambile ngwenyi: “Ngwasosolokelenga kumuchano chindende chindende, oloze kakavulu ngwashinganyekelenga hali Samu 139:23, 24 aze ahanjika ngwawo: ‘Ove Kalunga, nguhehwojole mangana utachikize muchima wami. Ngukekese mangana utachikize vyuma ngunalizakamina. Mangana umone numba nge muli ami muli jila yayipi, mangana ungutwaminyine mujila yahaya myaka yosena.’ Ngwatachikijile vene ngwami kangwapwa nguwamuli vaka-kayeko, vilinga vyami kavyalitombwele navilinga vyavaka-kayeko, kaha nawa ngwatachikijile ngwami ngwatelele kupwa muliuka lyaYehova. Ngwaputukile kumona jino ngwami Yehova achili nakungwanuka, ngwatela kuhiluka kuli ikiye. Nguli nakwivwa kuwaha hakuwana nge ngwakindulukile kuli ikiye.”

“Ngwaputukile kumona jino ngwami Yehova achili nakungwanuka, ngwatela kuhiluka kuli ikiye”

Tuli nakulomba mangana nayove upwenga ‘nakuwahilila chakufuma kuli Yehova.’ (Nehemiya 8:10) Nge mukinduluka kuli Yehova, kaha kaweshi kukaliveyako.