LUKA 1:57-79

  •   JOHN THE BAPTIST IS BORN AND NAMED

  • ZEKALIYA MWAHANJIKILA CHIMWEZA MULIMO MWAKAZATA YOWANO

Elizaveta ahetele jino halwola lwakusapuluka. Kausoko kenyi Maliya atwamine nenyi tukweji vatatu. Lwola lwahetele jino mangana Maliya asalise nakukinduluka kwimbo lyenyi kuNazaleta. Kwasalile tukweji 6 numba naikiye akwate mwana walunga.

Omu Maliya alingile nyimako, Elizaveta asapulukile. Ocho kuwahilila kana chapwileko hakumona Elizaveta nasapuluka kanawa kaha nawa mwana wape! Omu Elizaveta asolwele mwanenyi kuli vakwavo alihachile navo navausoko wenyi, vosena vawahililile chikuma.

Kweseka naJishimbi jaKalunga jize ahanyine vaIsalele, mwana himwana walunga vatelelele kumujihana halikumbi lyamuchitanu naatatu nakumuluka lijina. (VyavaLevi 12:2, 3) Vatu vamwe vasakile ngwavo ou mwana vamuhindule ise, Zekaliya. Oloze Elizaveta akanyine ngwenyi: “Nduma! Lijina lyenyi Yowano.” (Luka 1:60) Anukenu ngwenu eli likiko lijina avulukile Ngavalyele ngwenyi vatela kuluka ou mwana.

Oloze vausoko navaze muvalihachilile vamuhamikile ngwavo: “Kakweshi kausoko kove umwe atwama nalijina kaneliko.” (Luka 1:61) Jino vehwile Zekaliya kuzachisa mavoko mangana avalweze lijina asakile kuluka ou mwanenyi. Zekaliya alombele liliva lyakusonekaho, kaha asonekeleho ngwenyi: “Lijina lyenyi ikiye Yowano.”—Luka 1:63.

Hahaze vene nalilimi lyaZekaliya lyatusunukile. Namwanuka ngwenu Zekaliya apwile kamama omu ahonene kwitavila mazu vamulwezele kuli kangelo nge Elizaveta mwakasema mwana walunga. Shikaho omu Zekaliya aputukile kuhanjika, vatu vosena valikomokelele nakwamba ngwavo: “Ou mwana kana mwakapwa ngachilihi?” (Luka 1:66) Vamwene chikupu ngwavo Kalunga ikiye alukile Yowano lijina.

Jino Zekaliya azalile nashipilitu yajila, kaha ambile ngwenyi: “Vamwalisenga Yehova Kalunga kaIsalele, mwomwo nalakana vatu jenyi nakuvayovola. Natuzundwila lumbinga lwaulwilo muzuvo yangamba yenyi Ndavichi.” (Luka 1:68, 69) Elu “lumbinga lwaulwilo” avulukile lwapwile nakulumbununa Mwata Yesu uze apwile kanda achisemuke. Zekaliya ambile ngwenyi kuhichila muli Yesu, Kalunga “kufuma hakutuyovola kumavoko avaka-kole jetu, akatuhane kutokwa chakumuzachilanga mulimo wajila chakuzeneka woma nakushishika nakupwa vakwoloka kumeso enyi hamakumbi etu osena.”—Luka 1:74, 75.

Zekaliya apolofwetele hali mwanenyi Yowano ngwenyi: “Ove mwana wamundende, navakakuvulukanga ngwavo ukapolofweto kayou Wakulitulaho Chikuma, mwomwo naukatetekela kulutwe lwaYehova nakumuwahishila jijila jenyi, nakuhana vatu jenyi chinyingi chakutachikiza ulwilo hakuvakonekela jishili javo, mwomwo yakeke yaKalunga ketu. Hakeke kaneyi hakiko vene natukamwena musana wakufuma mwilu nge uze wahakututuka chalikumbi, nakumunyikila vaze vatwama muchihela chakwilava wi namumilima yakuneha kufwa, nakutalikisa mahinji etu mujila yakuunda.” (Luka 1:76-79) Upolofweto kana wakolezezele chikuma vatu!

Halwola kanelu, Maliya uze apwile mujike, ahetele kwimbo lyenyi kuNazaleta. Jino vyuma muka navimusolokela omu vatu navejiva ngwavo ali nalijimo?