MATEU 2:1-12

  • VAKA-KUZACHISA VATANGANYIKA NAVAKAVANGIZA “TANGANYIKA” SWI NAKUYELUSALEMA, NAKUZE APWILE YESU

Kwapwile malunga vamwe vafumine kuMututuko. Ava malunga vapwile vaka-kuzachisa vatanganyika, kulumbununa malunga vaze valinangwile vyavatanganyika. Vambilenga ngwavo kulinangula vyavatanganyika chavakafwilenga kutachikiza vyuma navisolokela vatu mukuyoya chavo. (Isaya 47:13) Shimbu vapwile kulifuchi lyavo kuMututuko, vamwene “tanganyika,” kaha vamukavangijile hatunda yayisuku palanga nomu vahetele kuYelusalema, keshi kuMbetelemako.

Omu ava vaka-kuzachisa vatanganyika vahetele kuze, vehwile ngwavo: “Mwangana wavaYuleya ou nasemuka ali kulihi? Twamonanga tanganyika yenyi omu twapwanga kuMututuko, shikaho tuneza mangana tulifukule kuli ikiye.”—Mateu 2:1, 2.

Omu Helote Mwangana wamuYelusalema evwile mujimbu kana, apihililile chikuma. Ngocho asanyikile vapilishitu vavakulwane navakulwane veka vamukwitava chavaYuleya nakuvehula okwo mwakasemukila Kulishitu. Vamukumbulwile kweseka naVisoneka ngwavo, mwakasemukila “kuMbetelema.” (Mateu 2:5; Mika 5:2) Hakwivwa ngocho, Helote asanyikile vaze vaka-kuzachisa vatanganyika nakuvalweza ngwenyi: “Yenu mukamutondetonde kanawa ou mwana, kahomu namukamuwana, mukeze mukangulweze mangana nayami nawa ngukaye nakulifukula kuli ikiye.” (Mateu 2:8) Helote asakile kwijiva okwo apwile ou mwana mangana amujihe.

Omu vasunukile vaze vaka-kuzachisa vatanganyika, kwasolokele chuma chakukomwesa. Tanganyika uze vamwene omu vapwile kuMututuko, aputukile cheka kuvatwaminyina. Ou chikupu kapwile tanganyika wanganaveneko, oloze vamuhakileko mangana avatwaminyine. Ava vaka-kuzachisa vatanganyika vamukavangijile palanga nomu emanyine helu lyazuvo vapwilenga nakutwama vaYosefwe naMaliya nayou mwanavo wakanyike.

Ava vaka-kuzachisa vatanganyika hakwingila muzuvo, vawanyine Maliya namwanenyi Yesu. Vosena vafukamine hamavu nakulemesa Yesu. Kufumaho vamuhanyine ulu, nalavona, namila. Jino omu vasakile kukinduluka vakalweze Helote vyamwana vawanyine, Kalunga avakanjile muchilota. Ngachize vazachishile jila yeka hakukinduluka kulifuchi lyavo.

Munashinganyeka ngwenu iya ahakileko ou “tanganyika” atwaminyinyine ava vaka-kuzachisa vatanganyika? Anukenu ngwenu, ou tanganyika kavatwalile chatete kuli Yesu kuMbetelemako. Oloze avatwalile kuYelusalema, kuli Mwangana Helote, uze asakile kujiha Yesu. Helote kachi ajihile vene Yesu, kachi nge Kalunga kakanyishile ava vaka-kuzachisa vatanganyika kuya nakulweza Helote vyaYesuko. Pundu vene, Satana uze apwa muka-kole waKalunga ikiye asakile kujiha Yesu, kaha azachishile eyi jila mangana ngwenyi alinge ngocho.